San Lucas 1:27-76

²⁷kan ochantia se ichpochtle itoka María. Yon María yokatka para monamiktis iwan se tlakatl itoka José, katlej walajtok nelwatl de yen rey David.

²⁸In ángel okalakke kan okatka in María iwan okilwij: ―Xipaki tejwatzin María. Dios sa tekitl tikpaktia. In Señor mowan kajki iwan Dios omitzpejpenke de nochtin siwamej.

²⁹Pero nijkuak okitak in ángel, sa otlajtlachixke (omomajmawtij) iwan mach ok okimatke tlan kijtos, iwan okimolwij tlan kijtosneki yon tlan kijta in ángel.

³⁰Ijkuakón in ángel okilwij: ―María, amo ximomawti, porke Dios tikpaktia.

³¹Axan tikpias mokone, iwan tiktlakatilis se chokotzin, iwan tiktokayotis Jesús.

³²Yej sa tekitl weyikistos (weyititos), iwan kinotzaskej iKone in Dios weyikistok, iwan toSeñor Dios kitlalis ma yeto Rey para ma tlanawati ijkón ken otlanawatij in ya wejkawitl iweyitaj David,

³³Yej nochipa yetos tekiwaj itech país de Israel, iwan itekiwajkayo mach keman tlamis.

³⁴Tonses María okitlajtlanij in ángel: ―¿Kenik ma nikpia nokone iwan mach nikpia nookich?

³⁵In ángel okinankilij: ―In Espíritu Santo witz mopan, iwan ipoder in Dios weyikistok (weyititok) mitzkemis kej mixtle. Por yonik, in konetl tlakatis yolchipawak iwan kinotzaskej iKone in Dios.

³⁶Moprima Elisabet noijki kipias se iKone maski ya tenantzin, katlej miekej okijtoayaj mach weli kinpia ikonewan, pero axan ya kipia chikuasen metztle de omokonetij.

³⁷Dios nochi weli kichiwa.

³⁸Tonses in María okijtoj: ―Nej niitekipanoj in Señor. Ma kichiwa nowan ijkón ken yotikijtoj. Ijkuakón in ángel owalpoliwik.

³⁹Itech yonmej tonaltin María oyáj totoka itech se pueblo katlej oyeka ik tepeyoj de Judea.

⁴⁰Nijkuak oajsito itech yon pueblo, okalakke ichan Zacarías iwan okitlajpaloj in Elisabet.

⁴¹Iwan nijkuak Elisabet okikakke okitlajpaloj in María, in konetl omolinij itlalaxko in Elisabet, iwan otenke de Espíritu Santo.

⁴²Iwan okijtoj chikawak: ―Dios omitztiochij okachi ke nochtin in siwamej, iwan okitiochij mokone katlej tikpixtok motlalaxko.

⁴³¿Akin nej, komo para ma wiki ma nechtlajpaloki imaman in noSeñor?

⁴⁴Porke san niman nijkuak onikakke otinechtlajpaloj, nokone omolinij noijtik ika pakilistle.

⁴⁵Xipaki, porke otikneltokak, porke mochiwas nochi tlan toSeñor omitzilwij.

⁴⁶Ijkuakón María okijtoj: Noanima kiweyikixtia in Señor,

⁴⁷iwan noyolo paki inawak Dios noTemakixtij.

⁴⁸Porke maski nitzikitzin iwan san niitekipanoj, Yej onechelnamikke, iwan desde axan nochtin in tlaltikpaktlakaj kijtoskej nik in Dios onechtiochij sa tekitl.

⁴⁹Porke Dios katlej yolchipawak iwan katlej kipia nochi poder notech okinchij wejweyin tlamantin.

⁵⁰Nochipa kinmiknomatis nochtin akinmej kitlakitaskej.

⁵¹Kinchiwa wejweyin tlamantin ika ipoder. Okinkaj se lado katlej moweyinekij.

⁵²In tekiwajkej okinkixtij de itech intlanawatijkayo, iwan okinmakak weyikixtilistle katlej moiknomatij.

⁵³Katlej otiojsiwiaj okinmakak nochi tlan kuale, iwan katlej kimopialiaj mach itlaj okinmakak.

⁵⁴Okipalewij in país de Israel katlej itekipanoj, mach okelkaj de kinmiknomatis,

⁵⁵okichij ijkón ken okinmilwijka in ya wejkawitl toweyitajwan, ijkón ken tlan okilwijka in Abraham iwan nochtin ipilwan, nik kintlasojtlas nochipa.

⁵⁶María omokaj iwan Elisabet kej eyi metztle, iwan satepan omokuepke para ichan.

⁵⁷Nijkuak oajsik tonale para kitlakatilis ikone in Elisabet, okitlakatilij se chokotzin.

⁵⁸Nijkuak ibesinoswan iwan iparienteswan okimatkej kenik in Señor okiknomatke iwan okichij tlan kuale, ijkuakón oyajkej okitlajpalotoj iwan opakej iwan Elisabet.

⁵⁹Owalchikometik oyajkej okisirkunsidarotoj in chokotzin, iwan okinekiaj kitokayotianij Zacarías ijkón ken itoka in tetaj.

⁶⁰Pero in tenan okijtoj: ―Amo. Moneki tiktokayotiskej Juan.

⁶¹Iwan okilwijkej: ―¿Tlanik? Mach akaj ijkón itoka itech mofamilia.

⁶²Ijkuakón okitlajtlanijkej ika señas in tetaj, para kimatiskej kenamij kineki kitokayotis ichokotzin.

⁶³In tetaj okitlajtlanke se amatl para itech kijkuilos, iwan ijkín okijkuiloj: “Yetos itoka Juan.” Iwan nochtin sa otlajtlachixkej (omomajmawtijkej).

⁶⁴Iwan san niman ijkuakón Zacarías oksemi owelik otlajtoj, iwan opéj kiweyikixtia in toTajtzin Dios.

⁶⁵Nochtin ibesinoswan sa otlajtlachixkej. Iwan oxoyawik (oxitinki) in tlajtole de tlan otlamochij itech nochi in yon región tepeyoj de Judea.

⁶⁶Nochtin akinmej okikakiaj, okiyejyekoayaj iwan omotlajtlaniayaj se iwan oksé: ―¿Tlan itekiw yetos in yon chokotzin? Ijkón okijtoayaj porke ya nele melawak in Señor okimakak ipoder in yon chokotzin.

⁶⁷Zacarías, ipapan Juan, otenke de Espíritu Santo iwan okijtoj tlan Dios okimakak ma kijto. Ijkín okijtoj:

⁶⁸Ma tikweyikixtikan in Señor, Dios de Israel, porke owalaj otechpalewiko, tejwan katlej tikatej kej ipueblo para techmakixtis.

⁶⁹Yotechmakak se chikawak toTemakixtij katlej walajtok nelwatl de yen rey David katlej itekipanoj.

⁷⁰Ijkón ken Dios yokijtojka ya wejkawitl itech inten in profetajtin yolchipawakej.

⁷¹Nik techmakixtis de inmak tokontraswan iwan de nochtin akinmej techkokoliaj.

⁷²Iwan kipias iteiknotlamachilis towan ijkón ken okinmilwijka in ya wejkawitl toweyitajwan, iwan mach kelkawas in akuerdo tlan okijtoj.

⁷³Dios ijkón okilwij in ya wejkawitl toweyitaj Abraham.

⁷⁴Okilwij nik techmakixtis de inmak tokontraswan, para ma tiktekipanokan ika ixchikawalistle.

⁷⁵Okilwij ma tiekan tiyolchipawakej iwan ma tiekan tikualtin tlakaj inawak Dios asta ijkuak timikiskej.

⁷⁶Iwan tej, tinokone, mitznotzaskej tiprofeta de Dios weyikistok (weyititok), porke tej titlayekanas para tikyektlalijtias iojwi in Señor.