Ŋicwofuŋ II 10:29-35

²⁹Erâ Jehu e iŋuc ehuc sifu Nebatere ŋokâ Jeroboam ere hehesic i mi râpeckewec. Jeroboam e hâcne Israe ŋic ejareme Bete haeo â Daŋ haeo bulimakao motecnere hawari golzi bakicne ŋepic ira hehesic bâfuambiŋ.

³⁰Eme Wofuŋzi Jehu ʒiŋuc âzâcnewec: “Go nore ʒâŋe faio wiac sasawa etec biaŋke‐fârewec â nore maŋko dâŋ fowec irec sâcko Ahabare kikefuŋfâc wiac ejaremeŋte ɋâricfâcge fua fepie arecne 4 eocmu jaŋe Israere eri ŋeŋeo ŋenʒoŋgopieŋ.”

³¹Erâ ine Jehu e Israere Wofuŋ Anutu ere sâcmutâc dâŋ i maŋticnezi sakarehuc ira mi ninipe‐hâmowec. E Jeroboamzi Israe ŋic ejareme hel esic bâfuambiŋ, hehesic i mi râpeckewec.

³²Eme dameŋ ira Wofuŋzi fuŋkerâ Israe dâkâne gâcne râpec‐jopawec. Iŋuc eme Haʒaelezi Israe mâreŋ ʒiŋuc irec rune bawahac‐jopa‐fârewec:

³³Gileade â Gadeŋic jaŋere mâreŋ sasawa Jordaŋ opâonec domarâ ʒoaŋ wewefunaopec rakac, erâ Rubeŋ â Manase ŋic jaŋere mâreŋ i Aronoŋ opâo Aroe hae ŋekac irecnec fuŋkerâ raku Gileade â Basaŋ mâreŋko fisikac.

³⁴Jehuzi wiac sasawa ebac ewec â tâpiri‐ticnere fuŋne sasawa i Ŋicwofuŋ jaŋere Binaŋ Qâhâc papia qizecko qâreŋke‐fârekicne.

³⁵Eme Jehu e apa ŋosafâc‐ticne jaŋerao ʒuhuckehuc hâmome jaŋe fombiŋkoa Samaria haeo duckembiŋ. Eme ŋokâ‐ticne Joahaʒi eki tucticne qarâ ŋicwofuŋ juwec.