Awulɑɑ II 10:29-35

²⁹Pɑɑ nɑ mpʋ tɔ, ɩ lɑpɑ ɩsɑɣɑtʋ kɛ teitei ɩsɩɩ Solopʋwɑm. Solopʋwɑm kɑ tusinɑ Ɩsɛɣɛlɩ nyǝ́mɑ nɑ pɑ́ lɑɑ wʋlɑ nɑwee kɛ Petɛɛlɩ nɑ Tɑŋ.

³⁰Ḿpʋ́ɣʋ́ Tɑcɑɑ tɔmɑ Yehu sɩ: Mɑ sɑmɑ, n lɑpɑ nti mɑɑ sɩɩwɑ sɩ mɑɑ hɔnɑ Akɑpɩ nɑ ɩ tǝyɑɣɑ nyǝ́mɑ pɑ ŋkpɑŋʋɣʋ tɔ. Pǝ tɔɔ kɛ́ nyɑ́ piyɑ piyɑ kɑ́ lɛɛtɩ nyɑ́ lonte tɑɑ, nɑ pɑ́ tɔkɩ kɑwulɑɣɑ nɑ pɑ́ kɑɑsǝɣɩ tǝmɑ. Hɑlǝnɑ pɑ lʋlʋŋ loosi kɛ liɣiti.

³¹Amɑ Yehu tɑ tǝŋ Ɩsɔ Tɑcɑɑ kiiŋ kɛ teu nɑ lotu kʋlʋmtʋ. Ɩ tɑ lɔ tɩɩŋ lɑɑʋ mpi pǝ tɑɑ Solopʋwɑm kɑ tusɑ Ɩsɛɣɛlɩ nyǝ́mɑ tɔ.

³²Wɑɑtʋ ɩnɩ ɩ tɑɑ kɛ́ Tɑcɑɑ yelɑɑ nɑ Silii wulɑʋ Hɑsɑyɛlɩ sʋʋ Ɩsɛɣɛlɩ nyǝ́mɑ tɛtʋ tɔɣɔʋ.

³³Nɑ pɑ́ lɛɛkɩ Yɑɑtɑnɩ ilim tǝlɩɩlɛ tɔɔ nɑ Alʋwɛɛ tɛtʋ nɑ ilim ntɔɣɔŋ tɔɔ nyǝntʋ. Pǝ kpɑɣɑʋ Kɑlɑɑtɩ nɑ Pɑsɑŋ pɑ tɛtʋ nti tǝ tɑɑ Lupɛŋ nɑ Kɑtɩ nɑ Mɑnɑsee pǝ nyǝ́mɑ kɑ wɛɛ tɔ.

³⁴Pɑ kɛɛsɑ Yehu tɔmnɑɑ lɛntǝnɑɑ, nɑ ɩ kʋlɑpǝm, nɑ ɩ ɑpɑlʋtʋ tɔm kɛ Yutɑ ɑwulɑɑ tɑkǝlɑɣɑ tɑɑ.

³⁵Ɩ tɔɣɔ kɑwulɑɣɑ kɛ pɩɩsɩ pǝlefɛɩ hiu kɛ Sɑmɑlii kɛ Ɩsɛɣɛlɩ tɑɑ. Ɩ sǝpɑ, ɩlɛnɑ pɑ́ pimi-ɩ Sɑmɑlii. Ɩlɛnɑ ɩ pǝyɑlʋ Sowɑkɑsɩ lɛɛtɩ ɩ lonte.