Jop 24

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Tama Jop agai po genina ma weyu, e tama wali, “Magi baso God Tigidali Bomo Elalubo Bidigo dwai bidi dabe po tų yabo bodolu mube yaliwe? Tama magi baso te we bidigo God wali pelama, te tobage po tų yabo sogo olo dali magi baso tonalubowe?

²Te dwai kolesaga ebo bidi dabe augwaligo gasa bidi dabego tǫ wi sainu yali. Tama tiyu yaide, augwali tǫ dąį ibanu pogolobo dao. Tama te bidi dabego homugo tiaibao, te augwa tǫ da homu yaibao. Tama augwaligo mena sipsip kibu wi selama, augwa sipsip dali gea paligi pali.

³Te bidi dwai dabe augwaligo wilawe we dabego donki kibu wi sabo dao. Tama te we dabe augwaligo sę elama, augwa wai dabe negabo usu ebo menio. Tama te we dabego negeli sainu ebo sogo, te bidi dabe augwa gi sę ebo bulmakau kibu osogo siyu, tonaluyu, te wego te negeli wei ponobo sogoba usu nubo dao.

⁴Tama te dwai bidi dabego te moni nai dabe meni yai bidi dabe wi ilibo dao. Tama augwaligo augwa homugo magi sę me egobeo. Augwali wi elama, te dwai bidi dabe digibulu bidibo dao.

⁵Hobede ya. Te we bidi augwali te wa pai buluba bidigi pomainu ebo dao. Tama augwali te bulu kibu donki ebo gilama nai meni yai bulude augwa wai puluba maiabo nai bomai sę elama, mabo dao.

⁶Augwali gasa bagego tǫba pelama, haniani nai dwai dabe selama, naga asobo dao. Tama dwai sę ebo bidi dabego gide augwa sę bidi dabego te wain nedu du polo toga sai madi, te bage te nai meni yai bidi dabe augwali te giba pelama, te wain du deli deli walalubo dabe augwaligo saibao.

⁷Te hulide augwali olo pilama, tama augwaligo tigi kedau ebo dao. Augwa tigiwali haluama piabo ugwa menio.

⁸Augwali bulu du yai madi bidibadi yaide, tulubage tuluyu, augwali tula pabo dao. Augwa be meniama, tama masigi dologoba geme duala sigi pabo dao, te tulubage tuidali weyu” wali.

⁹“Te dwai bidi dabe augwali te wilawe we dabeba pabo dao, tama augwaligo wai bǫų dabe bomonama eyu sabo dao. Tama augwaligo te wai bǫų dabe augwaligo olo sę ebo bidi gagalobo dao. Tama dwai bidi dabe augwaligo te nai meni yai we bidi dabego wai dabe oda selama, tama tola selama, te we bidi dabego augwa negeli yali wei ponomainu.

¹⁰Tiali goli, te bage te we bidi augwa tigi haluabo ugwa meni. Augwali gasa bidi dabego giba sę igi pelama, te wit nai augwa nai tubo beba sisinigi pabo dao. Tiali goli, augwa mu da tuabo nai meni ebo dao. Tama augwali nasi dwai mu ebo dao.

¹¹Augwali te ni oliv sili tomode sę ela bilama, tama te oliv du te masinigo pęgębo dao, te olivgo wel nigimainu. Tiali goli, augwaligo te oliv wel tubo usubeo. Tama mebago te wain du sągągo gosę genama, tama wain wę sabo sę yai dao. Tiali goli, te sę ebo bage augwa mu te wain wę tugobeo. Tama augwali dogoni aloa sabo dao. Magi baso meni, te page bidigo habu selai dao.

¹²Te moni hanu tomode te we bidi gela mu wabo. Augwali mu dobaso, Godigo augwali tau somainu gela olama, i wabo dao. Tiali goli, Godigo augwaligo gedu haluasa po wabo odobo menio,” wali.

¹³“Bidi mebago Godigo ebo kolesaga godolo ebo meni. Augwali tobolu gagea pelama, tama te dwagi yai kolesaga dali boi bidi homu ebo dao, te dwagi yai ula kolesaga. Augwaligo hulia sai kolesaga naga wali pabo dao. Tama augwali ula yai sunumidu pabo homu ebo menio.

¹⁴Te kigamu hulide mu te giliga pedalisiąbadi, te dwai bidi dabe hogodama, te nai meni yai bidi dabe ela muainu pabo dao. Tama hulide da, augwali nai dabe wi sainu bilibo dao.

¹⁵Ma, te bidigo sai we dabe dali dwai sę ebo bidi dabe da, augwali giliga dega sabo bolo tonalubo dao. Tama augwali te gasa bidigo we dabe dali pigi pabo dao. Augwali pabo sogo da, augwa gesabidi halua selama, pabo dao. Tama augwaligo e tama wabo dao, ‘Ena niwai bidigo sulama, me konegobeo,’ wabo.

¹⁶Te hulide da, te nai wi sabo bidi dabe pelama, bidigo be paiai daga hųginama, tama tomoba nai wi sainu pabo dao. Tiali goli, giligade da, augwa be tomode dualalubo dao. Magi baso meni. Giligade da, augwaligo sogo meni.

¹⁷Te bidi dabe augwali giliga nanobo sogo bilibo wi ebo dao, te bidi meba hulide bilibo wi ebo yali gilama. Tiali goli, huli asobode da, augwali dwagi yai homu ebo dao,” wali.

¹⁸“Dagego te tobage po wali, te dwai kolesaga ebo bidi dabe augwali bobobage sogo bidigobeo. Menio. Polo tama bomai wę aselama, augwali tolasa pali. Tama Godigo po obaso, augwaligo tǫ dolaibao. Tama augwa wain giba sę igi pabo bidi meni yaibao.

¹⁹Te giliga nanobo sogo da, te pǫ dabe tedela pelama, silibo dao. Tama tiwai me, te isali bidigo bulude te dwai we bidi sabo dao, tama augwali sese mu silibo dao.

²⁰Tama augwaligo tigi te dwasianu osogane dabego pusai nai gagabo dao. Tama bidigo augwali kone me egobeo. Tama augwa ida mugo me homu kone me egobeo, mu gegeda paibao. Tama augwaligo dwai kolesaga me sese mu silaibao. Dagego te tiwai po wabo dao,” Jopgo te po wali.

²¹“Tiali goli, eno po da, e tama dao. Te dwai bidi dabego te dwai kolesaga te wai ame nesiąma ebo we dabede ebo dao. Tama augwaligo te wilawe we dabe tau sabo menio.

²²Tiali goli, aga bomogo digi Godigo dwai bidi dabe genuai nogi bobobage sogo bidimainu tau sabo dao. Ma, augwaligo homugo augwali isiba homu ebo si da, Godigo augwali ma hodolama, augwali bugagia ma bidibo dao.

²³Godigo digi augwali bugagia dua bidimainu elama, tama dwai sęgę augwaliba me pedalobo menio. Tiali goli, tigidali sogo agai augwali bugagia tonalubo dao.

²⁴Tama augwali genuai nogi osogo naga elalubo dao. Tama deli sogo tama augwali polo isai, te gasa olo we bidi dabe isibo tiwai gilama. Augwali te wit nai inawai te bidigo togobo tiwai ebo dao.

²⁵Ma, dagego homugo eno wali po ili po da wida, teda dage tomode mena bidigo eno ili po pepeli diliba sela muaibawe? Tama dego enabolo homu bega sabo po weyu, ‘Nago wali po te page meni yai po da,’ dego te po wabo usugowe?” Jopgo te po wai.