1Dameŋ ira Hisikia e hucsâko bame hâmozo ewec. Ehame Amozire ŋokâ, porofete Jesaja e erao fisirâ ʒiŋuc âzâcnewec: “Wofuŋ e ʒiŋuc mukac: Go wiacfâcge mâzoc‐joparâ ʒawiec, go ɋiɋic mocwâc mi qahuc hâmo‐jâmbâŋkecmu hâcne.”
2Iŋuc mume Hisikiazi sâpeopec forisierâ Wofuŋ wira wâwâsic ecnewec.
3Ehuc ʒiŋuc muwec: “O Wofuŋ, no gore maio siocmâc â maŋhâcbuc jupo, ehuc goki manatec biaŋkeekac i hâcne ebac epo, go irec manasuc mac!” Hisikia e iŋuc murâ ki kâcɋene kiowec.
4Eme Jesaja e hae ʒoŋa ʒâʒâŋiŋ i mi behehame Wofuŋte dâŋzi erao ʒiŋuc fuawec:
5“Go risierâ ŋic ŋokacfâc‐nane jaŋere fekicne Hisikia ʒiŋuc âzâcnec: Apage Dawidire Wofuŋ Anutu e dâŋ ʒiŋuc mukac: No nunumuge â kiuuge i hone manac ekopac. Manakic, no ɋiɋicne bacgupe; ʒoaŋ gie bapa jahec â moc tarame go Wofuŋte ufuŋko fecmu.
6Eme no jara 15 mocwâc ʒuhucke‐garepemu. No go â hae ʒirec rune ŋoŋe Asiria ŋicwofuŋte meonec batarac‐ŋopapemu. Erâ no nahacnere â kiŋaŋŋic‐nane Dawidire erâ hae ʒi ŋezickepemu.”
7Eme Jesajazi muwec, “Jâmbo poroŋ bawarerâ wicʒâhâcko râepie ɋiɋic qazejec.”
8Iŋuc mume Hisikiazi Jesaja ʒiŋuc wiocnewec: “No Wofuŋzi bâpiaŋnume ʒoaŋ gie bapa jahec â moc tarame Wofuŋte ufuŋko fepemu irec ma i wemo wiac jaha fuaocmu?”
9Iŋuc wiome Jesajazi muwec, “Wofuŋ e mupaŋkewec irec sâc eraonec wemo ma moc gorao fuaocte mukic? Nâkumuczi ʒuhuckerâ ʒoraocte me risierâ bembeŋkeocte mukomec?”
10Iŋuc mume Hisikiazi muwec, “Nâkumuczi ʒoraocmu i wiac afecne, irec sifu bembeŋkezejec.”
11Iŋuc mume porofete Jesajazi Wofuŋ wâsickewec. Iŋuc eme Wofuŋzi nâkumuc bâmbembeŋkeme Ahaʒire ufuŋ ʒaeo dameŋ ʒoricne fowec.
12Dameŋ ira Baladaŋte ŋokâ ʒâŋene Merodac‐Baladaŋ, Babe ŋicwofuŋ hâcne, e papia â bubiaŋte wiac Hisikiarao râeme rawec. E Hisikia huc bame foku mocwâc ɋiɋic qawec irec biŋe manawecte iŋuc ewec.
13Eme Hisikia e irec bubiaŋ manarâ kiŋaŋŋic jaŋe boreŋ ʒeŋaŋfic‐ticne jowatuwec, ine siliwa mecne, gol mecne, wiac âsu biaŋhec mecne, wokemaŋ furi sâko mecne â ʒikare wiac irec fic mecne, erâ wâc moneŋ boreŋficko wiac forawec i sasawa jowatu‐fârewec. Ŋicwofuŋ ficticnao â mâreŋ‐ticne sasawao wiac fofârewec i Hisikiazi moc mi hesoŋke‐jarehuc jowatu‐fârewec hâcne.
14Eme porofete Jesaja e ŋicwofuŋ Hisikiarao ra ʒiŋuc mu wioc ecnewec: “Ŋic keci jaŋe wemo dâŋ gazambieŋ erâ wenirec ware fua‐garembieŋ?” Hisikiazi muwec: “Jaŋe mâreŋ ʒorickonec, Babe haeonec hâcne norao ware fisimbieŋ.”
15Eme muwec: “Jaŋe ficgao wemo wiac honembieŋ?” Hisikiazi muwec: “Jaŋe ficnaneo wiac fokac sâc hone‐fârembieŋ, no boreŋ ʒeŋaŋfic‐naneo wiac moc mi hesoŋke‐jarepac.”
16Iŋuc mume Jesajazi Hisikia ʒiŋuc âzâcnewec: “Anutu Tâpiri Ɋuŋɋasaŋ Wofuŋ ere dâŋ manac!
17Manakic, dameŋ moc maickeocmu ira wiac sasawa ficgao fokac i mecne, erâ mamacfâcge jaŋe juwefuhuc boreŋ mafa wiac râe guruc ejumbieŋ i mâmâc Babe mâreŋko barâ raniŋmu; wiac huŋgaŋne mac moc mi foocmu, Wofuŋzi iŋuc mukac.
18Ehame ŋokâfâcge fua‐gareniŋmu jaŋeraonec gâcne wâc bacjopa raniŋmu, eme jaŋe Babe ŋicwofuŋ ere ficko kiŋaŋ qaqa erâ juniŋmu.”
19Eme Hisikiazi Jesaja ʒiŋuc âzâcnewec: “Wofuŋte dâŋ nazakomec i biaŋne.” E ʒiŋuc manahuc muwec: No nahacne juju dameŋko wama â jujuhâmo foocmu hâcne.
20Hisikiazi wiac sasawa ebac ewec â tâpiri‐ticnere fuŋne, erâ opâ kanaŋ bawec â opâ hata bahuc fâreme haeo fisiwec irec binaŋ sasawa i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.
21Eme Hisikia a apa ŋosafâc‐ticne jaŋerao ʒuhuckehuc hâmowec. Ehame ŋokâ‐ticne Manasezi tucticne qarâ ŋicwofuŋ juwec.
