Luka 1:27-76

²⁷tadav ra inip na vavina, nina Iosep, a bul mur tai David, i ga vapopoe bat ia; a iang i nam ra inip na vavina Maria.

²⁸I ruk pirana, ma i tatike: Una gugu, u ti doan muka, ra Luluai i ki piram.

²⁹Ma i manga lavur nuknuk ta go ra tinata, ma i nuknuk ra balana ba ra varvagai ava go?

³⁰Ma ra angelo i tatike tana: Maria, koko una burut, tago God i gugu muka tam.

³¹Valongore! Una lalau pa ra bul, una kava natum, a tutana, ma una tar ra iangina ba Iesu.

³²Ma na rararang, ma da vatang ia ba Natu i ra Ngala Muka; ma ra Luluai God na tul tar tana ra kiki na king kai tamana David;

³³na kure vatikene ra kuba i Iakob; kana varkurai pa na ga mutu.

³⁴Maria i biti tai ra angelo: Na dave go, tago pa amir la ma ta tutana?

³⁵A angelo i tatike tana: A Takodo na Tulungen na ki tam, ma ra dekdek i ra Ngala Muka na vamalur u, ma da vatang nam ba una kava boko ba ra tena gomgom, Natu i God.

³⁶Ma gire, niurum Elisabet, ia ra tubuan na vavina, ma di ga vatang ia ma ra biu, ma go i tar lalau pa bula ra bul, a tutana, ma i tar laptikai kana gai.

³⁷Tago pa ta tinata kai God ba na bilua.

³⁸Maria i tatike: Iau go kari iau a tultul kai ra Luluai, da pait ia tagi da kaum tinata. Ma ra angelo i vana kan ia.

³⁹Ta nam ra e, Maria i tut, ma i vana lulut ta ra gunan i lualuana ta ra pia na pal kai Iuda;

⁴⁰ma i ruk ta ra kuba i Sakaria ma i vage pa Elisabet.

⁴¹Ba Elisabet i valongore ra tinata na varvagai kai Maria, a bul i ruarua ra balana; ma Elisabet i buka ma ra Takodo na Tulungen;

⁴²ma i manga tatike dari: U kaka, u ti doan ta diat ra vaden par, ma na doan bula nam una kava boko.

⁴³Ma ia laka iau, upi na i kaugu Luluai na vana piragu?

⁴⁴Ba iau valongore ra nilaim ta ra varvagai, a bul i gugu, ma i ruarua ra balagu.

⁴⁵Ma nina i tar nurnur, i ti doan, tago da pait ot pa nam ra lavur magit ra Luluai i ga tatike tana.

⁴⁶Ma Maria i tatike: A tulungeagu i pite pa ra Luluai.

⁴⁷A tulungeagu i gugu tai God, kaugu Tena Valaun.

⁴⁸Tago i tar gire ung kana tultul na vavina vakuku; tago papa gori ra lavur taun tarai diat a vatang iau ba iau doan.

⁴⁹Tago nina i dekdek muka, i tar pait kapi ra umana ngala na magit i tagu; ma i gomgom ra iangina.

⁵⁰Ma kana varmari i tadav ra lavur taun tarai mutu, dia ru ia.

⁵¹I ga ve tar ra ongor ma ra limana; i tar re varbaiane diat dia kolakolo ma ra nuknuk i ra bala i diat.

⁵²I tar vairop vue ra umana king, ma i tar vangala ra umana luveana.

⁵³I tar tabar vamaur pa diat dia mulmulum ma ta bo na magit; ma i tar tul vamulmulum vue ra umana tadar.

⁵⁴I tar maravut kana tultul Israel, upi na kodop ra varmari,

⁵⁵(Da i ga tatike tai kada tarai lualua) tadav Abaraam, ma ra lavur bul mur vatikai tana.

⁵⁶Ma Maria i ki pirana da ra utul a gai, ma i talil mulai ta ra kubana.

⁵⁷Ma ra bung kai Elisabet i vut ba na kakava tana, ma i kava ra bul tutana.

⁵⁸Ma ra lavur talaina ma ra umana niuruna dia valongore ba ra Luluai i tar manga mari ia, ma dia gugu varurung me.

⁵⁹Ba i tar lavutul kana bung, dia vaninara ba diat a poko kikil ra bul, ma dia mainge upi diat a tar ra iang i tamana tana ba Sakaria.

⁶⁰Ma nana i pue, i biti: Koko; a iangina ka Ioanes.

⁶¹Dia biti tana: Pa ta niurum i kap nam ra iang.

⁶²Ma dia tir tamana, dia tutu ia ka, ba ava i mainge da vatang ia.

⁶³Ma i tutu upi ta pal a davai, ma i tumu ia tana dari: A iangina Ioanes. Ma dia kaian par tana.

⁶⁴Ma i tak vuavue ra ngiene, ma i tapala ra karameana, ma i tata muka, i pite pa God.

⁶⁵Ma diat par dia ki maravai, dia burut muka; ma go ra lavur tinata i po vanavana ta ra gunagunan par Iudaia, nina i lualuana.

⁶⁶Ma diat par dia valongore, dia nuknuk vake ta ra bala i diat, dia biti: A mangamangana bul ava go? Tago ra lima i ra Luluai i ga maravut ia.

⁶⁷Ma tamana, Sakaria, i buka ma ra Takodo na Tulungen, ma i varvai na propet dari:

⁶⁸Da pite pa ra Luluai, ra God kai Israel; tago i tar tadap ra taraina, ma i tar pait kapi kadia varvalaun.

⁶⁹Ma i tar vatur ra dekdek i kada varvalaun ta ra kuba i kana tultul David,

⁷⁰(Da i ga tatike ma ra ngie i kana lavur propet papa ra vunapai ra rakarakan a gunagunan),

⁷¹A varvalaun kan kada lavur ebar, ma kan ra lima i diat bula dia milmilikuane dat;

⁷²Upi na vaarike ra varmari tadav kada lavur lualua, ma upi na nuk pa kana gomgom na kunubu;

⁷³Ma kana tinata bula i ga vavalima me tai tama i dat Abaraam.

⁷⁴Ba na valaun dat kan ra lima i kada lavur ebar, upi dat a toratorom tana, ma koko dat a burut;

⁷⁵Dat a torom ta ra luaina matana ma ra gomgom, ma ra mangamangana takodo ta kada nilaun par.

⁷⁶Ma da vatang u natugu, ba u a propet kai ra Ngala Muka; Tago una lualua ta ra Luluai, una mal are kana lavur nga;