1Elisazi ŋokâ‐ticne hâmockonec bâɋârewec ŋokac e âzâcnerâ muwec, “Ajoc, go faharerâ wiacfâcge jaŋehec rarâ ira me ira jaba junʒepieŋ. Wofuŋ e mâreŋ ʒira jara 7 roroc fuarâ foocte mutarawec fokac.”
2Iŋuc âzâcneme ŋokac e faharerâ Anuture ŋiczi dâŋ âzâcnewec irec sâcko ewec. Erâ wiacfâcne jaŋehec Filisa ŋic jaŋere mâreŋko rarâ ira jara 7 jaba jumbiŋ.
3Jara 7 tarame ŋokac e Filisa mâreŋkonec risierâ fic â mâreŋ‐ticnere dâŋgie baocte ŋicwofuŋtao rawec.
4Â ŋicwofuŋ e ine Anuture ŋicte kiŋaŋ qaqa Gehasihec ʒiŋuc muc manac epic: “Elisazi mâsi baekac sasawa irec fuŋne nazac.”
5Iŋuc âzâcneme Gehasi e Elisazi motec moc hâmockonec bâɋârewec irec dâŋ binaŋ ecnehuc juhame ŋokâ‐ticne bâɋârewec ŋokac eki fic â mâreŋ‐ticnere ŋicwofuŋtao dâŋgie baocte fisiwec. Eme Gehasizi muwec, “O ŋicwofuŋ‐nane, ŋokac hâcne ʒi; erâ ŋokâ‐ticne ʒi hâcne Elisazi bâɋârewec.”
6Iŋuc mume ŋicwofuŋzi ŋokac wiocneme binaŋ bacnewec. Bacneme ŋicwofuŋzi micne moc âkendâŋnehuc ʒiŋuc âzâcnewec: “Ŋokac e mâreŋ behehame mâreŋ‐ticnao he sarac epie fo wareekac i â wiac‐ticne i me i ʒeŋgoma bârisiecne‐fâreniŋ.”
7Eme Elisa e Damasko haeo fisiwec. Eme Siria ŋicwofuŋ Beŋhada e huc bame fowec. Fohame ʒiŋuc âzâcnembiŋ: “Anuture ŋic e warejec.”
8Iŋuc âzâcnepie ŋicwofuŋzi Haʒaele ʒiŋuc âzâcnewec: “Go bubiaŋ wiac rorâ Anuture ŋic honezo rac. Ehuc huc bacnukac ʒi behecnume ɋiɋic qapemu me mâcne irec eki Wofuŋ mu wioc ecneocte âzâcnec.”
9Iŋuc muhuc âzâcneme Haʒaele e Anuture ŋic honeocte Damasko haere bubiaŋ wiac fuŋne fuŋne bâmockerâ kamele 40 jaŋere faio râe‐fârerâ rawec. Ra maŋfuŋnao fisi domahuc ʒiŋuc muwec: “Motecge Siria ŋicwofuŋ Beŋhada e gorao ʒiŋuc muhuc sorecnujec: ‘Huc bacnukac ʒi behecnuocmu me?’”
10Iŋuc mume Elisazi ʒiŋuc âzâcnewec: “Go rarâ ʒiŋuc âzâcnec: ‘Go biaŋke‐jâm‐bâŋkecmu!’” Iŋuc murâ ʒuhuckerâ muwec: “Wofuŋzi ʒiŋuc naza nowatuc ekac: E hâmo‐jâmbâŋkeocmu.”
11Iŋuc murâ hone dendeŋnekume Haʒaelezi weaŋkewec. Eme Anuture ŋic e kiowec.
12Kiome Haʒaelezi wiocnerâ muwec, “Fekicne‐nane, go wemocte kiokomec?” Wiocneme dâŋ ʒiŋuc bâtikiecnewec: “Go Israe ŋic wiac repicne ejarecmu i manasurâ kiokopac. Go huec sanaŋ‐jeŋic ʒoczi turuŋketec ʒoacmu â ʒikazi ŋicmotecfâc‐jeŋic âke hâmoc‐jopacmu â gegecnefâc‐jeŋic onʒoŋ jaha jopacmu â ŋokacfâc‐jeŋic kiwechec âke ropiec‐jopacmu.”
13Iŋuc mume Haʒaelezi muwec, “Kiŋaŋ qaqage no wemo, qâto me? Irec wiac hâhâwicne keci epemu?” Iŋuc mume Elisazi dâŋ ʒiŋuc bâtikiecnewec: “Go Siria ŋicwofuŋ jucmu i Wofuŋzi naza nowatuc ejec.”
14Iŋuc âzâcneme Haʒaele e Elisa beherâ ra bomboŋ‐ticnerao fisime wiocne muwec, “Elisa e weniŋuc gazajec?” Wiocneme muwec: “Go jâmbomac biaŋkecmurâ nazajec.”
15Eme hae fureme Haʒaelezi bilaŋge moc rorâ opâo âke uruckerâ ŋicwofuŋ ʒâŋe mai‐ticne foŋkeme foku hâmowec. Hâmome Haʒaelezi tucticne qarâ ŋicwofuŋ juwec.
16Ahaba ŋokâ‐ticne Jehoram e Israe ŋicwofuŋ jume jara memoc eha Josafatare ŋokâ Joramzi fuŋkerâ Juda ŋicwofuŋ ewec.
17E jara‐ticne 32 bazurâ ŋicwofuŋ ehuc Jerusalem haeo jara 8 juwec.
18Erâ Ahabare kikefuŋ jaŋe embiŋ irec sâc ehuc Israe ŋicwofuŋ jaŋere hata bâjâpewec. E Ahabare otâzi ŋonâŋ‐ticne ewecte iŋuc hâcne ewec. Ehuc Wofuŋte ʒâŋe faio wiac mamakâcne ebac ewec.
19Erâ ine Wofuŋ e kiŋaŋŋic‐ticne Dawidi â ɋâricfâc‐ticne lambe moc jareocte mupaŋkewec irec erâ Judaŋic mi bâsirowec‐jopawec.
20Eme ere dameŋko Edomŋic jaŋe Judaŋic jaŋere rurumaŋko ʒuhuckerâ juniŋte takic‐jopame maŋrâŋgeŋ bâfuarâ jaŋe jaŋacne ŋicwofuŋ moc âkendâŋnembiŋ.
21Iŋuc epie Joram e ŋafeoa faharerâ keretacfâc‐ticne â keretac guriŋ bapafâc‐ticne jaŋehec Zairi haeo rahapie Edomŋic jaŋe rârec‐jopahuc imac‐jopapie wiserâ haeo rambiŋ.
22Eme Edomŋic jaŋe Juda guriŋbapa‐ticnere takic‐jopame maŋrâŋgeŋ bâfuambiŋzi bâfuahuc juŋgopieŋ jaha. Ehame Libina haeonec jaŋe dameŋ ijaha maŋrâŋgeŋ bâfuambiŋ wâc.
23Eme Joramzi wiac gâcne ebac ewec sasawa i Juda ŋicwofuŋ jaŋere Binaŋ Qâhâc papia qizec ira qâreŋke‐fârekicne.
24Eme Joram e apa ŋosafâc‐ticne jaŋerao ʒuhuckehuc hâmome jaŋe fombiŋkoa Dawidire hae qizecko duckembiŋ. Ehame ŋokâ‐ticne Ahaʒiazi tucticne qarâ ŋicwofuŋ juwec.
25Ahaba ŋokâ‐ticne Jehoram e Israe ŋicwofuŋ jume jara 12 eha Joramte ŋokâ Ahaʒiazi fuŋkerâ Juda ŋicwofuŋ ewec.
26Ahaʒia e jara‐ticne 22 bazurâ ŋicwofuŋ gie‐ticne fuŋkehuc Jerusalem haeo jara mocjaha juwec. E neŋgoc‐ticnere ʒâŋe Atalia. Atalia e ine Israe ŋicwofuŋ Omiri ere ŋosa.
27Eme Ahaʒia e Ahabare kikefuŋfâc jaŋe embiŋ sâc ijaha ehuc jaŋere kike hata âtewec. E Ahabare kikefuŋfâc jaŋere kimo juwecte Wofuŋte maio wiac mamakâcne ewec.
28Erâ e Ahaba ŋokâ‐ticne Jehoramhec Siria ŋicwofuŋ Haʒaele râsi rocnehuc qaqac eniŋte Ramoti‐Gileade haeo rapic. Eme ira Siria ŋic jaŋe Jehoram ʒâpâ qambiŋ.
29Eme ŋicwofuŋ Jehoram e Siria ŋicwofuŋ Haʒaelehec qaqac ehapire Siria ŋic jaŋe Rama haeo ʒâpâ qambiŋ irec wic i somieocte Jesere haeo risiewec. Ehame Juda ŋicwofuŋ Joramte ŋokâ Ahaʒia e Ahaba ŋokâ‐ticne Jehoramzi huc bame foha honeocte Jesere haeo huwec.
