Text copied!
CopyCompare
PIIPILI ƖSƆ TƆM TAKƎLAƔA - Kʋsǝsɩɩtʋ Lɛlʋɣʋ

Kʋsǝsɩɩtʋ Lɛlʋɣʋ 10

Help us?
Click on verse(s) to share them!
1Ḿpʋ́ɣʋ́ Tɑcɑɑ heelɑ-m sɩ: Sɑɑkɩ pɛɛ kpɑɑtɑnɑɑ kɛ nɑɑlɛ, ɩsɩɩ kɑncɑɑlɑɣɑ nyǝ́mɑ, nɑ mɑ́ kpɑɑnɑ pʋɣʋ tɑɑ kɛ́ ɩ kiŋ, nɑ mɑ́ kɑ́ pǝ ɑtɑkɑɑ kɛ́ tɑɑsɩ.
2Tɛlǝsɩ kɑncɑɑlɑɣɑ nyǝ́mɑ mpɑ mɑ yɔkɑɑ tɔ pɑ tɔɔ tɔm kɛ kʋfɑmɑ tɔɔ ɩlɛnɑ mɑ́ sɩɩ-wɛɣɛ ɑtɑkɑɑ tɑɑ.
3Ḿpʋ́ɣʋ́ mɑ cɑɑ kpeŋkpelɑsɩ toŋ nyǝnsɩ nɑ mɑ́ kɑ́ ɑtɑkɑɑ, nɑ mɑ́ sɑɑkɩ pɛɛ kpɑɑtɑnɑɑ, nɑ mɑ́ kpɑɑnɑ-wɛɣɛ pʋɣʋ tɑɑ.
4Ɩlɛnɑ Tɑcɑɑ tɛlǝsɩ pɑ tɔɔ kɛ́ kʋsǝsɩɩtʋ nɑɑnʋwɑ wei ɩ kɑ kɛɛsɑ kɔkɔ tɑɑ kɛ́ kʋyɑŋku mǝ tǝnɑ ɩ́ kotɑ pʋɣʋ luɣu tɛɛ tɔ, nɑ ɩ́ cɛlɛ-m.
5Ɩlɛnɑ mɑ́ tii nɑ mɑ́ tʋ́ pɛɛ kpɑɑtɑnɑɑ mpɛɣɛ ɑtɑkɑɑ wei mɑ sɑɑkɑ mpʋ tɔ ɩ tɑɑ. Nɑ ɑ́ wɛ tǝnɑ ɩsɩɩ Tɑcɑɑ kɑ heelɑ-m tɔ.
6Ḿpʋ́ɣʋ́ Ɩsɛɣɛlɩ nyǝ́mɑ kʋlɑ Pene-Yɑkɑŋ lɔkɔnɑɑ cɔlɔ nɑ pɑ́ tɛɛ Moselɑ. Tǝnɑɣɑ Alɔŋ sǝpɑ nɑ pɑ́ pimi-ɩ nɑ ɩ pǝyɑlʋ Ɩliyɑsɑɑ kpɑɣɑ ɩ kɔtʋɣʋ tǝmlɛ.
7Pɑ kʋlɑ tǝnɑ, ɩlɛnɑ pɑ́ tɛɛ Kukotɑ. Pɑ lɩ́ɩ́ tǝnɑ nɑ pɑ́ polo Yopǝtɑ. Tɛtʋ ntɩ tǝ tɑɑ kɑ wɛ lʋm kɛ́.
8Wɑɑtʋ ɩnǝɣɩ Tɑcɑɑ fɑɣɑ Lefii lʋlʋɣʋ nyǝ́mɑ nɑ pɑ mpɑɑ, nɑ ɩ́ tʋ́-wɛ sɩ pɑ́ sǝɣǝlǝɣɩ Ɩsɔ ɑtɑkɑɑ nɑ pɑ́ sʋʋkɩ ɩ cokǝle tɑɑ nɑ pɑ́ lɑkɩ-ɩ tǝmlɛ nɑ pɑ́ kooliɣi yǝlɑɑ kɛ kʋpɑntʋ nɑ ɩ hǝtɛ kɛ hɑlǝnɑ sɑŋɑ.
9Mpʋ pǝ yelinɑ nɑ Lefii nyǝ́mɑ fɛɩnɑ hɑlǝm ɩsɩɩ pɑ tɛɛtʋnɑɑ. Ɩlɛ Tɑcɑɑ kɑ heelɑ-wɛɣɛ sɩ ɩnǝɣǝlɛ pɑ nyǝm.
10Ḿpʋ́ɣʋ́ mɑ cɑɣɑ pʋɣʋ tɑɑ tɔtɔɣɔ kʋyɛɛŋ nɩɩlɛ, nɑ Tɑcɑɑ tɑsɑ mʋɣʋ kɛ nti mɑ sǝlǝmɑ-ɩ tɔ, nɑ ɩ́ lɔ mǝ kʋɣʋ tɔm.
11Hɑlǝnɑ ɩ́ tɔ-m sɩ mɑ́ polo nɑ mɑ́ tɛɛ sɑmɑɑ kɛ nɔɣɔ nɑ pɑ́ tɔɣɔ tɛtʋ nti ɩ kɑ heelɑ pɑ cɑɑnɑɑ nɑ tuunɑʋ sɩ ɩ kɑ́ hɑ-wɛ tɔ.
12Ɩsɛɣɛlɩ nyǝ́mɑ mɛ, mpi Tɑcɑɑ cɑɑkɩ tɔɣɔlɛ sɩ ɩ́ nyɑnɑ-ɩ nɑ ɩ́ tǝŋ ɩ mpɑɑŋ tǝnɑ tɑɑ kɛ́ teitei nɑ ɩ́ sɔɔlɩ-ɩ nɑ ɩ́ lɑpɩ-ɩ tǝmlɛ nɑ mǝ lotu tǝnɑ nɑ mǝ lǝsɑɣɑ tǝnɑ.
13Tɑcɑɑ cɑɑ kɛ́ sɩ ɩ́ tɔ́kɩ ɩ kʋsǝsɩɩtʋ nɑ ɩ kiiŋ wei mɑ hʋlɑ-mɛɣɛ sɑŋɑ ɩsǝntɔ tɔ. Nɑ pǝ́ yele nɑ ɩ́ cɑɣɑnɑ mǝ tɩ tǝpɛlɛkɛtɛɛ.
14Ɩnɩ ɩ tǝnnɑ ɩsɔtɔnǝŋ ɩnɩ ɩ tǝnɑ, nɑ tɛtʋ nɑ pǝ tǝnɑ mpi pǝ wɛ tǝ tɑɑ tɔ.
15Pǝ́cɔ́ mǝ cɑɑnɑɑ tike kɛ Tɑcɑɑ luɣu sʋʋwɑ. Pǝ wɑɑlɩ kɛ́ pɑ piyɑ mɛ, ɩlɛnɑ ɩ́ lǝsɩ-mɛɣɛ piitimnɑɑ tǝnɑ tɑɑ, ɩsɩɩ ɩ́ nɑɑkʋɣʋ sɑŋɑ ɩsǝntɔ tɔ.
16Mpʋ tɔ, ɩ́ lɑɣɑsɩ hɑtoo mǝ nyɑmɑ tɑɑ tǝkpɑtɑɑ, ɩ́ tɑɑ tɑsɑ lɑŋkpɩɩsǝŋ.
17Mpi tɔ, Tɑcɑɑ kɛlɛ sɔsɑɑ tɑɑ sɔsɔ, nɑ ɩ tike ntɛ́ Ɩsɔ. Ɩ kɛ́ toŋtʋ wei pɑ nyɔkǝɣɩ tɔɣɔ. Ɩɩ fɑɣɑsǝɣɩ yǝlɑɑ. Pǝyele ɩ pɑɑ fɛɩnɑ kʋhɑʋ ɩsɩɩ yʋlʋ nɑ pǝ́cɔ́ ɩ hɑ tɑmpɑnɑ.
18Ɩnɩ ɩ tɑɣɑnǝɣǝnɑ sulɑʋ nɑ leelu pɑ tɔm. Pǝyele ɩ sɔɔlɑ mʋʋlʋ kɛ́ nɑ ɩ́ cɑlǝɣɩ-ɩ nɑ ɩ́ suuki-ɩ wontu.

19Pǝ tɔɔ kɛ́ pǝ wɛɛ sɩ mɛ tɔtɔ mɩ́ɩ́ sɔɔlɩ mʋʋlɑɑ. Mpi tɔ, mǝ mɑɣɑmɑɣɑ ɩ́ kɑ kɛ́ mʋʋlɑɑ kɛ Icipiti tɛtʋ tɑɑ kɛ́.
20Tɑcɑɑ mǝ Ɩsɔ kɛ́ ɩ́ kɑ́ nyɑnɑ, nɑ ɩ tike kɛ ɩ́ kɑ́ sɛɛ nɑ mǝ lǝsɑɣɑ sʋʋ-ɩ, nɑ ɩ́ sɩɩkɩ mǝ nɔɔsɩ nɑ ɩ hǝtɛ.
21Ɩ tike ntɛ́ mǝ Ɩsɔ, ɩnǝɣɩ ɩ́ kɑ́ sɑŋ. Pǝ́cɔ́ ɩnɩ ɩ lɑpǝnɑ-mɛɣɛ tǝmɑ sɔsɔɔnɑ sɔɣɔntʋ nyǝnɑ wenɑ ɩ nɑnɑ mǝ ɩsǝpee tɔ.
22Mǝ cɔsɔnɑɑ tiiwɑ Icipiti tɔ pɑ wɛ yʋlʋnyɔɔŋ nɩɩtoso nɑ nɑɑnʋwɑ tike kɛ́. Amɑ Tɑcɑɑ lɑpɑ nɑ ɩ́ huki.