LUK 1:27-76

²⁷Maya mateu tapatu umana Maria ngang iniking. Siwan wawi tapatu umana Josep ngang iniking. Ita buyambam tapa Devitdane dongune aakut tapa. Siwan wawi waapata maya waapasimu maatnae tapikge gwa yaking ngana

²⁸dua takut gwekatang angela waapata apu Maria gaak wamu anzing inikut, “Kwikwiknga akngane yuyo. Buyambam tapaat gaat unekan gatake yuke banip gwaang natanggamunggak,” ngang inikut.

²⁹Iniwan natake dasingge gaak wamu waaknga na naninggak ngang natake meya siknga natayukut.

³⁰Natayuwan angelata inikut, “Maria! Ma gwaumbim. Anututa gandupan take sikut.

³¹Siwan ganiwa natapso. Gata kayaapa sike engangu wawi tapatu tangaiwiyak. Tangaike umana Jesu ngang iniyo.

³²Waapata aminu buyambam tapa dakngawan enane siknga yuak kapatane waaknga ngang inining. Siwan bamna Devitda buyambam tapa yuke tasikakut binga waapata dakngake tasiwikge Anutu buyambam tapaninda tapan tasiwik.

³³Tasike Jekopdane dongune aakingu kuupbamde takeapa dakngake asinggan yuwawik. Yuwawan kekeknga akngata asinggan asinggan yuwik,” ngang inikut.

³⁴Iniwan Mariata yake anzing inikut, “Dasipna tangaiwit? Apmae dua kukum,” ngang iniwan

³⁵yake anzing inikut, “Anututane Waung Kapata gae apuke enane siknga yuak kapatane kekeknga aknganata tasinggaman engangu tapatu tangaiwiyak. Wa tangaiwiyak kapae inike Anutu enane siknga yuak kapatane waaknga ngang inining,” ngang inikut. “Gaat llisabetkat dongu unekan yuamayak. Siwan waapata aminuake ngana wawi tapatu musiaatang yuak.

³⁶Musia siwan yekau katak kuut musaat kautdu gwenduat ngang gwa yuak. Enganga wena songaapa ngang iniking ngana kayapa gwa singgak.

³⁷Anututa sangabamu atasinangge natakengu atasiwik,” ngang inikut.

³⁸Iniwan Mariata yake anzing inikut, “Ayok. Nata Buyambam tapanindane gepbiatang yuwawa gata naninggayak kakngata singaman take siwik,” ngang iniwan angela waapata teke kukut.

³⁹Siwan tapduk waomune Mariata tandakngake zetgaman kuke tawandaka dakatang kopbut. Koke you gapmandu Judia kep komune yuak gapmane kundoke

⁴⁰Sekaraiatane yot gwene koke gaak wamu Ilisabet inikut.

⁴¹Iniwan engangu musiane yukut tapata sasaa siwan natayuwawan Anututane Waung Kapata kekeknga aknganata musia tangenawan

⁴²Ilisabetda yake anzing yanggamatakut, “Gata maya kuupbam yapbike yuayak. Engangu musipbaatang yuak kapa take siknga.

⁴³Ge gata Buyambam tapanatane minga ngana Anututa kwikwiknga natanggamuke tasinggaman gata take siknga nae apunggayak.

⁴⁴Gata gaak wamu waaknga ngang naniwi maakngata natake yuwawa engangu musipmaatang yuak kapata iaknga binga natake sasaa singgak.

⁴⁵Siwan buyambam tapata ganiwan natapi siakan sikutde apbakngayo,” ngang inikut.

⁴⁶Siwan Mariata anzing yakut, “Nata Buyambam tapanindane umana akngana yatangenakgat.

⁴⁷Anutu na gatangamunggak kapae banip gwaang nataat.

⁴⁸Natane umana akngana wena ngana nata itane puyana pasike yuwawa atnandupbut. Nanduke tasingaman aminbamu tapduknga apmanu ayuamang komune nanaat apmea yutning amikatda nae apbaknganggak kapa ngang yaning.

⁴⁹Dasingge? Kekekngana Kayaapata sanga buyambam pasingamukut. Itane uman takwan takngae yumdekan yananga dua.

⁵⁰Waapata ie akgwaukaingu tapduk tapduk yuaingge banip kwikwik natayamunggak.

⁵¹Ita kekeknga aknganata tasike aminu inane umana tangenake minaka tasinangge nataaingu zipmawawan atdatakuking.

⁵²Ita buyambam tapa dakngake enane yuya aminda pimatningge tasike umana wenaapa yuya aminu tangenakut.

⁵³Ita tomna natake yuya aminde sanga take siknga yamuke sangaapana kaya aminde sanga dua yamuke yanipewan moo siknga kuking.

⁵⁴Ita bania kwikwiknga aknganae bamin yanike dua yanigokgosakut.

⁵⁵Ebrahapat ie dongune masan siknga aake yuamang amikat dua ninigokgosake Isrel nana puya amina dakngake yuamang aminu akgatanimukut.”

⁵⁶Ngangu Mariata wamu waaknga yakenga bautna Ilisabetkat gatake yuke yekau gweaat gwenduat kawat sandewana yotna gatu kukut.

⁵⁷Siwan tapduknga Ilisabetda engang tangaiwik gwenu gwan dapakawan engangu wawiapa tangaikut.

⁵⁸Tangaiwana itane aminabamda Buyambam tapata natangamunggak kaknga unin aawan kake apbakngaking.

⁵⁹Sike tapduknga katau kautdu musaat kautdu gweaat yukenga kepi asinggan tasikaking kaknga tawake enganggane gupna matanangge apuke umana Sekaraia ngangu nanatane umana ininangge yaking.

⁶⁰Yawa ngana mingata anzing yakut,

⁶¹“Aho. Umana Jon ngang ininim,” ngang yakut.

⁶²Yawan anzing iniking, “Apa. Namakga ba gaatnana tapatutane umana unzingu wena,” ngang iniking. Siwan tasike tasike katakngita tuwangakan tasike nanata umana iniwikge tasiking.

⁶³Tasiwawa ita tuwangakan wam matananga sandu takapningge tasiwan takapa ita anzing matakut, “Umana Jon,” ngang matawan notnabamu nangaakan natapbing.

⁶⁴Siwan zetgaman Sekaraiatane gena take siwan ita wam yake Anutue umana yatangenakut.

⁶⁵Siwan itane notna yotna gapmandune nanakanda kake akgwauking. Siwan sangabamu wa sikutde wamu Judia keu kuupbam tawan katang yuaingge yatakuwawa natapbing.

⁶⁶Siwan Buyambam tapatane kekeknga aknga iat gatake yuamayak kakngatane buya unin aawan kake musiane nangaakan natake anzing yaking, “Masande engangu waapa dasing binga yuwik,” ngang natapbing.

⁶⁷Siwan Anututane Waung Kapata Jondane nana Sekaraiae musia tangenawan ita ayanikapsa aminda yakaing binga wamu takngatu anzing yakut,

⁶⁸“Anutu ninu Isrel nanatane Buyambam tapanindane umana yatangenatna. Ninu Anututane aminabam ita apuke gatanimunggak. Gatanimuke iwanin zipmake yawamban yotna gatu kuningge gatanimunggak.

⁶⁹Anututane aminu tapatu nindane baminu umana Devit. Itane dongune aakuu tapatu Anututa tapan nin gatanimik.

⁷⁰Tupa siknga Anututa wamu takngatu yake yanikapsa amin yaniwan natake anzing yaking,

⁷¹‘Aminu akgatanimik kapata apu iwanin zipmake yawamban kuning,’ ngang yanikapsa aminda yaking.

⁷²Aminu wa gatanimik kapata apu tasiwan Anututa nindane baminde butaya natake gatayamikge yawan kekekakut takngae dua botawik. Asiknga gatanimik.

⁷³Anututa yake nindane baminu Ebrahamde wamu anzing iniwan kekekakut,

⁷⁴Iwanda zipmake yawamba kuning ngang iniwan kekekakut takngakan tasiniman inimbakngake gwaut buyak dua yutnim.

⁷⁵Unzing yusika tapduk dua kunim gwekatang ninda Anutue kaine noman siknga yusikanga apmea kumnim.

⁷⁶Siwan engang! Ga takawi aminbamda gae yake enane siknga yuak kapatane yanikapsa amin tapa ngangu gae yaning. Sike ga Buyambam tapae tupan kuke itane kepina tandakngaya.