Job 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Sofara brom det kantri gulum Neima bin tok langa Job,

²“Yu toktokbat ola rabishwan wed en ai garra ensim ol detlot kwestjan blanga yu na.

³Maitbi yu reken yu gin toktokbat olataim, dumaji yubin meigim melabat jidan kwaitbala en jidan sheimwan na. Bat najing. Wal ai garra meigim yu sheim du.

⁴Yu reken yu nomo gilti, en yu jidan raitwei langa God.

⁵Bat ai wandim God blanga tok langa yu,

⁶en meigim yu sabi ola sigridwei blanga im, en yu bina sabi God bina panishim yu brabli adbala na, bat im oni bin panishim yu lilbit.

⁷“Yu reken yu sabi det trubalawei blanga God det brabli haibalawan?

⁸Det trubalawei blanga God gin go mowa haiwan langa skai en mowa dipwan langa ola dedbala pipul, bat yu nomo sabi wanim God oldei dumbat.

⁹Det trubalawei im mowa bigwan langa dijan graun en langa solwoda.

¹⁰“If God pudum yu langa jeil o deigim yu langa kothaus wanim yu garra du? Najing!

¹¹God sabi pipul, en im luk ola nogudbala ting wanim olabat oldei dumbat.

¹²Im mowa isibala blanga meigim wailwan dongki jidan kwaitbala, bat im brabli ad blanga meigim granggibala pipul bulurrum det wei blanga God.”

¹³Wal Sofara bin kipgon tok, “Yu gibit yu laif langa God en prei langa im.

¹⁴Yu gibitawei det nogudbalawei blanga yu, ol detlot ting na weya yubin oldei dumbat sigridbalawei,

¹⁵wulijim yu kaan sheim, en yu garra jidan strongbala en nomo bradin enimo.

¹⁶En ola trabul blanga yu garra gowei brom yu hed, jis laik det fladwoda gowei.

¹⁷Det dakbala taim yubin oldei abumbat garra jidan brabli braitwan.

¹⁸Yu garra abum gudwan silip en jidan seifwan en yu kaan bradin en wori blanga enijing enimo.

¹⁹Yu kaan bradin wen yu silip en olabat garra rispek langa yu.

²⁰Bat detlot pipul hu jidan brabli nogudwan garra wokwokbat jis laik blainwan en olabat nomo sabi weya olabat garra go. Dei gin oni gidawei brom olabat trabul wen olabat dai.” Lagijat na Sofara bin tok.