1Zama vura pule se Zihova. “Hie sa Qua nabulu, sapu Arau toka nia, na Qua vinizatana sapu qetu nia Rau; kote vekoa Rau sa Maqomaqoqu koa Sa meke Asa kote va vura ia sa vinilasa toṉotona koari doduru butubutu.
2Lopu kote kukili si Asa babe velavela vura, babe va sage ia mamalaiṉina koari na siraṉa.
3Na kuli sapu ta sirana ba lopu kote moku ia sa, na zuke matamata purina, ba lopu kote va mate ia sa. Kote va gorevura ia sa sa vinilasa toṉotona doduru totoso;
4lopu kaqu mala si Asa babe ta dokoe, osolae va turu ia Sa sa tinoṉoto pa popoa pepeso. Pa korapa Nana tinarae si kote vekoa ri na nunusa sa dia rinaṉeraṉe.”
5Hie si zama nia sa Tamasa se Zihova, Asa pu tavetena sa maṉauru meke repaha vura nia, Asa pu va podakia sa popoa pepeso meke doduru pu vura koasa, pu poni ni sa siniṉo koari na tiena, meke sa tinoa koa rini pu ene vasina:
6“Arau se Zihova, si tioko Igo pa Qua tinoṉoto; Arau kote tuqea sa limamu Agoi. Arau kote kopu nigo meke evaṉa Nigo na vinariva egoi koari na tie meke na zuke koari na tie Zenitailo,
7pude tukeli matadi sarini pu behu, pude rupahi saripu ta pusi pa vetu vari pusi meke pude va vurai pa tinapusi sarini pu habotu pa hupohuporona.
8Arau se Zihova; asa sa Pozaqu! Lopu kote vala nia Rau sa Qua vina lavata pa keke tie pule babe Qua vinahesi koari na beku.
9Doṉo la, doduru pu koroto ni Rau si gorevura beto, meke vaquradi si kote tozi vurani pule Rau; sipu lopu ele evaṉa rini si Maqu zama atuni koa gamu.”
10Mi kera la nia koe Zihova si keke kinera vaqura; mi kera vahesia, gamu doduru pa popoa pepeso, gamu pu tepe pa lamana, meke doduru pa korapa kolo, gamu na nunusa, meke doduru pu koa i.
11Madi kera va ululae sa qega meke sari nana vasileana nomadi, madi qetu sari popoa pa Kedara. Sari tie pa Sela si madi kera qetuqetu; madi kukili koari na batu toqere.
12Madi va lavatia se Zihova madi tozi vura nia sa Nana vinahesi koari na nunusa.
13Se Zihova si kote ene mataqara vura guana keke tie ṉiṉirana; guana varane sapu hiva hola pude la pa vinaripera; kote iraṉa si Asa meke topue la varipera meke la va kilasi sari Nana kana.
14“Seunae hola si koa lopu kulu si Rau, tuqe pule nau mo si Rau meke noso Qua mo. Ba kamahire, guana barikaleqe nama podopodo. Kote kabo vura si Rau, siṉo kukuru, meke ṉaṉaha
15totoso huara goreni Rau sari na toqere meke na toa meke va popai sari na duduli na hudahuda; sari ovuku si kote va popai Rau, meke va popai sari na kopi.
16Kote turaṉi Rau sari na behu koari na siraṉa sapu lopu ele enei rini, koari na vasidi sapu lopu ta gilanadi kote kalaha lani Rau; sa huporo si kote va kalalasia Rau pa kenudia meke va memehi sari vasidi sapu lolora. Arini sari tiṉitoṉa sapu kote taveti Rau; na lopu kaqu veko pani Rau si arini.
17Ba arini pu raṉei sari na beku, meke zama, ‘Gamu sari mami tamasa,’ gua, si kote tava kekere pule pa kinurekure lavata.”
18“Va avoso, gamu na tie nuli! Doṉo, gamu na behu, mamu dodogorae!
19Esei si behu, ba sari Qua nabulu mo, meke esei si nuli gua ari na tie paleke inavoso sapu garuni Arau? Esei si behu gua asa pu soto va nabu pa vinariva egoi koa Rau, behu gua sa nabulu te Zihova?
20Gamu ele dogori soku hola ginugua, ba lopu hite gilania gua sapu korapa ta evaṉa; taliṉa mia si tukele, ba lopu hite avosia ke toṉa.”
21Qetu se Zihova pa laena sa Nana tinoṉoto pude va lavatia meke va arilaena ia sa Nana Tinarae.
22Ba sari Nana tinoni Izireli hire si ta hiko meke ta vagi palae dia likakalae, doduru si ta kolo vagi meke ta veko pa pou babe ta tome la pa vetu varipusi. Ele guana likakalae ta vagi palaedi, sapu loke tie kote la saputu vagi puleni; ele ta hiko vagi, sapu loke tie pude zama, “Garunu puleni,” gua.
23Esei koa gamu kote va avoso mae ia si hie babe kopu totoko nia koari na totoso pu korapa mae?
24Esei si vari poni nia se Zekopi pude ta hiko, meke se Izireli pude ta vagi palae? Vea lopu e Zihova tu Sia, sapu koa Sa si tavete va sea la si gita? Ura lopu hiva luli rini sari Nana vina tumatumae; lopu va tabei rini sari Nana tinarae.
25Ke va nonoga nia Sa koa rini sa Nana tinaṉaziri maṉinina; sapu sa tinasigiti tanisa vinaripera nomadi. Tava mate si arini pa Nana binugoro guana ta voi pa nika ba lopu boka gilae; ta sulu palae pa nika ba lopu va nonoga ia rini sa dia tinasuna sapu maena koe Tamasa koa gua koari na dia sinea.
