SAN LUCAS 1:27-76

²⁷Nda ye ndudo che dechuh Dendiohs yahn a̱ma nda̱hta ntuco che duche ye María. Nda̱hta me ne, a va ndudo yahn ye che cahneva̱co ye nduco José, a̱ma ihyan che nda̱ta yahn David.

²⁸Cuahn che nda̱ ángel me na̱n che quenun nda̱hta me ne, ra̱hn ye ri ye ihyan: ―Necuma di. Dendiohs ne, yahino ye di, ne nduco ye di. A tenda̱hnun ye di va̱n nducoya̱ca nda̱hta.

²⁹Cuahn che chihnevan ye che ra̱hn ángel me ne, cuahn ino ye, ne ndedecadino ye: “¿Dehra cuande che tihca̱ ra̱hn ye nducó?”

³⁰Tuhme ra̱hn ángel me ri ye ihyan: ―María, dehve rahque, te Dendiohs ne, yahino ye di.

³¹Ma̱n ne, nda̱ca a̱ma daye, ne conehn che duche ye, JESUS.

³²Ihyan min ne, a̱ma chahte vederihquentiyon conan cuma ye, te Da̱ya Dendiohs che a̱ma yudo ye ihyan. Dihvo vo Dendiohs ne, nda̱hco ye vederihquentiyon che quenan cuma David ta̱h ye.

³³Ca̱hcantiyon ye ihyan nación yahn Israel, ne hua cuihno vederihquentiyon yahn ye.

³⁴Tuhme chiquerune María ángel me: ―¿Ta̱ca̱ co conahn che ra̱hn ne ne?, te u ne, ametah cahneva̱có.

³⁵Ndahconan ángel me yahn ye: ―Co Vaco Ndah yahn Dendiohs, conun di, ne nduco vederihquentiyon yahn Dendiohs conahn. Chemin che daye che cuhndeya̱n ne, Da̱ya Ndah yahn Dendiohs.

³⁶A ndihche che din Dendiohs nduco ta̱hn vih Elisabet. Andahre a ndico te, ne hua renda̱ca da̱ya te, ate ma̱n ne, quenun da̱ya te a chi a̱n iyo,

³⁷te Dendiohs ne, nducuahn che nahn ye ne, rinahn.

³⁸Tuhme ra̱hn María: ―Conahn nduhca̱ che ra̱hn ne, te u ne, renevahnecún che rihquentiyon Dihvé Dendiohs. Chihno min ne, cona̱hn ángel me.

³⁹A̱ma o ro min ne, cuahn María a̱ma ya̱n che va cua̱hn icoya̱hn, esta̱do yahn Judea.

⁴⁰Nda̱ ye min ne, min chenda̱ ye chete va̱co Zacarías, ne neca̱h ye Dendiohs Elisabet.

⁴¹Ndeta̱hn chihnevan Elisabet che neca̱h María Dendiohs ihyan ne, nuhn decua̱h yahn ye che quenun chete ye, ne chiya Vaco Ndah yahn Dendiohs, quenun ihyan.

⁴²Ra̱hn ye: ―Va̱n nducoya̱ca nda̱hta ne, a tenda̱hnun Dendiohs di. Namin a tenda̱hnun ye daye.

⁴³Di che co chaco Dihvé. ¿Ta̱ca̱ che man cochi quendihchero u?

⁴⁴Ndeta̱hno che nte Dendiohs u ne, nuhn da̱yá che quenun cheté che chi yeno.

⁴⁵¡Ndah ro yehn che chitehne!, te conahn ndoque ndudo che dechuh Dihvo vo Dendiohs.

⁴⁶Tuhme ra̱hn María: Numacuahn chedave yáhn, rendeva yavena̱n Dihvé Dendiohs.

⁴⁷A̱ma yenó nduco ye, te ndedevahn ye u.

⁴⁸Andahre a̱ma cheva̱h u na̱n ye, ate neca̱hco ye u. Ma̱n ne, nducoya̱ca ihyan ca̱hma ye te ndah ro yáhn,

⁴⁹te Dendiohs, ihyan min che a̱ma yudo vederihquentiyon yahn ye din ye vederihno nducó. Ihyan min che cua̱co, runeca̱de ye na̱n nducuahn.

⁵⁰Numacuahn ro renan va̱hino ye nducoya̱ca ihyan che renevahnecun ye ihyan.

⁵¹Ihyan min ne, redin ye vederihno rahte. Renda̱hco ndiya ye ihyan che ya̱de ye.

⁵²Rehnevi ye vederihquentiyon yahn ihyan che ndina̱n ye, ne redin ye che rina̱n ihyan che necun ye.

⁵³Rinan ye ihyan che renevahnecun ye Ndudo yahn ye, ne rihcoma̱n ye ihyan che ra̱hco ye che nde hua rendotenan ye ihyan.

⁵⁴Redin ye cuda̱do ihyan nación yahn Israel, ne renan va̱hino ye ihyan,

⁵⁵nduhca̱ che ca̱h ye ndudo yahn ye indihte yuhn vo Abraham nduco nducoya̱ca nda̱ta yahn ye.

⁵⁶Tenduh ino iyo quenan María va̱co Elisabet, tuhme cona̱hn ye ndeva̱co ye.

⁵⁷Cuahn che tuno ro yahn Elisabet ne, chihndeya̱n da̱ya ye.

⁵⁸Nducoya̱ca ihyan nino ndeva̱co ye nduco ihyan yahn ye ne, a devano ye te a̱ma quenan va̱hino Dendiohs ihyan, ne chi yeno ye nduco vih.

⁵⁹Chi nine ro ne, cuahn ihyan ca̱va che conahn ye seña decua̱h me, ne nahn conahn ye che duche se Zacarías, nduhca̱ che duche chida se.

⁶⁰Ate ra̱hn chaco se. ―Hua, te Jua̱n conan che duche se.

⁶¹Ra̱hn ihyan chahn: ―¿Dehco ne?, te ametah nde a̱ma ihyan yahn nchuhn che tihca̱ duche ye.

⁶²Tuhme din ta̱h ye che tumerune ye chida se ta̱ca̱ nahn ye che conan che duche se.

⁶³Din ta̱h chida se, chica ye na̱n che dirun ye, ne chaconahn ye: “Jua̱n duche se.” Tuhme cuahn ino ihyan chahn.

⁶⁴A ura min no nuhnde ca̱va chihya Zacarías, ndiquenda̱h ca̱hn ye, ne cana̱n ndeva ye numacuahn vedeyeno yavena̱n Dendiohs.

⁶⁵Nde tahque cuahn ino ihyan chahn chi, ne chetuhn ndudo me numachahte esta̱do yahn Judea.

⁶⁶Nducoya̱ca ihyan che checadino ye ne, rente ye nduco vih: ―¡A̱ma chahte ntiyon conan cuma sa̱hn dihn ca̱h! Tihca̱ ra̱hn ye, te Dendiohs ne, nduco ye sa̱hn.

⁶⁷Chiya Vaco Ndah yahn Dendiohs, quenun Zacarías, ne cahndudo ye:

⁶⁸Ndeva vo yavena̱n Dihvo vo Dendiohs yahn Israel, te ndedevahn ye uvo yahn ye.

⁶⁹Va̱n nda̱ta yahn David, ihyan min che dinahn ye ndudo yahn ye ne, a tenda̱hnun ye a̱ma ihyan che ndedevahn ye uvo numacuahn vederihquentiyon yahn ye,

⁷⁰nduhca̱ che ca̱h ye ndudo yahn ye ro mena̱n, cahndudo ihyan ndah che profeta yahn ye.

⁷¹Tihca̱ ndedevahn ye uvo na̱n nducoya̱ca ihyan che hua ri rendihche ye uvo.

⁷²Renan va̱hino ye indihte yuhn vo, ne redinahn ye ndudo ndah yahn ye che chihco ca̱de ye.

⁷³Ndudo min che ca̱h ye indihte yuhn vo Abraham,

⁷⁴che ndedevahn ye uvo na̱n ihyan che hua ri rendihche ye uvo, ca̱va che numa ino vo ndeva vo yavena̱n ye.

⁷⁵Numacuahn ro che cuahtenan vo iyehnse cuh ne, nahn che dave chedave yuhn vo na̱n ye.

⁷⁶Di, da̱ya má̱n, cuahndode ndudo yahn Dendiohs, ihyan min che a̱ma yudo vederihquentiyon yahn ye. Cahn tahque mena̱n ca che co Dihvo vo, cahcoyan chedave yahn ihyan, ca̱va che nevahnecun ye ihyan.