Luk 1:27-76

²⁷Irek, omunyegu mima pochin siitaka yar. Ma por tarek, riiti hi, Josep, riita yak tawa miman eena hisiir. Josep riiti wayega eeta Devit. Omunyegu mima siiti hi eeta Maria.

²⁸Eeta ejel rii siitaka yarek, rii siin eecha wor, “Sen apa. Na eshar ta. Eeta Harapa nijaka tawa. Tawak, rii ninya rukusiichiniga yeyada har.”

²⁹Maria siita ejel sawotar maji meejichi nubu nubu tarek, sii maji mun hiki tar.

³⁰Worek, ejel rii siina eecha wor, “Maria, nija opoche akiitanakech. God riita ninya keena harapa rukusiito

³¹Nija awi siikiita. Nija awi siinak, hoye yikapwan yimowukiita. Yimowunak, riiti hi Jisas na haba ta.

³²Rii harapa siikiita. Riina harapa howuk tawa God rii yikapwa habatakiita. Eeta God riita riina aka tabo yiman otiikiita. Riiti wayega, Devit rii tarega, rii eechaba takiita.

³³Tanak, rii Jekop riiti yakapwan eechaba eechaba neeki yesokwakiita. Riiti kigdom eechaba eechaba takiita. Hamakasakech.

³⁴Worek, Maria sii meejichi ejel riina wor, “Ada omunyegu mima tawa. Ada makasakech. Boyega diita boboyen ada siikiita?”

³⁵Eeta ejel awasen wor, “Eeta Holi Spirit riita nijaka yakiita. Yanak, God riiti hapaga otii tawa boboy ninya gamukiita. Eena diita kepi yikapwa riina God Riiti Yikapwan habatakiita.

³⁶Niji yakaa, Ilisabet, siina na hiki ta. Sii eeta apoko saba mima siir. Siirek, ma ye eecha wocho, sii keena yakapwan saka yimowukiitawak. Wowak, sii yikapwan kiyato. Yokotapa abo yokotapa pochi niiwiika siir.

³⁷God rrita eyey boboy keena otiikiita.”

³⁸Maria sii eecha wor, “Ada Harapa riiti yo otiitawa wakasa mima. Miita bawa majin wowey, sa way ta.” Worek, ejel rii heechi ir.

³⁹Komas Maria sii boboyen sayarechi ameya heechi kwowuk tar eemek heechi ir. Judia nosapek ir.

⁴⁰Sekaraia, Ilisabet piiriiti akak ir. I hechi Ilisabet siina woshiar.

⁴¹Woshiarek, Ilisabet sii meejirek, eeta yikapwa rii siiti biik tari, nyegiirabor. Holi Spirit rii yarek, Ilisabet siina takiikiisiirek,

⁴²sii harapa uwar, “Nija akar eyey mimaka tari, God riita nijaban keena rukusiito. God riita niji yikapwan keena rukusiito.

⁴³Boyewak diita boboy eeta ana yawak, eeji Harapa riiti nokwapa ana hek yawa?

⁴⁴Ada nija ana woshiar majin meejiwak eeji yikapwa eeji biik tari, ameya rii kwoya woy hikichi, nyegiirrabor.

⁴⁵Nija God riita ninya wochirek yar majin sokwaken hiki siitiichiwey, niji inyaka kwoya woy hikikiita.”

⁴⁶Maria sii eecha wor, “Eeji wopu eeta Harapa riiti hin yesokwato.

⁴⁷Eeji yesokwa yichi tawa God riita otiirek, eeji inyaka eeta kwoya woy hikitu.

⁴⁸Ada God riiti kubuchey wakasa mima tawey, rii ana hikitar. Apa na komas eyey ma mima yecha eecha habatakiita: Ada eeta God riita rukusii tawa mima.

⁴⁹Harapa otii tawa God riita harapa boboyen ana otiichicharek eena ana eecha habatar. Rii ti hi eeta Holi.

⁵⁰Ma mima mukaw mashi tarek, apa tawak, komas tabatawak, riita riiti hehar otii tawa boboyen eena God riina akii tawa man eena mukuchichu.

⁵¹Riita riiti hapaga tawa tapan mukuchir. Wohipi tawa ma yechi inyaka otii hiki tawa boboy otiirek, riita yenya otii poy pakar.

⁵²Rii harapa akii tabo yima yenya dagiir poyer. Wok woy tawa ma yenya riita yesokwar.

⁵³Rii eecha ha tawa ma yenya hadabas aboboyen takiikiisiir. Ye yaka tawa ma yenya wochirek ye sobo ir.

⁵⁴Riita noti wayega yenya wotar majin rii yesokwar. Riiti wakasa ma, Isrel, yenya rii kiyatayek yar.

⁵⁵Rii Ebraham riina hehar rukusii tari saka abosuchirek, Rii Ebraham riiti yikapwan yenya eechaba eechaba saka abosuchitarek.”

⁵⁶Worek, Maria siitaq niiwiika piiriichar kaka siirek, sii Ilisabet siina heechi siiti akamaka awasen ir.

⁵⁷Ilisabet yimowur nediik yarek, sii hoyey yikapwan yimowur.

⁵⁸Yimowurek, siiti bana bana tar ma siiti magwi Harapa riita siina kepi otiitar boboyen ye meejichi yaniga siitaka maji kwoyawoy batar.

⁵⁹Yikapwa rii 8 yadii tarek, yecha sapi dagii rabok yar. Yarek, yecha riina hin habak Sekaraia apoko riiti hin, eena waga habatar.

⁶⁰Worek, riiti awi eecha wor, “Yaho. Sekaraia habakasakech. Riiti hi eeta Jon.”

⁶¹Yecha awasen siina eecha wor, “Niji magapana diita yikadey hi takasakech.”

⁶²Worek, yecha eepi riina tapa maji batawak woher, “Kapo boy riiti hin habatakiita?”

⁶³Worek, Sekaraia riita jeyn yaken woher. Wohechi keyirin kadiirek eecha wor, “Riiti hi eeta Jon.” Worek, eyey nyegiirabor.

⁶⁴Eeta nedii Sekaraia rii kawka maji sokwarek kawka maji batar. Baniga, rii God riiti hin yesokwatar.

⁶⁵Worek, bana bana tar ma ye harapa akii tar. Worek, diita otiir boboy Judia kwowu tar eemek eeka i ye ya tar.

⁶⁶Eyey ma mima ye meejichi hikichi woher, “Kapo boy diita yikapwa riipa boy siikiita?” Eeta geenyek siir God riiti hapaga boboy eeta yikapwa riitaka siir.

⁶⁷Riiti eepi, Sekaraia, riina Holi Spirit yaniga takiikiisiirek, Sekaraia rii komas sokwak tawa majin sawor:

⁶⁸“Eeta Harapa, Isrel yechi God, riina na kwoya babatanak na kwoya ba hiki ta. Rii riiti ma mima kiyatayek yar. Yenya heemachik eena yar.

⁶⁹Riita otiirek, yesokwa yicha ma sokwar. Sokwarek, riita nona yesokwa yichir. Dii eeta Devit, God riiti wakasa ma, riiti neja.

⁷⁰Mashi mashi riita riiti piirapet, maji sawo tar ma kepi, riita yechi kujak eecha wor.

⁷¹Riita wotar, nona o ana pichawa ma yecha nona dagiir poyek otii tanak, riita nona yesokwa yichikiita.

⁷²Riita noti wayega yenya eecha wor, “Ada yenya mashi wotar majin saka abosuchikiitawak. Ada kwona hehar rukusiitakiita.

⁷³Riiti noti wayega Ebraham riina majin wotar,

⁷⁴o ana pichawa ma yecha nona dagiir poyek otii tanak, riita nona yesokwa yichikiita. Riita wotar, nota riiti yon otiichinyey, nota sak akiikiitawak.

⁷⁵Riita wotar, riita nona riiti miyik henyak, nota eechaba eechaba kepi takiita. Eechaba eechaba hehar takiita.

⁷⁶Miita eeji yikapwa. Howuk tawa God riiti piirapet miina harapa habatakiita. Miita Harapa riina mapo ikiita. Mapo iniga Harapa riiti nobon takiichikiita.