1Wal langa dis taim na King Hesakaiya bin gitsik en imbin gulijap dai. Det speshalwan mesinja neim Aisaiya, det san blanga Eimas, bin go blanga luk im en imbin tok langa im, “YAWEI det trubala God im tok yu garra meigim ebrijing redibala, dumaji yu kaan jidan gudbala igin. Yu garra dai.”
2Wal Hesakaiya bin tenaran en luk langa det wol na en imbin prei,
3“YAWEI, yu jinggabat langa mi. Aibin oldei jidan brabli trubala langa yu en aibin oldei bulurrum yu en aibin oldei trai blanga dum ebrijing weya yu wandim mi blanga dum.” En Hesakaiya bin kraikrai soribalawei.
4Wal Aisaiya bin gowei, bat imbin stil langa det midul pat blanga det bigwan haus blanga det king wen YAWEI bin dalim im blanga gobek langa King Hesakaiya, det boswan blanga ola pipul blanga YAWEI, en dalim im dijan wed. YAWEI bin tok, “Mi na YAWEI, det God blanga yu grengrenfatha King Deibid. Aibin lisin langa yu preya en aibin luk yubin krai. Ai garra meigim yu gudbala igin en langa thrideistaim yu garra go langa det Serramoni Pleis.
6Ai garra larram yu jidan laibala blanga naja 15 yiya. Ai garra seibum yu en Jerusalem brom det king brom Asiriya. Dumaji mi na YAWEI en ai garra lukaftumbat dijan taun wulijim main neim garra jidan haibala en main pipul garra rispek mi en ai garra kipum det pramis weya aibin meigim garram main wekinmen Deibid.” Lagijat na YAWEI bin tok.
7Afta na Aisaiya bin dalim ola wekinmen blanga det king blanga smeshimap det frut daga gulum fig en pudum ontop langa det boil, blanga meigim im gudbala igin.
8Wal King Hesakaiya bin askim Aisaiya, “Aisaiya, wanim det sain YAWEI garra shoum mi weya im garra meigim mi jidan gudbala en thrideistaim ai garra gobek langa det Serramoni Pleis?”
9Wal Aisaiya bin tok, “YAWEI garra shoum yu samting blanga kipum im pramis. Wal wanim yu wandim? Yu wandim det san blanga go kwikwan sangodanwei o gobek kwikwan sangidapwei?”
10Wal King Hesakaiya bin tok, “Im isiwan blanga det san blanga kipgon kwikwan sangodanwei. Ai wandim im garra gobek kwikbala sangidapwei.”
11Brom deya Aisaiya bin prei langa YAWEI, en YAWEI bin meigim det san gobek kwikbala sangidapwei.
12Wal langa det seimtaim King Merodakbaladan brom Bebalon, det san blanga Beiladan, bin irrim det wed weya King Hesakaiya bin jidan sikwan en imbin raidimdan leda en jandim det leda en presen blanga im.
13Hesakaiya bin gudbinji langa detlot mesinja en imbin shoum olabat ola gudwan ebrijing blanga im, ol detlot silba en gol en gudsmelwan medisin en ola ebrijing blanga fait langa najalot pipul. Imbin shoum olabat ebrijing na en imbin deigim en shoum olabat ebrijing ebriweya langa im stowa rum en langa im kantri.
14Afta na det speshalwan mesinja neim Aisaiya bin go langa King Hesakaiya en imbin askim im, “Brom weya dislot men bin kaman en wanim deibin tok langa yu?” Wal King Hesakaiya bin tok, “Deibin kaman brom det brabli longweiwan kantri gulum Bebalon.”
15En Aisaya bin tok, “Wanim deibin luk langa yu bigwan haus?” En Hesakaiya bin tok, “Aibin shoum olabat ebrijing langa ola stowa rum.”
16Brom deya Aisaiya bin tok langa det king, “YAWEI det boswan God im tok langa yu. ‘Bambai ebrijing langa yu bigwan haus en ebrijing weya yu grengrenfathamob bin oldei kipum, wal detlot Bebalon pipul garra deigidawei detlot ebrijing. Dei kaan libum enijing.
18En dei garra deigidawei blanga yu ronwan femilimob en meigim olabat jidan speshalwan boswan wekinmen en wekwek langa det bigwan haus blanga det king blanga Bebalon.’” Lagijat na YAWEI bin tok.
19Wal King Hesakaiya bin reken ebrijing garra jidan gudbalawei raidap im binij, en imbin dalim Aisaiya, “Det wed brom YAWEI yubin gibit mi, im gudwan.”
20Wal ebrijing weya King Hesakaiya bin dum deibin raidimdan langa det buk gulum Ola stori blanga ola king brom Juda. King Hesakaiya bin jidan brabli strongbala, en imbin kadim rok blanga meigim det springwoda kaman raidap langa det nyuwan wodahol weya imbin meigim insaid langa det taun. Wal King Hesakaiya bin dai en im san Manesa bin jidan det nyuwan king.
