Luka 1:27-76

²⁷A slər ha na, a gay i dem eye andaya mədel i ndo wuray tə zalay Yusufa gwala i Bəy Davit. Tə zalay a dem eye niye na, Mari.

²⁸Gawla i Mbəlom niye a fələkwa a gay i Mari, a ye naha a gwaɗay: «Na tsikaka me Mari, Bəy Maduweŋ kə gaka ŋgwalak.»

²⁹Mari a tsəne andza niye na, a dzədzar a gwaɗ mə ɗərev ŋgay: «Mətsike me niye na, andza məgweɗe mey?»

³⁰Gawla i Mbəlom a gwaɗay: «Kâ dzədzar bay Mari, Mbəlom a wuɗa kar.

³¹Wawa ma dəɗakeye a huɗ. Ka ta wiye wawa niye na, hasləka eye. Ka ta zaleye Yesu.

³²Neŋgeye na, ma ta təriye bagwar eye. Ta ta zaleye Wawa i Mbəlom Fetek mə gəma. Bəy Maduweŋ Mbəlom ma təriye ha bəy bagwar eye andza bəba təte ŋgay Davit:

³³Neŋgeye ma ta ləviye tay ha Israyel hay ka tor eye. Bəy ŋgay na, ma ndəviye bay.»

³⁴Mari a gwaɗay a gawla i Mbəlom niye: «Wuye ma ta giye bo na, kəkay? Neŋ na, na sər zal zuk bay tuk na, kəkay!»

³⁵Gawla i Mbəlom a mbəɗay faya: «Məsəfəre Tsəɗaŋŋa eye ma mbəzlaweye fakaya. Gədaŋ i Mbəlom Fetek ma ndziye fakaya andza mezek. Yawa! Wawa niye ka ta wiye na, ta zaleye Tsəɗaŋŋa, Wawa i Mbəlom.

³⁶Zəba dem i bəba yak Elizabet kwa neŋgeye guram eye bəbay na, anəke kiye kə yay məkwa.

³⁷Hərwi wuray a zay gədaŋ a Mbəlom təbey.»

³⁸Tsa na, Mari a gwaɗay a gawla i Mbəlom: «Neŋ ndo i məsler i Bəy Maduweŋ. Mâ ge bo andza nakə ka tsik aye.» Tsa na, gawla i Mbəlom a ye ŋgway.

³⁹Ma dəba i məndze tsekweŋ na, Mari a lətse a ye ta bəse a gəma eye andaya mə mahəmba i Yahuda.

⁴⁰A ye na, a gay i Zakari. A ye naha a ndisl na, a fələkwa a gay. A tsikay me a Elizabet.

⁴¹Elizabet a tsəne mətsike me i Mari na, wawa a hats mə huɗ ŋgay. Məsəfəre Tsəɗaŋŋa eye a mbəzlaw ka Elizabet.

⁴²Tsa na, Elizabet a wuda, a gwaɗ: «Nəkar na, Mbəlom kə pa fakaya ŋgama a ze siye i ŋgwas hay tebiye. Ŋgama mâ ndza ka wawa niye ka wiye.

⁴³May i Bəy Maduweŋ ga a yaw ka təv ga na, kəkay! Neŋ təday na, way!

⁴⁴Na gwaɗ ka ŋgatay ba! Ahəl nakə ka tsikeŋ me aye na, wawa a ɓəl tə məŋgwese eye mə huɗ ga.

⁴⁵Nəkar na, ɗərev yak maŋgwasa eye hərwi wu nakə Bəy Maduweŋ a tsik aye na, ka təma, ma giye bo!»

⁴⁶Tsa na, Mari a gwaɗ: «Na zambaɗeye a Bəy Maduweŋ tə ɗərev ga peteh.

⁴⁷Ɗərev ga kə ŋgwasa haladzay hərwi Mbəlom nakə a təma ga ha aye.

⁴⁸Ka zəba fagaya tsekweŋ mə walaŋ i ndo neheye neŋ ndo i məsler ŋgay. Ndo neheye anəke aye ta ndo neheye ta ta wiye tay ha aye na, ta gweɗeŋeye “Nəkar na, ɗərev yak maŋgwasa eye.”

⁴⁹Hərwi Mbəlom bagwar eye kə ge wu nakə lele aye hərwi ga. Neŋgeye na, Mbəlom tsəɗaŋŋa eye.

⁵⁰Neŋgeye na, ŋgwalak ŋgay ɗaɗa a ndəv təbey. Ndo neheye ta rəhay ha gər aye na, ŋgwalak ŋgay ma ndziye huya ta nəteye.

⁵¹Ka bəz ha gədaŋ ŋgay, ka həhar tay ha ndo neheye tə ɗəslay ha gər a bo tay aye.

⁵²Ka həhar tay ha bəy hay abəra ka təv məndze i bəy tay hay. Kə vəlatay gədaŋ a ndo i mətawak hay.

⁵³Ndo neheye may a gatay aye na, kə vəlatay wu mənday. Ndo i mezeleme hay na, ka həhar tay ha.

⁵⁴Ki yaw madzəne tay hay Israyel hay, ndo i məsler ŋgay hay. Mbəlom na, kə mətsa ha gər ta ŋgwalak ŋgay bay.

⁵⁵Kə ge andza nakə a tsikatay a bəba təte kway hay ahəl niye aye. A tsikay a Abraham ada a gwala i Abraham hay tebiye ka tor eye.»

⁵⁶Mari a ndza mə gay i Elizabet kiye mahkar. Tsa na, a ye a mətagay.

⁵⁷Anəke na, kiye i Elizabet kə sla məwe. A wa wawa hasləka eye.

⁵⁸Ndo ŋgay hay ta ndo i məgeɗ ŋgay hay tə tsəne Mbəlom kə gay ŋgwalak a Elizabet na, ti ye mata ŋgwese ka bo dziye.

⁵⁹Wawa a həna tsamahkar na, ndo hay ti yaw mata ɗəse na wawa niye. A satay haɓe məpe faya məzele na, Zakari, tə məzele i Bəba ŋgay.

⁶⁰Ane tuk na, may i wawa niye, a gwaɗatay: «Aʼay! Ta zaleye na, Yuhana.»

⁶¹Tə gwaɗay: «Məzele andaya andza niye ma gwala yak bay tuk na, kəkay!»

⁶²Tsa na, ta tsətsah ka bəba ŋgay wulək wulək tə həlay. Tə gwaɗay: «A saka məpe məzele ka wawa na, way?»

⁶³Zakari a tsətsah fataya palalam nakə tə watsawa faya aye. Tə zlayaw. Tsa na, a watsa: «Məzele ŋgay na, Yuhana.» Tsa na, a gatay wadəŋ wadəŋ tebiye tay eye.

⁶⁴Kwayaŋŋa bazlam i Zakari a həndək ka mətsike me. Tsa na, a zambaɗay a Mbəlom.

⁶⁵Ndo i məgeɗ hay tebiye ta dzədzar. Ndo i gəma niye hay tebiye hus a mahəmba i Yahuda tə tsikawa faya.

⁶⁶Kwa way a tsəne bazlam niye na, tə dzalawa faya mə gər tay, tə gwaɗawa: «Wawa nakay ma ta təriye na, mey?» Ta deɗek, gədaŋ i Bəy Maduweŋ ka gər ŋgay.

⁶⁷Məsəfəre Tsəɗaŋŋa eye a mbəzlaw ka Zakari, bəba i wawa niye. Tsa na, a ɗa ha, a gwaɗ:

⁶⁸«Zambaɗakway a Bəy Maduweŋ kway Mbəlom i Israyel hay. Neŋgeye kə mbəzlaw a walaŋ kway hərwi məmbəle kway hay.

⁶⁹Neŋgeye kə slərakwayaw ndo gədaŋ eye hərwi mətəme kway hay. Neŋgeye na, gwala i Davit ndo i məsler i Mbəlom.

⁷⁰Bazlam nakay na, Mbəlom ɓa kə tsikatay a ndo məɗe ha bazlam ŋgay tsəɗaŋŋa eye hay ahəl niye.

⁷¹A gwaɗ na, ma ta təmiye kway ha abəra mə həlay i ndo i vəram kway hay, ada mə həlay i ndo neheye tebiye tə nakway ɗəre aye.

⁷²Kə gatay ŋgwalak ŋgay a bəba kway hay. Ma mətsiye ha gər ta dzam nakə a ɓar eye bay.

⁷³Mbəlom ɓa ka mbərəm məmbaɗay a bəba təte kway Abraham.

⁷⁴A gwaɗ: Ma ta təmiye kway ha abəra mə həlay i ndo i vəram kway hay na, hərwi ada kâ slakwa faya məgay məsler tə madzədzar eye sa bay.

⁷⁵A ge andza niye na, hərwi ada kâ tərakwa ndo ŋgay hay. Ka tərakweye na, ndo ŋgay tsəɗaŋŋa eye hay huya ma məndze kway.

⁷⁶Nəkar na, wawa ga, ta ta zalakeye na, ndo məɗe ha bazlam i Mbəlom Fetek, hərwi nəkar na, ka laheye kame a Bəy Maduweŋ, ka lambaɗeye na tsəveɗ.