Luka 1:27-76

²⁷Kaweriti na shisoweru kwa muhinga bikira yakahetitwi na muntu yawamshema Yosefu, gwa shiyiwuku sha Dawudi, litawu lyakuwi ayu bikira ndo Mariya.

²⁸Ntumintumi gwa kumpindi kamwiziriti Mariya na kumulamusiya, “Gwakashina? Ponga iweri pamuhera na gwenga! Mtuwa kapamuhera na gwenga, kakupanana upendelewu.”

²⁹Mariya kalisheliti nentu, toziya ya shisoweru sha ntumintumi gwa kumpindi, kaliholiti mumoyu pakalikosiya, “Kulamusiya aku kwana mana gaa?”

³⁰Ntumintumi gwa kumpindi kamgambiriti Mariya, “Nagutira Mariya, Mlungu kakupapanana manemu.

³¹Guloli, haguweri na yinda na kwiwula mwana mpalu na litawu lyakuwi hagumshemi Yesu.

³²Ayu hakaweri mkulu, hawamshemi mwana gwa Mlungu na Mtuwa Mlungu hakampanani shibanta sha ufalumi sha Dawudi mbuyi gwakuwi.

³³Hakakolimlima lukolu lwa Yakobu mashaka goseri na ufalumi wakuwi hapeni uweri na upeleru.”

³⁴Mariya kamgambiriti ntumintumi gwa kumpindi, “Neni haneliwoni na mpalu! Hashiweri ashi shisoweru ashi?”

³⁵Ntumintumi gwa kumpindi kamuwankula, “Rohu Mnanagala hakizi kwaku na makakala ga Mlungu hagakwizili. Toziya ayi mwana hakiwukili hakaweri mnanagala, hakashemwi Mwana gwa Mlungu.

³⁶Gumuholi mlongu gwaku Elizabeti, yomberi yawamshemiti mpendi kumbiti hakaleri mwana mpalu muugogolu wakuwi na mwezi agu ndo mwezi gwa sita kwa yinda yakuwi.

³⁷Toziya kwahera shintu shashikamala kwa Mlungu.”

³⁸Mariya katakula, “Neni na ntumintumi gwa Mtuwa! Iweri kwa neni ntambu ya gulongiti.” Ntumintumi gwa kumpindi kawukiti na kugenda zakuwi.

³⁹Mashaka galii Mariya kawukiti kagenditi mpaka isi ya mulugongu lwa Yudeya.

⁴⁰Aku kingiriti mnumba mwa Zakariya na kamlamsiyiti Elizabeti.

⁴¹Elizabeti pakapikaniriti ntambu Mariya yakamlamsiyiti, nonu kadunkula mumtima mwakuwi. Elizabeti kamemiti Rohu Mnanagala,

⁴²Elizabeti kalonga, “Gutekelerwa gwenga pakati pa wadala woseri na katekelerwi mwana hakiwukili mumtima mwaku.

⁴³Neni na gaa ata mawu gwa Mtuwa gwangu kanizili neni?

⁴⁴Nakugambira, palaa pampikaniriti ntambu yagunamusiyiti, nonu kadunkula kwa kunemelera mumtima mwangu.

⁴⁵Mbaka gwenga toziya gujimira kuwera havitendeki vitwatira vyakakugambiriti Mtuwa.”

⁴⁶Mariya kalonga, “Moyu gwangu gumkwisa Mtuwa,

⁴⁷Na rohu yangu yankunemelera, Toziya Mlungu ndo Mlopoziya gwangu.

⁴⁸Toziya kamonera lusungu neni ntumintumi gwakuwi. Kwanjira vinu wantu woseri hawalongi Mlungu kantekelera,

⁴⁹Toziya ya shintu shikulu shakantendera Mlungu. Litawu lyakuwi linanagala.

⁵⁰Kawalanguziya lusungu lwakuwi Kwa walii yawampanana ligoya kwa shiyiwuku na shiyiwuku.

⁵¹Katenda vitwatira vikulu kwa liwoku lyakuwi, Kawapalasiya yawawera na msindu pamuhera na mipangu ya myoyu yawu.

⁵²Kawasulusiya yawawera na likakala mu ukolamlima wawu, Na kawakweniziya wananagala.

⁵³Yawawera na njala kawayikutiziya vintu viherepa, Na walunda kawawusiya mawoku hera.

⁵⁴Katenda shakatakuliti kwa wambuyi wetu wagona, Kiza kumtanga Israeli ntumintumi gwakuwi.

⁵⁵Ntambu vyakawagambiriti wambuyi wetu, Aburahamu na wiwuka wakuwi mashaka goseri!”

⁵⁶Mariya kalikaliti pamuhera na Elizabeti kwa shipindi sha myezi mitatu, shakapanu kawuyiti ukaya kwakuwi.

⁵⁷Shipindi sha Elizabeti kwiwura shisokiti, kiwuliti mwana mpalu.

⁵⁸Wantu wapakwegera wakuwi na walongu wakuwi pawapikaniriti visoweru viherepa vya kulikangasha Mtuwa vyakavitenditi kwa Elizabeti, womberi wanemeleriti pamuhera na yomberi.

⁵⁹Palipititi lijuwa limu, womberi wiziti kumwingiziya jandu mwana, wafira kumpanana litawu lya tati gwakuwi, Zakariya.

⁶⁰Kumbiti mawu gwakuwi kalonga, “Hangu ndiri! Litawu lyakuwi hawamshemi Yohani.”

⁶¹Wamgambira, “Kwehera muntu muwalongu waku yawamshema litawu ali!”

⁶²Wamlanguziyiti langaliru tati gwakuwi, wavimana ntambu hakamshemi.

⁶³Zakariya kaluwiti shibawu na kalemba hangu, “Litawu lyakuwi ndo Yohani.” Kila muntu kalikangasha.

⁶⁴Pala palii Zakariya kanjiti kayi kutakula, kanjiti kumkwisa Mlungu.

⁶⁵Lyoga lyayingiriti woseri yawalikaliti pakwegera nayomberi na visoweru avi vyoseri vyeniyiti muisi yoseri ya mulugongu mwa Yudeya.

⁶⁶Woseri yawapikaniriti vitwatira avi, waliholiti mumyoyu mwawu pawalonga, “Mwana ayu hakaweri gwa ntambu gaa?.” Toziya nakaka makakala ga Mtuwa hagaweri pamuhera nayomberi.

⁶⁷Zakariya, tati gwa Yohani kamemiziwiti Rohu Mnanagala, katungiti shisoweru shiwagira sha Mlungu.

⁶⁸Tumkwisi Mtuwa, Mlungu gwa Israeli! Kiza kuwatanga wantu wakuwi na kuwakombola.

⁶⁹Katupanana mlopoziya mkulu Mushiyiwuku sha Dawudi ntumintumi gwakuwi.

⁷⁰Gambira ntambu yakawagambiriti wambuyi wa Mlungu wananagala kwanjira kwanja.

⁷¹Hakatulopoziyi kulawa mumawoku mwa wangondu wetu na kutulaviya kulawa mumakakala mwa woseri yawatufira ndiri.

⁷²Kalongiti hakawawoneri lusungu wambuyi wetu, na kulihola lipatanu lyakuwi linanagala.

⁷³Kulirapa kwakamlapiriti Aburahamu mbuyi gwetu,

⁷⁴kuwera hakatutangi twenga tulopoziwi kulawa kwa wangondu wetu. Katugambira tumtenderi Mlungu pota na lyoga,

⁷⁵tuweri wananagala yatumfiriziya Mlungu mashaka goseri ga makaliru getu.

⁷⁶“Na gwenga mwana gwangu, hawakushemi mbuyi gwa Mlungu kakumpindi nentu. Toziya hagumlongoleri Mtuwa kumnyawila njira yakuwi,