Lukasi 1:27-76

²⁷Nakoya kwa mhinza yumwe yalinguchemigwa Maliya, yabanichilwe na munhu yumwe itagwa lyake Yusufu wa lukolo lwa mndewa Daudi.

²⁸Mhilisi wa kilanga nakaluta kwa heye, kamlamusa, “Kulamka! Mkulu Nguluwi kahamwe na hegwe, naheye kakutambichiza ng'hatu!”

²⁹Maliya loyahuliche luzi awo, nakesinza lukami, kaza ngijesa mnhumbula ya heye, kulamsa aku kwa ndaze?

³⁰Ila yula mhilisi wa kilanga nakamlonjela, “Maliya, uleche kudumba! Nguluwi kakugalila kunoga kwa heye.

³¹Ahino, kowa na himila, hamba kolela mwana wa udewele mlume na komchemela itagwa Yesu.

³²Heye kowa mng'hangala na kochemigwa Mwana wa Nguluwi nayali kuchanya ng'hatu. Mkulu Nguluwi komdita yawe mndewa kota vyoyali sekulu wa heye Daudi.

³³Kowa mndewa wa lukolo lwa Yakubu kolutilila, na undewa wa heye wowa hela kuduma!”

³⁴Maliya nakamlonjela mhilisi wa kilanga, “Heni, sinating'hana na mlume. Lelo ago gowa ndaze?”

³⁵Yula mhilisi wa kilanga nakamlonjela, “Muhe Yelile kokudulichila, na mong'ho wa Nguluwi lokugubika. Kwa mbuli ayo, mwana yelile yoleligwa kochemigwa, Yelile mwana wa Nguluwi.

³⁶Ulole, Elisabeti mng'holoze heye! Wanhu nawamchemile mhende, leka sambi kana himila ya myezi sita, nakulala koyalalile.

³⁷Mina kwa Nguluwi kuduhuli mbuli iwele ngulemwelwa.”

³⁸Maliya kalonga “Heni nda chitumagwa wa Mkulu, iwe kota vyoulonjile.” Hamba yula mhilisi wa kilanga nakoka.

³⁹Logakolile mazuwa mado, Maliya nakawoha majendo kuluta himahima mbaka mji umwe, uwele mchidunda cha Yuda.

⁴⁰Ako nakenjila mng'handa ya Sakaliya, kamlamsa Elisabeti.

⁴¹Elisabeti lowahuliche kulamusa kwa Maliya, chali chitigasika mmunda mwa heye. Elisabeti kamemezwa Muhe Yelile,

⁴²na heye kalonga kwa lizi likulu, “Kutambichizwa kusinda wadala weng'ha, na mwana youmulela kotambichizwa.

⁴³Heni nda whaani, leka mamo wa Mkulu wa heni yanjendele?

⁴⁴Lonyhuliche ulamso wa hegwe, chali mmunda mwa heni chitagasika kwa kusangalala.

⁴⁵Kutambichizwa ng'hatu hegwe kwa kukunda mbuli ya Mkulu, kwa vila yowa ikomya kwa gala Mkulu goyakulonjile hegwe!”

⁴⁶Maliya kalonga, “Nhumbula ya heni yangumutogola Mkulu,

⁴⁷na muhe wa heni wangusangalala kwa Mbuli ya Nguluwi mlohozi wa heni,

⁴⁸Lekachoni kang'humbuka, chitumagwa wa heye yaholile! Kulawa sambi na kulutilila, wanhu weng'ha wonyhema mtambichizwa,

⁴⁹kwa vinhu vikulu Nguluwi vyoyaditile. Itagwa lya Nguluwi lyela.

⁵⁰Kulawa ulelo awu na kulutilila, kawalajila Isungu weng'ha walingumdumba heye.

⁵¹Kadita mbuli ng'hulu kwa moko wa heye. Kawasambalula wali na mnvimnvi majesa ga mnhumbula za hewo.

⁵²Kawadulisa wandewa kulawa mvigoda vya hewo vya undewa, nakawakwiniza wala waholile.

⁵³Wali na nzala kawagutiza vinhu vinojile, wali na lufufu kawaleka walute moko yeng'ha.

⁵⁴Kambochela Isilaeli chitumagwa wa heye, yokumbuka isungu lyake.

⁵⁵Kota vonawalongane na wakulu wa hetwe, Abulahamu na ulelo wa heye mazuwa gose.”

⁵⁶Maliya nakekala na Elisabeti myezi jidatu, hamba kahiluka kaye kwa heye.

⁵⁷Mhela wa Elisabeti kulela naufika, kalela mwana mlume.

⁵⁸Wanhu wahabehi na haluga hake nawahulika Mkulu Nguluwi kamonela isungu ng'hatu, nawasangalala hamwe na heye.

⁵⁹Hamba mazuwa nane nagafika ga kumwinjiza yula mwana ikumbi, wazangugana kumchemela itagwa lya mhaza wa heye, Sakaliya.

⁶⁰Ila mayake kalonga, “Hebu! Kochemigwa Yohani.”

⁶¹Wamlonjela, “Lekachoni haduhu munhu mlukolo lwenu, yalinguchemigwa itagwa ali?”

⁶²Wamgodeza mhaza wa mwana yalonje, mwanage yapegwe itagwa lyachi.

⁶³Heye kalanda chibao cha kwandika kandika hino, Yohani ndo itagwa lyake, weng'ha wekala wabubuwale.

⁶⁴Bahala umyango na mlomo wa Sakaliya ugubuka kazangulonga kahi yomtogola Nguluwi.

⁶⁵Woga nauwenjila wanhu weng'ha wa hala habehi, na mbuli azo zenela chila honhu mchidunda cha Yudeya.

⁶⁶Weng'ha wahuliche mbuli ayo, nawejesa mnhumbula zawo wolonga, mwana ayu kowa ndaze? Mana loneka ludali lwa Mkulu Nguluwi lwali hamwe na heye.

⁶⁷Sakaliya, mhaza wa Yohani, kamemezwa Muhe Yelile, kazangulonga lizi lya Nguluwi.

⁶⁸Yatogolwe Mkulu Nguluwi wa Isilaeli, kawoyela na kuwagombola wanhu wa heye.

⁶⁹Katugalila mlohozi mkulu nayali na ludali, lukolo lwa Daudi mtumigwa wa heye.

⁷⁰Na katulonjela aho katali kukolela kuli waloli wa heye welile.

⁷¹Hino kotulohola mmoko mwa watwihilwe hetwe, na kulawa mmoko mwa wanhu weng'ha wehile.

⁷²Kalonga kowonela isungu wakulu wa hetwe, na kukumbuchila ilagano lyelile.

⁷³Kamlahila Abulahamu sekulu wa hetwe.

⁷⁴Kutulohola mmoko mwa wanhu watwihilwe, tuwafugamile ne kudumba,

⁷⁵Tuwe welile na watanganiche hali heye, mazuwa geng'ha ga ukomu wa hetwe.

⁷⁶Na hegwe go mwana wa heni, kochemigwa mloli wa Mkulu Nguluwi nayali kuchanya ng'hatu, komlongola Nguluwi mwana komgongomanyila nzila,