Kʋsǝsɩɩtʋ Lɛlʋɣʋ 7

1

2

3

4

5

6

7

8

9

10

¹Ḿpʋ́ɣʋ́ Moisi tɑsɑɑ sɩ: Wɑɑtʋ wei Tɑcɑɑ kɑ́ tɔɣɔnɩ piitimnɑɑ sɔsɔɔm toŋ nyǝm nɑɑtosompɔɣɔlɑɣɑ, ɩlɛnɑ ɩ́ cɛlɛ-mɛɣɛ pɑ tɛtʋ. Ntǝɣǝlɛ Hiti nɑ Kilikɑsɩ nɑ Amolii nɑ Kɑnɑɑŋ nɑ Peliisi nɑ Hifi nɑ Yepusi pǝ tɛtʋnɑɑ.

²Ɩ kɑ́ tʋ́ piitimnɑɑ mpɛɣɛ mǝ niŋ tɑɑ nɑ ɩ́ kǝlɩ-wɛ, nɑ ɩ́ kpiisi-wɛ. Pǝ fɛɩ sɩ ɩ́ wɛɛnɑ pɑ pǝtɔɔtǝlɛ nɑ mǝ nɑ-wɛ ɩ́ pɛɛlɩ nɔɣɔ nɑkǝlɩ.

³Mǝ nɑ-wɛ ɩ́ tɑɑ kpɛntɩ ɑkpɑɣɑlɛ tɑɑ. Ɩ́ tɑɑ hɑ mǝ pɛɛlɑɑ kɛ pɑ pǝyɑlɑɑ, yɑɑ ɩ́ cɑɑ pɑ pɛɛlɑɑ kɛ mǝ pǝyɑlɑɑ.

⁴Mpi tɔ, ye ɩ lɑpɑ mpʋ, ɩsɩɩ pɑ tolisɑ mǝ piyɑ nɑ pɛlɛ pɑ́ tǝŋ tɩɩŋ. Ɩlɛnɑ Tɑcɑɑ mʋ-mɛ nɑ pɑ́ɑ́nɑ́ nɑ ɩ kʋ-mɛɣɛ kpɑkpɑɑ.

⁵Amɑ pǝ wɛɛ kɛ́ sɩ ɩ́ wɑkǝlɩ pɑ tǝlɑɑlɛnɑɑ, nɑ ɩ́ yɔkɩ pɛɛ kʋlɑlɑɑnɑ, nɑ ɩ́ sɛtɩ pɑ tesikɑsɩ nɑ ɩ́ nyɑɣɑsɩ pɑ tɩɩŋ kɛ kɔkɔ.

⁶Mǝ Ɩsɔ Tɑcɑɑ nyǝnǝɣɩ-mɛɣɛ ɩ nyǝ́mɑ kɛ́. Ɩnɩ ɩ lǝsǝnɑ-mɛ sɩ ɩ́ pǝsɩ ɩ yǝlɑɑ kɛ ɑntulinyɑ piitimnɑɑ hɛkʋ.

⁷Pǝ tɑɣɑ ɩsɩɩ ɩ́ tɛɛ piitimnɑɑ tǝnɑɣɑ pɑɣɑlɛ tɔɣɔ Tɑcɑɑ luɣu sʋʋ-mɛ nɑ ɩ́ lǝsɩ-mɛ. Hɑlɩ mɛɣɛlɛ piitim sǝkpem kɛ lɛmpɩ tɑɑ.

⁸Amɑ ɩ luɣu wɛ-mɛɣɛ nɑ ɩ́ sɔɔlɩ sɩ ɩ́ tɔkɩ nɔɣɔ ŋkɑ ɩ kɑ sɩɩ mǝ cɑɑnɑɑ tɔ. Nɑ ɩ́ cɛ-mɛɣɛ Icipiti wulɑʋ yomle tɑɑ nɑ ɩ toŋ sɔsɔɔŋ nɑ ɩ́ lǝsɩ-mɛ.

⁹Pǝ wɛɛ sɩ ɩ́ nyɩ sɩ Tɑcɑɑ tike ntɛ́ Ɩsɔ. Ɩ tɔkɑ ɩ nɔɣɔ sɩɩʋ kɛ́ nɑ ɩ́ pɑɑsǝɣǝnɑ mpɑ pɑ sɔɔlǝɣɩ-ɩ nɑ pɑ́ tɔkǝɣɩ ɩ kʋsǝsɩɩtʋ tɔ hɑlǝnɑ pɑ lʋlʋŋ loosi iyɑɣɑ (1000).

¹⁰Amɑ ɩ hɔŋ mpɑ pɑɑ cɑɑ-ɩ tɔ pɑ ŋkpɑŋŋ kɛ kpɑkpɑɑ, nɑ ɩ́ kpiisiɣi-wɛ.

¹¹Mpʋ tɔ, ɩ́ tɔkɩ kiiŋ nɑ kʋsǝsɩɩtʋ nɑ kʋtʋtʋtʋ nti mɑ tʋ-mɛɣɛ sɑŋɑ ɩsǝntɔ tɔ nɑ ɩ́ lɑkɩ-tɩ.

¹²Ye ɩ́ nɩɩkɩ Tɑcɑɑ kʋtʋtʋtʋ nɑ ɩ tɔkǝɣɩ-tɩ nɑ ɩ́ lɑkɩ-tɩ Tɑcɑɑ mǝ Ɩsɔ kɑ́ tɔkɩ nɔɣɔ pɛɛlʋɣʋ nɑ kʋpɑntʋ nti ɩ kɑ sɩɩ mǝ cɑɑnɑɑ nɑ tuunɑʋ tɔ.

¹³Ɩ kɑ́ sɔɔlɩ-mɛ nɑ ɩ́ kooli-mɛɣɛ kʋpɑntʋ kɛ tɛtʋ nti ɩ kɑ heelinɑ mǝ cɑɑnɑɑ nɑ tuunɑʋ sɩ ɩ kɑ́ hɑ-mɛ tɔ tǝ tɑɑ. Ɩlɛnɑ mǝ nɑ mǝ tɔlɑ ɩ́ huki. Nɑ tǝ́ lʋlɩ-mɛɣɛ tɔɣɔnɑɣɑ pee nɑ nim nɑ sʋlʋm.

¹⁴Ɩsɔ kɑ́ kooli-mɛɣɛ kʋpɑntʋ nɑ pǝ́ kǝlɩ piitimnɑɑ tǝnɑ. Pɑ kɑɑ nɑ mǝ tɛɣɛ kɑɑlʋlɑɣɑ, pɑɑ ɑpɑlʋ yɑɑ ɑlʋ yɑɑ tɔtɛ.

¹⁵Tɑcɑɑ kɑ́ hɑtǝlǝnɑ-mɛɣɛ Icipiti tɑɑ kʋtɔmǝŋ ɩsɑɣɑŋ ɩnɩ ɩ tǝnɑ. Amɑ ɩ kɑ́ tʋ-ɩ mpɑ pɑɑ cɑɑ-mɛ tɔ.

¹⁶Ɩ́ kɑ́ kpiisi piitimnɑɑ tǝnɑ mpɑ Tɑcɑɑ kɑ́ tʋ́ mǝ niŋ tɑɑ tɔɣɔ, ɩ́ tɑɑ wɛɛnɑ pɑ pǝtɔɔtǝlɛ. Pǝ́cɔ́ pǝ fɛɩ sɩ ɩ́ tǝŋ pɑ tɩɩŋ, tɔfɔ pǝ kpɑɑ-mɛ ɩsɩɩ kɑtɔkɑ nɑ pǝ́ kʋ-mɛ.

¹⁷Ntɑnyɩ ɩ́ kɑ́ mɑɣɑsɩ mǝ tɑɑ sɩ piitimnɑɑ mpɛ pɑ tɛɛ-mɛɣɛ pɑɣɑlɛ. Ɩ́ kɑɑ nyɩ ɩsǝnɑ ɩ́ kɑ́ lɑ nɑ ɩ́ tɔɣɔnɩ-wɛ tɔ.

¹⁸Ɩ́ tɑɑ nyɑnɑ-wɛ. Ɩ́ tɔɔsɩ pǝ tǝnɑ mpi mǝ Ɩsɔ Tɑcɑɑ lɑpɑ Icipiti wulɑʋ nɑ Icipiti tɛtʋ tǝnɑ tɔ.

¹⁹Ɩ́ nɑ́nɑ mǝ ɩsǝpǝle kɛ wɑhɑlɑnɑɑ mpɑ ɩ tʋ-wɛ tɔ, nɑ piti tǝmɑ nɑ kɔkɔlɔ nyǝnɑ wenɑ ɩ lɑpɑ nɑ ɩ́ lǝsɩ-mɛɣɛ Icipiti tɛtʋ tɑɑ nɑ tomɑ tɔ. Mpʋ ɩnɩ tɔtɔɣɔ ɩ kɑ́ lɑnɑ piitimnɑɑ mpɑ pɑ sɔɣɔntʋ ɩ wɛnɑ mpʋ tɔ.

²⁰Tɑcɑɑ mǝ Ɩsɔ kɑ́ tʋ-wɛɣɛ tʋntʋnyɑmǝŋ, nɑ pɑɑ pɑ tɑɑ lɛlɑɑ kɑ́ fiti nɑ pɑ́ ŋmɛlɩ, ɩ kɑ́ kʋ pɑ tǝnɑ.

²¹Pǝ tɔɔ ɩlɛ, ɩ́ tɑɑ nyɑ-wɛ, mǝ Ɩsɔ sɔsɔ wei pɑ nyɑŋnɑ tɔ ɩ wɛ mǝ wɑɑlɩ kɛ́.

²²Ɩ kɑ tɔɣɔnɩ piitimnɑɑ mpɛɣɛ pǝcɔ pǝcɔɣɔ. Ɩ kɑɑ kpiisi-wɛɣɛ nɔɣɔ kʋlʋmɑɣɑ. Pǝ́ tɑɑ kɔɔ nɑ tɑɑlɛ wontu huki tɛtʋ tɑɑ nɑ tǝ́ kʋlɩ mǝ tɔɔ.

²³Mǝ Ɩsɔ kɑ́ tʋ́ pɑ nɑ pɑ ɑwulɑɑ kɛ mǝ niŋ tɑɑ, nɑ pɑ tɛɛ sʋʋkǝnɑ-mɛ, hɑlǝnɑ ɩ́ kpiisi-wɛ. Pɑ kɑɑ kpɑɣɑ mǝ tɔɔ kɛ́ nyɩɩlʋɣʋ. Pǝyele nɔɣɔlʋ kɑɑ tɑsɑ pɑ ɑwulɑɑ mpɛ pɑ hǝlɑ kɛ tɔɔsʋɣʋ.

²⁵Ɩ́ kɑ́ wɔ pɑ tɩɩŋ kʋsɑɑkǝŋ kɛ kɔkɔ. Amɑ ɩ́ tɑɑ nyɩɩlɩ pǝ tɔɔ wʋlɑ nɑ liɣitee kɛ kɔɔlʋɣʋ. Mpi tɔ, pǝ kɛ́ mǝ Ɩsɔ Tɑcɑɑ kɛ mpusi kɛ́. Pɩɩ kpɑ-mɛɣɛ ɩsɩɩ kɑtɔkɑ nɑ pǝ́ kʋ-mɛ.

²⁶Pǝ fɛɩ sɩ ɩ́ sʋʋnɑ mpusi nyǝm mpɩ pǝ tɑɑ pʋlʋɣʋ mǝ tɛɛsɩ tɑɑ, nɑ pǝ́ pǝsɩ-mɛɣɛ mpusi nyǝ́mɑ. Pǝ wɛɛ sɩ ɩ́ nyǝnɩ-wǝɣɩ ɑcɑɑlǝtʋ kɛ́ nɑ ɩ́ kisi-wɩ nɑ ɩ́ wɑkǝlɩ-wɩ.