1Meke zama se Zopara sapu mae guana pa popoa Neama,
2“Vea, loke tie kote olaṉi sari zinama hoboro hire? Meke sa tie sapu zama va soku si hinokarana mo?
3Kaqu va noso tie tu sari mua zinama loke guguadi? Sari mua zinama ṉoṉovala si lopu kaqu ta gegese ni tu agoi?
4Gua pu zama ni agoi si hinokaradi, gua si agoi; meke via si agoi pa kenuna sa Tamasa, gua si agoi.
5Kei, leana hola be olaṉigo mo sa Tamasa, meke zama vura atu igo mo Sa.
6Be gua asa kote tozi nigo Sa sapu soku vari kali sa gilinagilana, meke soku ginugua si lohi hola, sapu lopu kaqu boka tumae ni na tie. Avoso mae: lopu va kilasigo sa Tamasa padana sa sinokudi ri na mua sinea.
7Boka hata vura ni goi sari ginugua lohidi te Tamasa? Boka hata vura nia goi sa pada tanisa Tamasa pu tagodi sari doduru ṉiniraṉira?
8Sa ginilagilana asa si ululu hola nia sa maṉauru; sa si boka evaṉia goi? Meke lohi hola nia sa sa lovu; sa si boka gilania goi?
9Sa Tamasa si noma hola nia sa kasia popoa, meke labe hola nia sa lamana.
10Pana mae sa Tamasa meke veko igo Sa pa vetu varipusi, meke tavetia Sa sa vinaripitui, esei boka va noso ia si Asa?
11Ura, gilani Nana sa Tamasa sari tie sekesekeidi; dogoro betoi Nana Sa sari doduru dia tinavete kaleadi.
12Ba lopu kaqu gilae sa tie pekipeki, osolae podo va manavasa tuna sa doṉ'ki pinomona.
13Ba mu va totoanae la ia sa bulomu koasa Tamasa, mamu ovulu sage ni limamu la koa Sa.
14Mu rizu pani sari doduru mua sinea, mamu lopu va koa i pa mua vetu sari kinaleana.
15Pude gua, kote mataqara si goi meke lopu kurekure, kote varane si agoi meke lopu matagutu.
16Meke kote murimuri pa mua binalabala sari mua tinasuna, guana kolo sapu totolo taloa.
17Sa mua tinoa si kote bakala guana rimata pana korapa rane; na huporo ba kote kalalasa guana rimata pana munumunu.
18Kote koa valeana si agoi meke siṉi igo na hiniva leana tana vugo repere. Tamasa kote lavelave nigo, meke ponigo sa minagogoso.
19Lopu kaqu matagutu ni goi sari mua kana, meke soku tie kote atu tepa tinokae koa goi.
20Ba sari tie kaleadi si kote nunala meke doliṉa lamae, ba loke vasina kote boka govete gua. Sa siraṉa sapu koa hola koarini si na minate mo.”
