Ruka 1:27-76

²⁷Nohpo zurutohme tonyohse mokyro Ritonõpo nenyokyhpyry, orutua kõ poko exipitopỹ zurutohme oryxi. Mokyro esety Maria kynexine. Joze nerenanopyry kynexine. Tawi parỹpyryme kynexine Joze.

²⁸Morarame nohpo a toytose Ritonõpo nenyokyhpyry. —Oehno kene! tykase. —Oserehpyra ke exiko orymo. Kuesẽkõ amaro mana, kure rokẽ oriry se mana. Opyno mana, tykase ynororo eya.

²⁹Mame Ritonõpo nenyokyhpyry eneryke tyya, aomiry etaryke roropa tyya torẽtyke toehse Maria. Toemynyhmase. “Otara nyka hko hmose?” tykase tukurohtao.

³⁰Ynara tykase Ritonõpo nenyokyhpyry eya, —Enaromyra exiko, Maria. Opynanohnõko Ritonõpo mana.

³¹Poetoẽme exĩko mase. Emũkuãko mase orutuame. Jezume ke mesehpatase.

³²Tuisamehxo exĩko mana. Ritonõpo mũkuru imehxo exiketyme esehtõko imehnõ mana. Emero esẽme tyripõko roropa Kuesẽkõ Ritonõpo mana. Tytamuru Tawi ehtopõpyry sã exĩko mana.

³³Jako pakomotyã tuisaryme roropa exĩko mana jũmãme. Toto esẽme exikehpyra mana, tykase Kapirieu eya.

³⁴—To! tykase Maria eya. —Orutua kõ poko exipitopyra ase. Otãto keh morara exĩko nae? tykase, toemynyhmase.

³⁵Ynara tykase Ritonõpo nenyokyhpyry eya ropa, —Ritonõpo zuzenu oehnõko mana oya. Ijamitunuru poe emũkuãko mase. Morara exiryke, “Kurã nymyry mosero,” ãko imehnõ mana. Ritonõpo mũkurume esehpãko mã toto.

³⁶Etako ke, oekyry Izapeu kunumixime mã repe. Emũkuapitopyra mã repe. Yrome emũkuãko mana. Poetoẽme ynororo toehse 6me nuno,

³⁷emero tyriry waro Ritonõpo exiryke, tykase.

³⁸Ynara tykase Maria, —Kuesẽkõ poetoryme ase. Tõmihpyryae ro ah morara jyrino. Tyriry se tahtao tyrĩko mana, tykase ynororo. Mame Ritonõpo nenyokyhpyry toytose ropa.

³⁹Moromeĩpo Maria tãtakimase. Mame toytose Juteapõ pona, ypy tõ rãnaõ pona.

⁴⁰Morarame toeporehkase tahtao, Zakaria tapyĩ taka tomõse. Izapeu taomirose eya.

⁴¹Mame Maria omiry totase tyya ahtao, imũkuru zuakuru ao pau pau tykase. Mame Izapeu kurohtaka Ritonõpo zuzenu tomõse.

⁴²Opore ynara tykase Izapeu eya, —Kurãme mase tyrise, imehnõ nohpo motye, Ritonõpo mũkuru ẽme oexiryke. Kurãme tyrise roropa omũkuru mana, awakuruaono.

⁴³Opoetoryme rokẽ sã ywy, Kuesẽkõ ẽme oexiryke. Kure Ritonõpo ya, tooehse roropa xiaro ya oexiryke.

⁴⁴Taomirose oya jahtao umũkuru pau pau nykano tãkye exiryke.

⁴⁵Kuesẽkõ omiry totase oya. Zae aomiry ehtoh tonetupuhse roropa oya. Morara exiryke tãkye mase. Tõmihpyryae ro tyrĩko Ritonõpo mana emero, tykase Izapeu.

⁴⁶Mame toremiase Maria Ritonõpo netaryme, —Etakure ase eremiãko. Imehxo mã jesemy, Ritonõpo. Ynororo rokẽ kure mana, ãko ase ukurohtao.

⁴⁷Tãkye kuhse ase Ritonõpo poko, ypynanohneme aexiryke. Ypyno mana.

⁴⁸Typoetory tonese kure Ritonõpo a imepyra jahtao ro. Taroino emero ynara ãko toh mã ypoko. “Mokyro nohpo kure kuhse tyrise Ritonõpo a,” ãko mã toto ypoko.

⁴⁹Jamihme Ritonõpo mana. Tuhke jakorehmase. Kurãme nymyry mana.

⁵⁰Imehnõ pyno roropa Ritonõpo mana. Tõmipona exiketõ pyno kuhse mana. Pakatokõ pyno kynexine. Seromatokõ pyno roropa mana. Moromeĩpo ypakomotyã pyno exikehpyra mana. Mya otuotuhponãmãko mana.

⁵¹Tyjamitunuru enepõko mana. “Kure ase, imehnõ motye,” kananõ tahpahpose eya imehxo se toto exiryke.

⁵²Ahno tõ tuisary tuisame pyra tyripose ropa eya. Jamihme exiketõ tuisame pyra tyripose ropa eya. Yrome, “Tuisame pyra ase. Ime pyra ase,” kananõ tuisame tyrise eya.

⁵³Omise exiketõ tautuhmase kurã ke. Yrome tymõkomokã tonyohse ropa eya tymõkomoke pyra ropa, tomahpõke pyra roropa.

⁵⁴Yrome typoetory tõ Izyraeu tõ typynanohse eya tõmihpyryae ro, pake morara katopõpyryae ro kytamurukomo a.

⁵⁵Kytamuru ekepyry Aparão typynanohse roropa eya. Ipakomotyamo typynanohse eya roropa jũme, tykase Maria.

⁵⁶Morarame 3me nuno taropose Maria a moroto Izapeu maro. Morotoino toytose ropa ynororo tytapyĩ taka ropa.

⁵⁷Morarame Izapeu toxietũtose ahtao tonuruse ynororo orutuame. Tãkye toehse toto, jekyry tomo.

⁵⁸Epe tõ roropa tãkye toehse. —Aimo eny kure tyrise, takorehmase Ritonõpo a, tykase toto.

⁵⁹Mame 8me tõmehse ahtao poeto aĩpotapihpyry sahkase tooehse jekyry tomo, “Mose Ritonõpo poetoryme,” katohme. Mame Zakariame esehpary se toh kynexine repe, jũ esetyae ro, repe.

⁶⁰Yrome, —Na, arypyra, tykase jeny. —Joãome ro esety mana, tykase.

⁶¹Mame ynara tykase toto eya, —Oty katohme? Oekyry to htao Joãome tosehke pyra mã toto ipunaka, tykase toto eya.

⁶²Morarame tomary ke tõturupose toto a jumy a, —Onokyme mose esehpãko sytatou? tykase toto.

⁶³Mame pape tapoise tyya ahtao ynara tymerose jumy a, —Joãome mose esety, tykase ynororo. —To! tykase toto, tõsenuruhkase toto.

⁶⁴Morarame axĩ toekurãkase ropa ynororo. Taomitanohpose ropa. —Kure Ritonõpo mana, tykase ynororo.

⁶⁵Moro eneryke tyya xine tonaroxitapãse toto morotõkomo, jekyry tomo, emero. João enurutopõpyry tokãtose eya xine ypy tõ poro, Jutea po.

⁶⁶Morarame morohne etahpõkõ morohne poko tõsenetupuhse toto yronymyryme. Ynara tykase toto poeto poko, —Otara mokyro exĩko nah? Orẽpyra exiketyme mã otarãme, tykase toto, Ritonõpo jamitunuru imaro ehtoh waro toexirykõke.

⁶⁷Morarame Zakaria maro toehse Ritonõpo zuzenu yronymyryme, poeto zũ maro. Ynara tykase ynororo Ritonõpo zuzenu poe, imeĩpo aehtoh poko,

⁶⁸—“Kure mase,” sykatone Ritonõpo a, “Yna esẽme mase, Izyraeu esẽme!” sykatone eya. Typoetory tõ akorehmatohme tooehse ynororo iirypyrykõ korokatohme, toto myhpokatohme ropa samo.

⁶⁹Kypynanohnekõ enehpone kyya xine. Orẽpyra exikety mokyro. Tawi parỹpyryme ynororo.

⁷⁰Ynara tykase Ritonõpo pake, typoetory tõ omihpyryae,

⁷¹“Opynohtorỹko ase opoko xine pyra ozehnotokõ ehtohme. Jamihme ozehnotokõ ahtao ro opynanohtorỹko ase oryhmara xine toto ehtohme.

⁷²Kure oritorỹko ase. Iirypyryme ro awahtao xine ro awãnohpyra xine ase,” tykase kytamurukomo a. Morara katopõpyry poko wenikehpyra mana. Tõmihpyryae ro mana.

⁷³Morara tykase Ritonõpo kytamurukõ Aparão a, “Ekurehpyra ase.

⁷⁴Opynanohtorỹko ase ozehnotokõ opoko xine pyra ehtohme. Ekurehpyra ase,” tykase ynororo. “Ãkorehmatorỹko ase, imehnõ zuno pyra oehtohkõme jomiry poko awahtao xine,” tykase.

⁷⁵“Ãkorehmatorỹko ase kure oehtohkõme zae rokẽ oehtohkõme yneneryme, oorikyrykõ ponãmero,” tykase Ritonõpo Aparão a, tykase Zakaria toremiaryme.

⁷⁶Mame tumũkuru a ynara tykase Zakaria, —Aimo, Ritonõpo poe urutõme exĩko mase, Kuesẽkõ imehxo exikety poe. Osemazuhme sã ytõko mase Kuesẽkõ esemary akorokaneme samo, ipoetory tõ tuarõtatohme tosẽkõ oehtoh poko.