27Kavriel nggur sepinien tei tengan ha ihit mesen ni mi ate maxoe tei, hisen Meri. Meri, latesikoe xole tuei tengan vateli vatel moletin tei, hisen Siosep, xa nggo vatimol na suv toto Deved tetiamu.
28Melele xa masxaxa ak mei mistal mi Meri, biteni mini bit, “!Tomat iti minuk! Iahova memaal ve xouk e di minuk.”
29E melele xa Meri milonge mak, minexo pupu e di minem ves koute te sepinien ak.
30Di, masxaxa biteni mi Meri bit, “Meri, ulum nakan ti. Hi besi xi pupu ve xouk.
31Xouk uti ni tuvava tei e ulingi ihe horamue. Ti, uling hisen ihe ‘Iesu’ xa koute teni be ‘Hi di miteh meulien e moletin xil.’
32Xi ihe eilep tei xa likesi ni ‘Nat Hi xa de ut nesao.’ E Hi Suv ipol ni mei ihe suv toto ixoni avu nan tetiamu, suv toto Deved.
33Xi ilaxat kuh mol‑Isrel xil vehakut, xa latexo ra na avu Siekob tetiamu. E lelaxatien nan, hoxalite teni ihe tovuol.”
34Meri bit rilomun ni mi masxaxa bit, “?Inou niti ni tuvava itep, vengan xa natakil ti mu tiramue?”
35Ma masxaxa biteni mi Meri bit, “Ninin Eo imei visal xouk, e xeihen na Hi isak ni xouk uti ni tuvava. Ve rin ak, horamue xa ulingi ihe eo, e likesi ni ‘Nat Hi.’
36?Okil tumahin Elsavet? Xi mun iling natneli, tave ti neta xa xi be tovolih ngamu. !Reitin mak! Elsavet xa moletin xil labit be lumalum, taxeak, aveti nan be tei e he sav (6).
37Mak, ma neta tovuol xa Hi misakras vapol ni.”
38Melele xa Meri milonge mak, biteni mi masxaxa bit, “Bos tang. Meulien navan de he Hi, e xi ikila ipol ni naha xa ien bei. Ipol ni minou ixoni ngan taxa xouk di obiteni.” Di, masxaxa be relingi ba.
39Dutou ni melele nen ak, Meri mea e mitemanon be metimal xa Elsavet da en xa de vathu xil te provins te hal Sudea.
40Melele xa duxoh metimal ak, be vangit nim ma Sakaraea xalu e mikes Elsavet.
41E melele xa Elsavet milong rae Meri, tuvava nan nggelial e vangen. Di, Ninin Eo mei mise xat Elsavet
42xa mikei be nesao bit, “!Tuxolxatien na Hi di minuk mili atou sav xil, e tuxolxatien nan di mi tuvava xa de vangom!
43Inou natapin ti tengan nine Suv navan mei vasao ni nou.
44Nalong kil holesok xil ak vengan melele xa natelong xouk otekes nou, tuvava xa de nou besi xi e nggelial.
45Tuxolxatien na Hi di minuk vengan xa oteneket xa sepinien nan xa holesok xil ak mei istal minuk ixoni ngan xa tehiteni minuk.”
46E Meri biteni bit, “E nenemien navan, di napet rat his Iahova.
47Namaal pupu ve Hi navan xa di miteh meulien e nou.
48Xi ien tabong ni nou ti, neta sav xa nabe atou votei te polien nan tang. Xosali iha, moletin xil vus ti lihithiteni xa Hi tetuxol xat nou.
49Hi te xeihen tepol ni holesok xil xa tellep minou, e hisen be eo.
50Xi ien isae e ngan xil xa di lamerere ni, ngan xil xa ladi taxeak, e ngan xil xa ti limei itutou.
51Nggo xeihen nan, Hi tepol ni holesok xil xa latellep, e di nggol rerat valkoai xil xa nenemien nae be nesao.
52Xi mileh rerat suv toto xil ra von xeihen nae, e di pet rat moletin votei xil sung.
53Melele xa moletin xil xa di mae nggat xil lamei visal Hi, di misa anien hos xil mi xil. E melele xa ngan xil xa holesok nae holu lamei visali, misil rerat xil laba hon tang.
54Xi bemei misa tutouen mi mol‑Isrel xil xa langgo vatit vatimol na avu Siekob tetiamu, xa tehe moletin te polien nan. Xi di dutou ni xil vengan xa di minem xat hitxatien nae tengan ipisen esaeen mi xil.
55Xi di pol nggusil hitxatien xil xa tepol ni mi avu nar xil, mi Ebraham e mi vatimol nan xil xa labe mol‑Isrel xil. Hitxatien nan ak misakras vavus.”
56E Meri de visal Elsavet aveti tol (3). Di, dilomun be tim san.
57Melengien bemei pipin tengan Elsavet valing horamue nan, ma milingi be malohos.
58Melele xa vatimol nan xil e moletin sav xil xa ladi sangas visali lalonge xa Iahova pol ni bos pupu mini e rin xa temaen ni tehur natneli, xil labesi xil pupu.
59E melele xa melengien na tuvava ak be tol e he sav (8), nggusil sexien na Siu xil, langguri be vexahu. Ngan xil xa lamei tengan lapusi iexil bei tengan laling his tamen vata en xa be ‘Sakaraea.’
60E Elsavet bit, “!E‑e! Hisen ihe ‘Sion.’”
61E labit rilomun ni mini labit, “!Moletin tovuol tamu e vatimol nalu xa tehur his ak! !Sexien ak tamal ti!”
62Misak ni, ba lasis pis tame tuvava ak nggo hexil tengan vahiteni xa ien bei tengan laling hisen vahe visi.
63Ma Sakaraea misis xil tengan lasa neta te tisen mini. E midisi bit, “Hisen be Sion.” Melele xa labuli, lamesep pupu ven.
64E melele nen tak, Sakaraea mikila vasepin rilomun, e pet rat his Hi del sepinien nan xil.
65Melele xa vatimol nalu e ngan xil xa ladi sangas visal xalu lapus merekel xa mistal, latemanin ni. Misak ni, longeongen usil holesok xil xa testal mi Sakaraea, Elsavet e tuvava nalu mikapis e metimal xil xa ladi e hu xil e provins te hal Sudea.
66Ngan xil xa lalong usili lakila xa xeihen na Hi di e meulien na tuvava ak e lanemi labit, “?Melele xa imeul ihe eilep, mei ihur polien eah vari?”
67E melele nen ak, Ninin Eo bemei mise xat Sakaraea ma xi bit lelen ni usil naha xa imei bit,
68“Rimes Iahova, Hi na moletin xil te hal Isrel, vengan xa xi mei misao ni moletin nan xil e di miteh meulien e xil.
69Hi di misa moletin teteh meulien mi xir. Xi nggur xeihen e nggo vatimol na suv toto Deved xa tehe moletin te polien na Hi.
70Hi tehit xati texo provet eo xil tetiamu
71xa moletin ak mei iteh meulien e xir ra he elu nar xil, e ra xeihen na ngan xil xa di laketeh misa mi xir.
72Xi tehit xati mun xa ipisen esaeen nan mi avu nar xil tetiamu, e inem xat hitxatien te xeih nan
73xa tepol ni tetel avu nar Ebraham tetel sepinien tei xa texeih.
74Hi tehit xati xa ileh rerat xir ra he elu nar xil tengan rakila rimot mini e rihusil xati ixo sexien xa ulixir nakan ti mun.
75Reitin, rakila rimot mini e melengien xil vus e meulien nae itel meulien tei xa ihe eo e imal pe meten.”
76Di, Sakaraea biteni mi tuvava nan bit, “E xouk, natuxoli, likesuk lihit obe provet tei na Hi te ut nesao. E xouk utiamu ni Suv tengan ha usak mesen suse nan.
Luk 1
Luk 1:27-76