1“Iwe, ewe Samol mi Lapalap ämi we Kot epwe emwenikemiilong lon ewe fanü oukärän tolong lon pwe oupwe fanüeni, epwe pwal asüela chomong mwü me mwemi: ekewe chon Hit, chon Kirkas, chon Amor, chon Kanaan, chon Peris, chon Hiw me chon Jepus, ir ekewe fisu mwü mi watte o pöchökül senikemi.
2Iwe, lupwen ewe Samol mi Lapalap ämi we Kot epwe atolongeer lepöümi, nge ämi oua akufuur, oupwe fokun aroserela meinisin. Ousap föri eu pwon ngeniir, ousap pwal ümöümöch ngeniir.
3Iwe, ousap pwüpwülü ngeniir, ousap pwal apwüpwülüa nöümi föpwül ngeni nöür mwän, ika nöümi mwän ngeni nöür föpwül.
4Pun repwe atoka nöümi seni ewe Samol mi Lapalap pwe repwe fel ngeni pwal ekoch kot. Mürin, ewe Samol mi Lapalap epwe song ngenikemi o müttir arosakemiila.
5Nge iei usun mine oupwe föri ngeniir: Oupwe amökätiu ar kewe rongen asor o atatakisi ar kewe ür mi pin, oupwe pwal pöküetiu ar kewe uluulun ewe anüfefin Asera o kenala ar kewe uluulun anümwäl mi fal.
6Pun ämi eu mwichen aramas mi pin fän iten ewe Samol mi Lapalap ämi we Kot. A afilikemi seni lein ekewe aramas meinisin mi nom won fanüfan, pwe epwe nöünikemi.
7Ewe Samol mi Lapalap esap tongeekemi o afilikemi pokiten oua chomong seni ekewe ekoch mwichen aramas, pun oua chokisikis seni ekewe mwichen aramas meinisin.
8Nge ei a fis pokiten ewe Samol mi Lapalap a tongeekemi o amwöchü an pwon a pwon fän akapel ngeni ämi kewe lewo. Iei mine ewe Samol mi Lapalap a emwenikemiiwu ren pöün mi manaman o angasakemi seni ewe leni ia ra nöünikemi amanau ie, seni fän nemenien Farao ewe kingen Isip.
9Iei mine oupwe silei pwe ewe Samol mi Lapalap ämi we Kot a wesewesen Kot, eman Kot mi allükülük, a tümwünü an pwon o pwärätä an tong ngeni ngeröün täppin aramas mi echeni o aleasochisi an allük kana.
10Nge chokewe mi oputa i epwe nirela. Pun esap mang le awena ngeni ätewe a oputa i liwinin an föför.
11Iei mine oupwe tümwünüöchü le apwönüetä ekewe allük me pwüüng üa ngenikemi ikenai.”
12“Iwe, are oupwe aüselinga ekei allük, are oupwe tümwünüöchü le apwönüretä, mürin ewe Samol mi Lapalap ämi we Kot epwe pwal apwönüetä an we pwon o pwäri an tong ngenikemi, usun a fen pwon fän akapel ngeni ämi kewe lewo.
13Iwe, Kot epwe tongekemi, epwe afeiöchükemi o achomongakemi pwe epwe wor chomong mwirimwirimi. Epwe pwal afeiöchü uän fotämi irä, fotämi wiich, fotämi irän wain me irä olif. Epwe pwal achomongala nöümi pwiin kow me apanen nöümi pwiin sip me lon ewe fanü Kot a fen pwon fän akapel ngeni ämi kewe lewo pwe epwe ngenikemi.
14Oupwe feiöch mwen aramas meinisin won fanüfan. Esap wor eman mwän me leimi epwe ingau chan, esap pwal wor eman fefin epwe rit, esap pwal wor nöümi man me lein nöümi pwiin kow epwe fokun.
15Iwe, ewe Samol mi Lapalap epwe epeti senikemi samau meinisin. Ekewe samaungau oua sileer me lon Isip resap ariaföüükemi. Nge Kot epwe anomuur won chokewe meinisin mi oputakemi.
16Iwe, oupwe arosala ekewe aramas meinisin ewe Samol mi Lapalap ämi we Kot epwe atolongeer fän nemeniemi. Ousap tongeer, ousap pwal fel ngeni ar kewe kot, pun ei epwe eu lenien likatup ngenikemi.
17Iwe, are oupwe ekieki lon lelukemi: Ekei mwü ra watte senikem. Ifa usun, äm aipwe tongeni asürela seni fanüer?
18Ousap niuokusitiir, nge oupwe chök chechemeni mine ewe Samol mi Lapalap ämi we Kot a föri ngeni Farao pwal ngeni chon Isip meinisin.
19Oupwe chechemeni ekewe feiengau mi watte oua küna ren mesemi, ekewe asisil me manaman, pwal än ewe Samol mi Lapalap emwenikemiiwu ren pöün mi manaman o aköüpöü. Ewe Samol mi Lapalap ämi we Kot epwe föri ngeni ekewe aramas meinisin oua niuokusitiir usun mine a fen föri ngeni chon Isip.
20Iwe, ewe Samol mi Lapalap epwe pwal tinato feiengau lefiler, tori chokewe mi chüen manau o op me mwemi repwe rosola.
21Ousap fokun niuokusitiir, pun ewe Samol mi Lapalap ämi we Kot a nom remi, i eman Kot mi lapalap o eniwokus.
22Iwe, ewe Samol mi Lapalap ämi we Kot epwe asüela chon ekewe mwü me mwemi ekis me ekis. Ousap tongeni aroserela fän eu chök, pwe ekewe manmwacho resap chomongola o afeiengauakemi.
23Ewe Samol mi Lapalap ämi we Kot epwe atolonga chon oputemi fän nemeniemi, epwe pwal efisätä fitikoko watte lefiler tori ra rosola.
24Epwe pwal atolonga ar kewe king fän nemeniemi, nge ämi oupwe nirela pwe esap wor eman epwe chüen chechemeniir. Esap wor eman aramas epwe tongeni ü ngenikemi tori oupwe aroserela meinisin.
25Oupwe kenala ar kewe uluulun kot mi fal. Ousap mochenia ngeni ewe silifer me kolt mi nom wor, ousap pwal angei och fän itemi, pwe ousap tup ren. Pun ekei mettoch ra anioput me ren ewe Samol mi Lapalap ämi we Kot.
26Ousap uwalong lon imwemi uluulun anümwäl mi anioput, pwe ousap anümamau rer. Nge oupwe oput o cheang ngeni, pun ei sokun mettoch a anümamau me ren ewe Samol mi Lapalap.”
