Job 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Job bin tok langa Bilded,

²“Wanim yubin du blanga album langa mi wen aibin brabli wikwan? Najing.

³Yu reken ai nomo sabi det wei blanga God? En yu reken yubin tok langa mi gudwan wed, indit?

⁴Hubin album yu blanga tok ol detlot wed?” Lagijat na Job bin tok.

⁵Wal Bilded bin tok, “Wal yu jinggabat detlot dedwan pipul hu sheiksheikbat langa det pleis andanith langa det bigwan solwoda weya ola dedbala pipul oldei go.

⁶Nomo enijing deya langa det kantri weya ola ded pipul jidan blanga blandim miselp brom God.

⁷Im na bin pudum det skai deya langa top, en im na bin pudumdan dijan graun iya langa dijan emtiwan pleis.

⁸God bin meigim det klaud jidan bulap garram woda, en dei kaan basbas.

⁹En detlot klaud oldei gaburrumap det mun.

¹⁰God bin pudum raunwan mak langa midul langa det solwoda blanga kadimat det dakbala brom det lait.

¹¹En God bin pudum detlot pol blanga holdimap det skai wulijim im kaan buldan. Wen imbin toktokbat, tharran meigim ebrijing sheiksheik nomo lilbit.

¹²Garram im pawa en klebawanwei God bin meigim det bigbala solwoda jidan kwaitwan.

¹³Garram im ronwan pawa imbin meigim det skai jidan brabli braitwan, en garram im ronwan bingga, imbin binijimap det brabli bigwan dregan weya oldei jidan insaid langa solwoda.

¹⁴Dislot pawa, im jis laik God bin tok kwaitbalawei. Wal hu gin sabi im strongbala pawa?” Lagijat na Bilded bin tok.