San Lucas 1:27-76

²⁷para makitlajpaloti se íchpochtli non itoka María. Ye yokisentlalijka monamiktis iwan se tlakatl non itoka José, nin José ojojpaixwi n Rey David.

²⁸N ángel okalak kan okatka María iwa okili: —¡Xipaki! Dios satlawel omitstiochi. N Toteko kajki mowa.

²⁹Pero ijkuak María okitak n ángel, saikpanoa omotlajtlachialti iwa mach okimatia tlan kijtos, iwa okimoliaya tleka ijkó okitlajpaloaya.

³⁰Ijkuakó n ángel okili: —María, amo ximawi, porke Dios yolpaki monawak.

³¹¡Xikkaki!, axa timokawas tikókoxki de konetl, iwa non konetl tiktlalilis itoka Jesús.

³²Ye saikpanoa weyijkatitos, iwa kinotsaskeh Tekone de non Weyijkatitok. Dios Toteko kitlalis mayeto Rey ijkó kemi otlanawati David iwejkatata.

³³Ye nochipa kinawatijtos n país de Israel, iwa itlanawatil mach ayik pojpoliwis.

³⁴Ijkuakó María okitlajtlani n ángel: —¿Kenomi manikpia nokone, ne ayamó nikpia nookich?

³⁵N ángel okinankili: —N Espíritu Santo walmuikas motech, iwa iweletilis n Totajtsi Dios mitsmokemis kemi se mextli. Yika, n konetl non te tikpias yetos yolchipawak iwa kinotsaskeh Tekone de Dios.

³⁶Moprima Elisabet, maya ya tenantsi, noiwa kipias se konetl. Ijkó kiné, non okiliayah ayik weletis kipias ikone axa ya kókoxki de konetl iwa ya kipia chikwase mestli.

³⁷Porke Totajtsi Dios nochi weleti kichiwa.

³⁸Ijkuakó María okili: Ne iteska n Totajtsi Dios. Mamochiwa nowa ijkó kemi yokijto. Ijkuakó n ángel owálkiski.

³⁹Itech nonteh tonatijmeh, María oyá totokatijkak okitlajpaloto iprima Elisabet. Ye ochantitoka itech se altepetl non kajki itech tepeyo de Judea.

⁴⁰Ijkuak oajsito itech non altepetl, María okalak icha n Zacarías, iwa okitlajpalo n Elisabet.

⁴¹Ijkuak Elisabet okikak itlajtol n María, ikone n Elisabet otsékuinki ijtik inanyo, iwa Elisabet otenki ika n Espíritu Santo.

⁴²Ijkuakó Elisabet ika pakílistli okualnankili chikawak: —¡Dios omitstiochi okachi ke nochteh n siwameh, iwa n konetl non tikpias, Dios yokitiochi!

⁴³¿Akin ne, para manechontlajpaloki imamá n Noteko?

⁴⁴Porke san nima ijkuak onikak otechtlajpalo, nokone otsékuinki ijtik nonanyo ika pakílistli.

⁴⁵¡Tlawel xiyolpaki, ken otikneltokak nochi tlan Toteko yokijto!

⁴⁶Ijkuakó María okili: Ika nochi noyolojtsi nikweyilia Noteko,

⁴⁷iwa miak niyolpaki inawak Dios, Notemakixti.

⁴⁸Porke onechitak kemi iteska, iwa ken niyolyámanki, Dios onechiknoma, iwa desde axa nochteh n tlaltikpaktlakah nechiliskeh niyolpakiliso.

⁴⁹Porke Dios weletini okinchi notech wejweyi milagros. ¡Ye yolchipawak!

⁵⁰N Totajtsi Dios nochipa kinmiknomatis akimeh kitlakitah.

⁵¹Ye okinexti iweletilis ika tlan okichi, kimpijpinawia akimeh kimatih moweyiliah.

⁵²N wejweyi tekiwajkeh okinkixtili intlanawatil, iwa okinweyijkatlali akimeh san moiknomatih.

⁵³Iwa non amitla okipiayah okinmák nochi tlan kuali, iwa akimeh okipiayah tomi amitla okinmák.

⁵⁴Ye okipalewi itlakewal Israel, mach okilka kiknomatis,

⁵⁵ijkó kemi yowejka okimilijkeh totatawah, Abraham iwa nochteh iojpa ixwiwah nochipa kintlasojtlaskia.

⁵⁶María omoka iwan Elisabet kemi eyi mestli, iwa satepa omókopki icha.

⁵⁷Satepa oajsiko n tonati, ijkuak Elisabet okípixki ikone.

⁵⁸Iwa ijkuak non ik ompa ochanchiwaya iwa non ken kita n Elisabet okimatkeh Toteko Dios satlawel okiknoma, okitlajpalotoh iwa opakeh íwa.

⁵⁹Ijkuak owalchikometik okisirkunsidarotoh n konetl, iwa okinekiah kitlaliliskeh itoka Zacarías, kemi ita.

⁶⁰Pero imamá okijto: —¡Amó, tiktlaliliskeh itoka Juan!

⁶¹Non ompa okatkah okilijkeh: —¿Tleka ijkó tikneki tiknotsas? nochteh non ken tikinmita, amaka ijkó itoka.

⁶²Ijkuakó, okimanotskeh n Zacarías iwa okitlajtlanijkeh kenijki okinekia kitlalilis itoka n konetl.

⁶³Pero Zacarías okimatlájtlanki makimakakah itla tlan ipa tlajkuilos, iwa ijkí okijkuilo: “Juan yetos itoka.” Iwa san okintlajtlachialti.

⁶⁴Non ora Zacarías owaltlajto, iwa opé kiweyijkachiwa Dios.

⁶⁵Iwa nochteh non ik ompa ochantitokah omaujkeh, iwa non ochantitokah itech tepeyo de Judea, omotlapowiayah de nochi tlan otlamochi.

⁶⁶Iwa nochteh non okikakiah, okimoliayah: —¿Tlan kichiwas non chokotsi keman motlamiti tlakatl? Porke okajsikamatiah n Toteko okatka íwa.

⁶⁷Zacarías, ipapá n chokotsi otenki de Espíritu Santo iwa ijkí okijto:

⁶⁸Maweyijkachito n Toteko Dios de Israel, porke okinmakixtiko ialtepeikniwah.

⁶⁹Ye otechaltitlanili se chikaktik temakixti, se non iwejkaixwi n Rey David itékitki n Totajtsi Dios.

⁷⁰Ijkó kemi Dios yokijtojka ya wejkawitl ijkuak iprofetajwah yolchipawakeh otechmatiltijkeh:

⁷¹Ye techpalewiskia inmak akimeh techkokolia iwa inmak akimeh techtlawelitah.

⁷²Noiwa okijto kinmiknomatiskia totatawah iwa ayik kilkawaskia tlan okisentlali kichiwaskia.

⁷³Ye ni tlan Totajtsi Dios okisentlali iwa totata Abraham:

⁷⁴Ye okisentlali techpalewiskia de inmak akimeh techkokoliah, para amo matimawikah ijkuak tiktekitiliskeh,

⁷⁵matiyetokah tiyolchipawakeh iwa timilajkameh inawak Dios, asta ijkuak timikiskeh.

⁷⁶Iwa te, nokone, mitsnotsaskeh profeta de n Totajtsi Dios non weyijkatitok. Porke te tias iyakapa n Totemakixti para matlaneltokakah inawak,