Text copied!
CopyCompare
Habo nalolene bi gahenge lo winigo ogo - Aisaia

Aisaia 42

Help us?
Click on verse(s) to share them!
1Anduane Homogohanda lalu, Agali ogo i̱naga biabe biahaga mbira o kagoni. Horo bibahendengi i̱na ibu mo hongo haabo haruli. I̱na ibu dabo helenego bibahendengi ibuhondo turu haabo haruli. Ibuha i̱naga Dinini hela kogome ibugua dindi tara tarani hameigini bibahende karuha mana tigabi ngaru hangu mo yalu anda ibulebira.
2Ibugua bi dalimu lalu hongo howa nalolebira. Hariga teneni howa wali agalirume hendelonaga bi lalu naholebira.
3Gambe mbira podabehe ema bialu duru lalu kago podope naholebira. Ira hale mbira hundibehe auhe dalu kago bahundiaore naholebira. Ibugua mana tigabi bulene ngaru wiaabo helo mo hongo holebira.
4Ibugua genda yulene elahe kagola gendarume ibu bope naholebira. Ibugua dindi bibahendeha mana tigabi bayale hangu bulene hongoheoreme bolangua hai helonaga mo bia holebira. Wali agali bibahende dindi kaundiaha karume ibugua bi mana bayale ogoni lawai helonaga malia howa hondo ka, lene.
5Anduane Homogo Ngode Datagaliwabehanda hari daliga wabuwa yangalalu heleda. Ani helowa ibugua dindi wabialu dindini datani irabi bibahende andahai ho helo helene. Ibugua dindini wali agalirubi ema bialu pelonaga holene gahenge buhe̱ lolene pula anda hene. Anduane Homogo Ngode Datagaliwabe ibugua ibunaga biabe biahaga agali biagohondo lalu,
6Anduane Homogo i̱nime i̱naga mana tigabi ngaru mo walia habelonaga í̠ olalu hongo karulape ngirugoni. Ai i̱na í̠ baya hangu kaware handayaho howa mamage holebero. Wali agali dindi bibahendeni karu baba habo nalolene bi í̠ togoni howa lo wulebero. I̱na wali agali bibahendenaga wá hagane haleore í̠ helolebero.
7Agali de kohe karu lone de hendelo mo dengala holebere. Agali garabaya anda arumaha karu golope halu tagira pudaba lolebere.
8I̱ hangu Anduane Homogo tínaga Ngode Datagaliwabe kogoni. Tígua i̱naga mini hangu yaraga halu holene nga. Agalime mbirale tini gime wabini ngarunaga mini yaraga holene nawi larogo irane i̱naga wá holene mini yaraga holenebi mendeali heba tale nabulebero.
9I̱na abale mbira ibulebira lalu mbiwia harugoni áyu tagira ibiragonigo de handadaba. Áyu i̱na bi maru gahenge mani ibulebirago naibi ngatagi mbiwia halu lo ngelaro, Anduane Homogohanda laya, lalu Aisaiahanda lene.
10Anduane Homogohondo iba gana gahenge lalimu. Wali agali dindi bibahendeha kamiru-o tígua ibunaga mini yaraga halu iba gana lalimu. Wali agali iba solowarani pialu hagarubi ema bialu piaga ale ibaha biraga bedamirubi dindi tara kaundiaha kamirubi tí bibahendeme Anduane Homogonaga mini yaraga halu iba gana lalimu.
11Wali agali dindi ko lebolahe ngagoha karubi dindi ogoninaga tano ngaruha karubi Ngode Datagaliwabenaga mini yaraga helo. Keda dindi hameigini karume ibunaga mini yaraga hai helo. Sela tanoni wali agali karu tigua hari nene ngarunaga irigiho howa turu halu ga̱ lalu helo hame ledo.
12Wali agali dindi kaundiaha karubi ti bibahendeme Anduane Homogo ibu mini lene kagonaga mini yaraga halu helo.
13Anduane Homogo ibu wai biaga ami agali kago ale howa áyu ibu wai bule tagira poragoni. Ibu amirume wai bule manda manda bialu howa biagadagua bialu wai hoaro lalu hongo howa ladagadaga bialu ka. Ibugua waitigi biaru baba wai birangi ibunaga hongo walia howa ti bope halu ibuni wayali haga.
14Anduane Homogohanda lalu, Luore i̱na bi mbira nale hendore haabo ho harugoni. I̱naga miniha tandaga ibiyago mo pehaga bialu mbirale mbira biatagi nahe haru. Ani birugoyu ai walime gali taba hanalu howa ya yi lalu ga̱ lalu hagadagua bialu kogoni. Ai ha̱ledagola buhe̱ hongo howa ala laga bialu kogoni.
15I̱na hari timbunibi emene barebarebi karuni bo podope hai halu datanibi irabu karubi gabu hai helolebero. Iba timbuni porarubi mo hundia hai halu dindi ko wali agali nahaga helolebero. Iba kuyama timbuni bedarubi bibahende hundu tegelowa helolebero.
16Wali agali de kohe karu i̱na haru halu hariga ala ti napene ngagoria haru polebero. I̱na ti hariga manda nabinini haru holebero. Ti de kohe howa arumaha haradagua bidago i̱na aruma holene ogoni mo wá holene helolebero. Dindi ko ngaru i̱naga wali agaliru ogoriani pelo i̱na bamba halu mo tiga bulebero. Ogodagua bule laroruni bibahende biaiore holebero. Uruni mbirago embeda halu yu wa naholeberoore.
17Wali agali maru gime wabini ngaruhondo inanaga anduane uruni ka lalu bi pupu wiaga karu ti bibahende i̱na bo batagi hai harogola ti taga timbuniore holebira, lalu Anduane Homogo ibugua lene.
18Anduane Homogohanda lalu, Isaraele wali agali hale tuluhe kamiru bi hale hadaba. De kohe kamiru de ngala halu bayuwa de handadaba.

19I̱naga biabe biahaga harimigo tí de kohe maru karubi ndo tí de nahandabeheore kami. I̱na tí i̱naga bi yalu pilimulo dabo helarugo ai tíore wali agali hale tuluhe maru karubi ndo tí hale paiore kamigo hendedogo.
20Tígua tara tara dewaore de handaramiligo hondowa ema nabi donge harimigoni. Bi dewaore hale haramiligo howa tígua mbira bayuwa hale ha nabi kamigoni, lalu laya.
21Anduane Homogohanda tíhondo mbirale bayale tigabi ngaru dege bialu hayago howa ibunaga bi mana lo wiaru tíhondo ngiya. Irane wali agali maru karume mana ogoni hondowa bayale tigabioreda lelonaga ngiyagoni.
22Ai áyu Isaraele tí koore kami. Tínaga waitigirume ibuwa tí bo wahalu tínaga dabudabu wimiru kayu bu yalu piai haya. Tínibi minu yalu puwa garabaya andaha dindi gundu uli tombo wiaruhabi minu bape howa panga payaanda haya. Mbiralime ti biamogo bialu wai buwa ti gingilo mialu haru dai bulene mbira naheya.
23Anigo tí kamiru aria i̱na bi larogo hale habehe mbirali ai kamibe. Áyu ogoni howa tígua i̱naga bi ogo baya hangu hale holeberemibe.
24Waitigirume Isaraele wali agali tí mo ko ho balu dabudabu wimiru mo yalu pelo aiwa bia layagola biyabe. O biyaruni Anduane Homogohanda mo bia hene ndoyabe. Ani biyagoni irane iname ibu erembira mialu mana ko wiaru bialu harimagonaga biya. Iname ibunaga mana wiaru mo wahalu ibugua mana tigabi bialu holoma̱ya hameleadagua ndo mana ko wiaru hangu bialu harimagoni.
25Anidagua birimagonaga ibunaga miniha keba halu tandaga ho kago ina manda buluma̱yanaga ibugua inanaga waitigi urunime ina bo wahole ibilayagoni. Ibunaga keba holene ira hungu ale deagome ina Isaraele wali agali dai helaya. Anidagua biyago bilowa iname irane ogo ale biyadalo manda bialu mini beregeda nabi dege kamagonida, lalu Aisaiahanda lene.