1Yinni Gusunɔ u nɛɛ, nɛn sɔm kowo wee, wi nɑ ɡɔsɑ. Wiyɑ nɑ kɑ wɑ̃ɑ, nɑ mɑɑ nùn kĩ. Nɑ nɛn Hunde doke wi sɔɔ. U koo ɡem ɡɑri kpɑrɑ tɔmbu sɔɔ.
2U ǹ nɔɔɡiru suɑmɔ u sere ɡbɑ̃rɑ kɑ dɑm, kpɑ bu win nɔɔ nɔ swɛɛ sɔɔ.
3U ǹ koo tɔn be bɑ sunkure nɡe kɑbɑ dɑkurɑ. Mɛyɑ u ǹ mɑɑ bu ɡoomɔ, bɑɑ bɑ̀ n sɑ̃ɑ nɡe fitilɑ ɡe ɡɑ ɡɔɔ dɔɔ. U koo ɡem kpɑrɑwɑ nɡe mɛ n sɑ̃ɑ.
4U ǹ mwiɑ kpɑnɑmɔ. U ǹ mɑɑ wɑsirɑmɔ sere u kɑ de ɡem mu n wɑ̃ɑ hɑnduniɑ kpuro sɔɔ, kpɑ tɔn be bɑ wɑ̃ɑ sere mi n tomɑ bɑ n win woodɑbɑ nɑɑnɛ sɑ̃ɑ.
5Yinni Gusunɔ wi u wɔllu kuɑ u tɛriɑ, mɑ u tem kuɑ kɑ ye yɑ kpiɑ mɛ sɔɔ, mɑ u derɑ tɔmbu kɑ sere hunde koni be bɑ wɑ̃ɑ tem sɔɔ bɑ wɛ̃siɑmɔ, wiyɑ u win sɔm kowo sɔ̃ɔwɑ u nɛɛ,
6nɛnɑ nɑ nun sokɑ n kɑ nun fɑɑbɑ ko. Kon nun dɑm kɛ̃, nɑ n wunɛn nɔmɑ nɛni. Kon nun kɔ̃su, kpɑ n kɑ tɔmbu ɑrukɑwɑni bɔke sɑɑ wunɛn min di, kpɑ bwesenu kpuro nu kɑ yɑm bururɑm wɑ.
7Kɑɑ wɔ̃kobu nɔni wukiɑ, kpɑ ɑ be bɑ sɔ̃ yɑm wɔ̃kuru sɔɔ pirisɔm dirɔ yɑrɑ.
8Nɛnɑ Gusunɔ wi u rɑ n wɑ̃ɑ. Nɛn yĩsirɑ mi. Nɑ ǹ nɛn yiiko bũu ɡoo wɛ̃ɛmɔ. Mɛyɑ nɑ ǹ mɑɑ nɛn bɛɛrɛ bwɑ̃ɑrokunu wɛ̃ɛmɔ.
9Wee, ye nɑ ɡbiɑ nɑ ɡeruɑ, yɑ koorɑ. Tɛ̃, nɑ bɛɛ ɡɑ̃ɑ kpɑɑnu nɔɔsiɑmɔ nu sere koorɑ.
10I Yinni Gusunɔ wom kpɔɔ kuo. I nùn siɑro hɑnduniɑn ɡoonu nnɛ ye sɔɔ. Hunde koni be bɑ wɑ̃ɑ nim wɔ̃ku sɔɔ, kɑ bɛɛ be i sĩimɔ ɡen wɔllɔ, kɑ sere be bɑ wɑ̃ɑ n tomɑ, i Yinni Gusunɔ siɑro.
11Bɛɛ be i wɑ̃ɑ ɡbɑburu kɑ ten ɡberu kpɑɑnɛbɑ sɔɔ kpuro, i nɔɔɡiru suo i Gusunɔ siɑrɑ. Bɛɛ Kedɑɑn bweseru, i ku nɔɔ mɑri, i Gusunɔ siɑro. Bɛɛ bèn wuu ɡɑ sɔ̃ kperu wɔllɔ, i kuuki koowo ɡuunu wɔllun di kɑ nuku dobu.
12Bɛɛ be i wɑ̃ɑ n tomɑ, i Gusunɔ bɛɛrɛ wɛ̃ɛyɔ, kpɑ i nùn tɔmɑ.
13Yinni Gusunɔ u susimɔ u wee nɡe tɑbu kowo. U tɑbun ɡɑri wɔrɑ nɡe tɑbu durɔ, mɑ u nɔɔɡiru sue u kuuki mɔ̀, u win yibɛrɛbɑ dɑm sɔ̃ɔsimɔ.
14Yinni Gusunɔ u nɛɛ, wee nɑ nɔɔ mɑri nɑ tii nɛnuɑ n kɑ tɛ. Adɑmɑ tɛ̃, kon nɔɔɡiru suɑ nɡe tɔn kurɔ wi u yiire u kĩ u mɑ, mɑ u wɑsire u wom ɡɑbɑmɔ.
15Kon ɡuunu kɑ ɡunɡunu kɔsuku, kpɑ n ye yɑ kpiɑ ɡberɑsiɑ. Kon dɑɑnun nim kpeerɑsiɑ nu ɡberɑ woko woko, kpɑ n de yɛrusun nim mu ɡberɑ mɑm mɑm.
16Kon wɔ̃kobu sĩisiɑ swɑɑ ye bɑ ǹ yɛ̃ sɔɔ, kpɑ n de yɑm wɔ̃kuru tu ɡɔsiɑ yɑm bururɑm ben wuswɑɑɔ. Kon de swɛɛ yi yi ǹ dɑɑ nɔɔ nɛ yi nɔɔ nɛrɑ yi ko mɑrɑ mɑrɑ. Nɑ ǹ kon ko nɑ kun yenibɑ kpuro kue.
17Adɑmɑ be bɑ bũnu nɑɑnɛ sɑ̃ɑ bɑ nu sɑ̃ɑmɔ, bɑ koo biruku yirɑ wurɑ kɑ seku bɑkɑru.
18Yinni Gusunɔ u nɛɛ, bɛɛ Isirelibɑ, bɛɛ be i sɑ̃ɑ nɡe sosobu, i swɑɑ dɑkio. Bɛɛ be i sɑ̃ɑ nɡe wɔ̃kobu, i de i yɑm mɛɛri kpɑ i wɑ.
19Wɑrɑ u sɑ̃ɑ wɔ̃ko nɡe nɛn sɔm kowo. Wɑrɑ u sɑ̃ɑ soso mɑ n kun mɔ nɛn sɔmɔ wi nɑ ɡɔrɑ. Wɑrɑ u sɑ̃ɑ wɔ̃ko nɡe nɛn bɔrɔ. Wɑrɑ u sɑ̃ɑ wɔ̃ko nɡe nɛn sɔm kowo.
20Wee, u ɡɑ̃ɑ dɑbinu wɑ, ɑdɑmɑ u ǹ nu ɡɑrisi ɡɑ̃ɑnu. U swɑsu wukie, ɑdɑmɑ u ǹ ɡɑri nɔɔmɔ.
21Yinni Gusunɔ u woodɑ bɑkɑ ɡeɑ yɑrɑ win tɔmbun ɑrufɑɑnin sɔ̃.
22Adɑmɑ yibɛrɛbɑ bɑ ben yɑ̃nu ɡurɑ kpuro, mɑ bɑ ben tii mwɛɛrɑ bɑ kpɛ̃ɛ kpee bɑɑbɑ sɔɔ. Bɑ bu beruɑ sere pirisɔm dirɔ. Bɑ bu wɔri bɑ yɑ̃nu ɡurɑ. Goo sɑri wi u koo bu yɑkiɑ, kpɑ bu yibɛrɛ be sɔ̃ bu yɑ̃ɑ ni wesio.
23Mɑ Esɑi u nɛɛ, wɑrɑ u koo yeni swɑɑ dɑki bɛɛ sɔɔ. Wɑrɑ u koo yɔ̃rɑ u ye swɑɑ ɡɑ̃ri sɑɑ tɛ̃n di.
24Wɑrɑ u derɑ bɑ Isireli be bɑ sɑ̃ɑ Yɑkɔbun bweseru wɔri bɑ ben yɑ̃nu ɡurɑ. N ǹ Yinni Gusunɔn tii ro? Bɛsɛ Isirelibɑ sɑ durum kuɑ win wuswɑɑɔ. Sɑ yinɑ su win woodɑbɑ swĩi, su ye mɛm nɔɔwɑ.
25Yen sɔ̃nɑ u kɑ sun mɔru bɑrɑ too. U derɑ bɑ sun tɑbu wɔri kɑ dɑm. Tɑbu sun sikerenɛ nɡe dɔ̃ɔ. Bu sun di, ɑdɑmɑ sɑ ǹ tubɑ. Sɑ ǹ mɑm lɑɑkɑri kue.
