Luk 1:27-76

²⁷I hakouta kakain hani tel hehin axan Mary i tai engeeng kapi tel na wawan. I tel laha otei haniwen axoi Josep, kahi nati tel masiwi David.

²⁸Tel engel hone Mary, “Haeu aile hasolia hawanewen o. I kapim.”

²⁹Mary namiloi taxiake hawane kakai tel engel ape i namiloi papaxai haxewai teik kakain ien.

³⁰Tel engel kakane Mary ukek, “Kum maamata, Haeu aile kola soliaian hani o.

³¹O hanatua tel akaik wawan. Na i takahawa, axaiwa axan Jises.

³²I sohot tel seilon pate tuah ma pohe Haeu toi i ape laha axai i Nati Haeu. Haeu hana i tel masiwi ti teka Ju masin tel masiwi David, tetel Jises nakuama tetan.

³³Ape i neini teka Israel ma i to Masiwi lian tehue.”

³⁴Mary kakane tel engel ukek, “Nga tai engeeng kapi tel na wawan, aile ape i sohot ukek ia?”

³⁵Tel engel kak pahoi i ukek, “Ti pohe Haeu, Holi Spirit atuhi halihu o ape o pet akaik. I hani hatapo tupuan ailei puase Haeu ape laha axai i Nati Haeu.

³⁶Nam paxaiwa tel akikim Elisabet. Kalak i salaimat i petiwen akaik. Kemuk i lieheh ape aope ie pangapangaun tepanim tehu.

³⁷Tap tenen waliko Haeu kum aile uke.”

³⁸Mary ukek, “Nga unaui Haeu tel Masiwi. Ewi i sohot hani nga masin ti o kakawen.” Ape tel engel salili i.

³⁹Muhin Mary nahih kosea hani tehu taon ti leili Judia he maunten.

⁴⁰I nahih soh hani leili ingi Sakaraia ape i kak amuke Elisabet.

⁴¹Ti Mary kakak tutuen, tel akaik leili tiai Elisabet pixewa. Ape Holi Spirit hanamiloa Elisabet kakain.

⁴²Ape i kak eliel hani Mary ukek, “Haeu aile hasolia hani o, akulai lawe hehin liai. Tin i aile hasolia hani tel akaik na o hatakaha.

⁴³Lehe lahan ka tel tini tel Masiwi tetak nahih paxai nga? Se pate tuah wanen!

⁴⁴Nga tioi ka o tini tel Masiwi nake tel akaik leili tiak pix amuam hawane ti nga hongoa kakaiam.

⁴⁵Haeu aile kola hani o lalape soliaian nake o hong soh ka i aile hawane waliko ti i kakawen.”

⁴⁶Mary ukek, “Tupuak hatel hetekie namilok nga sameni hawane Haeu tel Masiwi.

⁴⁷Pate nga amuam hawane nake Haeu tel awaiak ti lawe waliko lialun.

⁴⁸I kum maluhe nga ma i ngahati nga tel unauan kalak axak pate itan leili teka seilon. Seilon telok aope ie ma telok imuh laha ukek ka Haeu aile kola hani nga lalape soliaian.

⁴⁹I tel pate pohen ma i aile waliko lalap hani nga. I pate solian ma pate tuah xoini lawe seilon ma lawe waliko.

⁵⁰I aile kola tatahan tetan hani teka laha sameni ma hong tamani i leili teka seilon ti aope ie ma imuh.

⁵¹Ti pohen i aile kilan waliko lalap ape i usi xaxaweni teka seilon ti hanasanas.

⁵²Hina teka masiwi i hatapo laha ti neiniai seilon a teka seilon laha teheni aliake laha ti usiai namilon i aile laha seilon tuah.

⁵³Haeu axi waliko solian hani teka pahalaha wanen usiai aweisalun ape i tua hanahi lioi teka laha kilan waliko ma pahalaha kum is usian.

⁵⁴Haeu to huhuali teka seilon ti Israel, teteka unauan.

⁵⁵I namiloi i aile kola tatale tatahan hani Abraham ma teka laha nakuama tetan masin ti i kakanewen laha.”

⁵⁶Mary to pangapang toluhu kapi Elisabet ape i nahih alia hani tonan.

⁵⁷Ti ape Elisabet pangapangaun kewa tepanim hinalo i hatakaha tel akaik wawan.

⁵⁸Teka laha toto xohixohin kapin ma teka akikin hong waliko solian ti Haeu tel Masiwi aile hani Elisabet ape laha hatesol amuam akati i.

⁵⁹Muhi puasain tehu ti tel akaik takahawa, teka akikin apuha ti ailei teik kikilam ti kotiai uli walikoi tel akaik ti kolakol ka i seilon ti Haeu. Pahalato uliai i Sakaraia masin axe tel taman.

⁶⁰Tuahe Elisabet kak eliel ukek, “Kumahe! Tel taman lehe i axai axan Jon!”

⁶¹Lato kakane Elisabet, “Tuahe tap tel akikim axan Jon.”

⁶²Lato kamei tel taman ax tetenen pahan i uliai hani tel natun. Lato tua hapuasa minalato nake i kum kak uke ape lato sokok ka tin i kum hong kakain.

⁶³Sakaraia aile kola ka pahan i tai waliko. Ti lato haniwa i teik patiu ti taiai kakain i tai ukek, “Axan Jon.” Lato hatesol ongaini hawane.

⁶⁴Lokon ien wanen Sakaraia pon i wix ulea ape i kak sameni Haeu.

⁶⁵Teka seilon laha toto xohixohin kapi Sakaraia ma Elisabet laha hatesol ong mamata hawane. Ape laha kaxi sawateni waliko tenen i sohot hani lalu hani teka seilon ti lawe toan he maunten ti leili Judia.

⁶⁶Teka ti laha hongoa ien, laha to nanamiloi ape laha ukek, “Tel akaik ie liai i sohot tel seilon pate tuah nake Haeu tel Masiwi hoi kapin.”

⁶⁷Muhin Holi Spirit hanamiloa Sakaraia tel tame Jon kaxiai tenen kakai Haeu ie,

⁶⁸“Kako sameniwa Haeu tel Masiwi ti kako teka Israel. I tahiama ti hualiakako teka seilon tetan ma oxoxiakako ti kalabus ti saun lialun.

⁶⁹I haniwen kako Krais, tetel ti lalape pohen i awai kako ti kawatan ti lialui woukako. I kahi tel masiwi David, tel unaui Haeu.

⁷⁰Teka kuluiai kakai Haeu laha hani hatapo laha ti ailei puasan, laha kaxiwen ti kuewen waliko ti Haeu aile.

⁷¹I awai kako ti teka laha watakai hawane kako. I huali kako na pahalaha aile halialuakako.

⁷²I aile kola tatahan hani teka tamakako ti matahaun nake i nameni ti i xinoti namil kapi lato ka i Haeu tel Masiwi ti lato ape lato seilon tetan.

⁷³Tenen kakain ien imat i kaxi haniwen Abraham tel tamakako.

⁷⁴I awai kako ti teka laha watakai hawane kako lehe kako aile puasan ma lotui i hetekie tap mamata.

⁷⁵I huali kako sohot seilon sawisawin ti usiai nauna tetan ma ti ailei lawe waliko ti i paxai waheni.”

⁷⁶Ape Sakaraia kakane tel natun ukek, “Tel natuk, o sohot tel kuluiai kakai Haeu. O hutui puasam imat ti Krais tel Haeu taloma ape o huali seilon ti apesenialaha ti sohotui Krais.