Lukaj 1:27-76

²⁷Ren jeripein makelekel amen, me kijin nin on ol amen, me mar a Iojep, kijan kadaudok en Dawid; jeripein makelekel o adaneki Maria.

²⁸Tounlan o kotilon on nan deu a majani on i: Kajelelia Main, kom meid pai, Kaun o kotikot re omui! Kom meid pai nan pun en li akan!

²⁹A lao kilaner i, o ronadar a majan, ap majapwekadar madamadaua: Duen jon en ranamau o.

³⁰A tounlan majani on i: Maria, ender majak, pwe komui me konekonelar ren Kot.

³¹A kilan, komui pan lijeanda o naitikeda jeri ol amen, a komui pan ki on mar a Iejuj.

³²Nan i me pan lapalap, o a pan maraneki Japwilim en Kaun lapalap, o Kaun Kot pan kotiki on i mol en jam a Dawid.

³³O a pan kakaunda kadaudok en Iakop kokolata, o japwilim a wei jota pan imwila.

³⁴Maria ap majani on tounlan o: Daduen mepukat pan kak wiaui, aki i jaja ol amen?

³⁵Tounlan o kotin japen majani on i: Nen jaraui pan kotin ti po omui o rojon en Kaun lapalap pan kipa komui di, i me jaraui o, me pan ipwi jan komui, pan maraneki: Japwilim en Kot.

³⁶O majani, ri om Elijapet pil lijeandar ni a likailapala, a pan naitikeda jeri ol amen, a kawonu en jaunipon anjau wet; iei i me dapwan,

³⁷Pwe jota meakot, me Kot jota kak on.

³⁸A Maria potoan on: Majani, nai lidu en Kaun o; en wiaui on ia duen omui majan. Tounlan o ap kotila jan re a.

³⁹I ran oko Maria madan kotila pon nana o nan kanim en Iuda eu,

⁴⁰Ap pedelon on nan im en Jakariaj o ranamau on Elijapet.

⁴¹Kadekadeo Elijapet lao roner en Maria a ranamau on i, jeri o ap mokideda nan kaped a; a Elijapet ap direkila Nen jaraui,

⁴²O nil laudeda majani: Komui meid pai ren li akan, o meid iajanai ipwin kupur omui!

⁴³A iaduen pai wet a ko jan ia, pwe in en ai Kaun koti don ia?

⁴⁴Majani, ni ai roner omui ranamau, jeri o ap mokideda nan kaped i aki a peren.

⁴⁵O komui meid pai, pweki komui pojon! Pwe a pan pwaida, me Kaun o kotin majani on komui.

⁴⁶Maria ap majani: Lol ai kapina Kaun o,

⁴⁷O nen i perenki Kot ai Jaunkamaur.

⁴⁸Pwe a kotin kupurala japwilim a lidu tikitik o. Kilan, jan met o kokolata di karoj pan kapai kin ia,

⁴⁹Pwe a kotin wiaer jon en manaman on ia, me lapalap o mar a me jaraui.

⁵⁰A kotin kalanan on di karoj kokolata, on irail me kin lan i.

⁵¹O a kotin wia kida lim a manaman akan. O a kotin karawan pajan, me kin lemai nan monion arail.

⁵²A kotin jikin wei jaupeidi kan jan mol ar, ap id kajapwilada me tikitik kan.

⁵³A kotin kamede kida kapwa me men manadar akan, ap kotin kadarala kaip me kapwapwa kan.

⁵⁴A kotin upor kin japwilim a ladu Ijrael, o kotin tamataman a kalanan,

⁵⁵Duen a kotin majani on jam atail akan, on Apraam o kadaudok a kokolata.

⁵⁶A Maria kotikot re a jaunipon jilu, ap purelan im a.

⁵⁷Ari, anjaun Elijapet leler pwen naitik, a naitikeda jeri ol amen.

⁵⁸O men imp a kan o jau i ronadar, me Kaun o kotin kupura i, rap ian i peren kida.

⁵⁹Kadekadeo auel en ran o re pwara don jirkomjaij jeri o; ir ari ki on mar en jam a Jakariaj.

⁶⁰A in a japen indada: O kaidin, pwe a pan maraneki Ioanej.

⁶¹Irail ap indan i: Nan jota jau om men me maraneki met.

⁶²Irail ap olol on jam a, duen me a mauki, jeri en adaneki.

⁶³I ari poeki jlet eu, ap intiniedier o majani: A pan adaneki Ioanej. Irail karoj ap puriamuiki.

⁶⁴A madan jilan i wajok pajan o tenap a japadokada; i ari majani o kapina Kot.

⁶⁵A majak kipadi karoj, me kaukaujon imp ar, o wiawia pukat lolok jili pon nana en Iudäa karoj.

⁶⁶A karoj me ronadar, kin nekinekid nan monion arail, indada: Da me jeri men et pan wiala? Pwe lim en Kaun o kotin ian i.

⁶⁷A jam a Jakariaj direkila Nen jaraui ap kokopada majani:

⁶⁸Kapina on Kaun Kot en Ijrael, pwe a kotidier ren japwilim a aramaj akan dore ir ala.

⁶⁹O kotin wiadan kitail kamaur patail jan nan kadaudok en japwilim a ladu Dawid.

⁷⁰Duen a kotin majanier ren japwilim a jaukop jaraui kan, jan tapin kaua kokodo,

⁷¹Me a pan kotin dore kitail la jan ren atail imwintiti o jan nan pa en me kailon kin kitail,

⁷²O kotin kalanan on jam atail akan, o kotin kupureda a inau jaraui,

⁷³O kaula eu, me a kotin kauki on jam atail Apraam, en kotiki on kitail.

⁷⁴Pwe jen dore jan nan pa en atail imwintiti, ap papa i jo majak,

⁷⁵Nin tiak lelapok o pun mon jilan i ran karoj kokolata.

⁷⁶A koe nai jeri pan adaneki: Jaukop en me lapalap o, pwe koe pan tion mon jilan en Kaun o, pwen kaonopada japwilim a al akan.