1Wal YAWEI det trubala God bin kipgon tok, “Wal iya na det wekinmen blanga main. Aibin meigim im brabli strongbala. Oni im na aibin pikimat, en mi brabli gudbinji langa im. Aibin gibit im main spirit, en im garra gibit feyago langa ebribodi langa ebri kantri.
2Im garra tok gudbalawei langa pipul, en nomo jingat adbala langa olabat.
3Im garra jidan kain langa detlot wikwan en powan pipul, en nomo binijimap olabat. Im garra gibit feyago langa ebribodi.
4Im kaan neba stap dumbat im wek raidap det raitwei en trubalawei blanga im jidan ebriweya langa dijan wel, en ola pipul langa najalot kantri wandi sabi wanim im titjimbat.
5“Wal mi na YAWEI bin meigim ebrijing langa top, jis laiga tent. Mi na bin meigim dijan graun en ebrijing weya gro langa dijan graun. En mi na gibitbat laif langa ebrijing weya jidan langa dijan graun. Wal yu lafta lisin wanim ai garra tok na.
6Aibin pikimat yu blanga gibitbat feyago langa ebribodi, en mi oldei jidan garram yu. Aibin meigim yu, en ai jandim yu blanga gibit lait langa ola pipul langa ebri kantri en blanga gibit main pramis blanga lukaftumbat olabat.
7Yu garra meigim detlot blainwan pipul luk igin en yu garra larramgo ola prisana fri.
8Main neim im YAWEI. Ai kaan neba larram eni drimin sheip, o enibodi sherimbat main brabli gudbala neim en det preis ola pipul gibitbat mi.
9Ebrijing weya aibin tok garra hepin basdam bin kaman trubala. Wal ai garra dalim yu wanim garra hepin bambai.” Lagijat na YAWEI bin tok.
10Ebribodi langa dijan wel sing nyubala song langa YAWEI. Preisim YAWEI yumob hu go garram bout langa solwoda. Preisim YAWEI yumob hu jidan longwei langa najalot kantri.
11Preisim YAWEI ol yumob pipul hu jidan langa deset kantri. Yumob hu jidan langa hil kantri jingat gudbinjiwei en sing blanga preisim im.
12Ebribodi brom ebriweya tok en preisim im.
13YAWEI im wokwokbat wulijim wailwan solja. Im brabli strongwan. Im jinginatbat adbala, en im garra fait langa im enamimob en bidim olabat.
14YAWEI im tok, “Brom longtaim ai nomo bin gitwail. Bat ai garra gitwail en jinginat nomo lilbit na, jis laik det wuman wen im redi blanga abum im beibi.
15Ai garra binijimap ola hil. Ai garra draiyimap ola plent en tri weya grogrobat, en ai garra meigim ola riba en bilibong jidan brabli draiwan.
16“Main blainwan pipul olabat wokwok langa dakbala en rafwan roud. Bat ai garra lidimbat olabat langa nyuwan roud. Olabat nomo sabi det roud. Ai garra shainim lait langa det roud, en ai garra meigim det roud gudwan wulijim olabat kaan buldan. Dijan na main strongbala pramis. Trubala ai garra dum.
17Detlot pipul hu weshipbat detlot drimin sheip, en reken olabat jidan drimin blanga olabat, ai garra meigim olabat jidan brabli sheimwan.”
18Wal YAWEI bin tok, “Ol yumob pipul, yumob brabli defwan en blainwan, bat yumob garra lisin langa mi, en yumob garra luk langa mi.
19Nomo enibodi jidan blainwan o defwan laik main ronwan mesinja olabat, detlot wekinmen blanga mi.
20Olabat oldei luk en irrim brabli gudbalawei, bat olabat nomo teiknodis.” Lagijat na YAWEI bin tok.
21Wal YAWEI oldei dum ebrijing gudbalawei, en im wandim im lowa blanga jidan brabli gudwan blanga ola pipul.
22Bat blanga im pipul olabat, deibin git trep en jidan prisana, en olabat nomo bin abum enibodi blanga album olabat. Najalot bin gajimbat olabat ebrijing, en nobodi nomo bin wandim gibitbek olabat enijing na.
23Wotfo im pipul olabat nomo teiknodis?
24Ola Isreil pipul bin oldei dumbat nogudbala ting en nomo bin laigim dum wanim YAWEI bin oldei wandim olabat blanga dum, en nomo bin bulurrum im wed. Wal blanga tharran na YAWEI bin larram najalot pipul stilimbat ola ebrijing blanga olabat.
25En imbin brabli wail, en imbin jandim wo langa olabat kantri en binijimap ebrijing garram faiya. Bat stil olabat nomo bin teiknodis. Olabat nomo bin wori wen det faiya bin barnbarn olaran langa olabat.
