Xu̱ju̱n xi y'ét'a Luca̱ 1:27-76

²⁷Nku én ngjiko̱ho̱ ntítsjee̱ nku ta̱kjín xu̱nkú xi 'mi Maria̱, xi ja tjíndako̱ho̱ nga ku̱i̱xanko̱ nda̱ xi 'mi Kuse, xi ntje̱he̱ nda̱ rei̱ David y'aha̱ ra̱.

²⁸Jas'en ntítsjee̱ má tíjña ta̱kjíu̱n ko̱ b'i̱ kitsúhu̱: —Antahi. Tse ṉkjún kju̱a̱nda xi tí'ba̱i̱hi. Nda ṉkjún ts'ín basehi Nti̱a̱ná.

²⁹Nk'ie nga kikie Maria̱ ntítsjee̱ ko̱ nga kint'é niu̱, i̱xí b'a̱há kamaha̱ ko̱ kingjásjaiyaha̱ yjoho̱ nkú tsuhu̱ ra̱ kju̱a̱suniñoo̱.

³⁰A̱s'a̱i b'a̱há ta̱ kitsú ngáha ntítsjee̱: —Ji Maria̱, najmi tu̱ binkjuin. Kju̱a̱ndaha̱ Nti̱a̱ná títsjáhi.

³¹Nd'a̱i̱ nku ntí ch'a̱i̱, nku ntíx'i̱n s'e̱jñahi. Jesu k'úét'aihi̱ ntíu̱.

³²Kui xi nku nda̱ chánka ka̱ma ko̱ Ntíhi̱ Nti̱a̱ná xi tíjña nk'a ján k'úíhi̱n. Nti̱a̱ná ts'i̱ín nga kui xi ka̱ma nda̱ rei̱ xi nkúhu nda̱ rei̱ David, a̱t'aha̱ kui xi ntje̱he̱ David.

³³Ku̱a̱téxumaha̱ na̱xi̱nantá xi y'aha̱ ra̱ ntje̱he̱ Jacob santaha tu̱ nkjéhé ni ko̱ najmi tjín xi ka̱ma kjé'aha̱ xáha̱ nga ku̱a̱téxuma.

³⁴B'a̱ kitsú Maria̱ nga kingjásjaiyaha̱ ntítsjee̱: —¿Nkú ts'ín ku̱i̱tjusuhun ni xu'bi̱? A̱t'aha̱ najmi kje̱ tjínna x'i̱n.

³⁵B'a̱ kitsú ntítsjee̱: —Espiri̱tu̱ Santo̱ ni̱bajenk'úhin ko̱ nga'yúhu̱n Nti̱a̱ná xi tíjña nk'a ján k'u̱é'mako̱ho ri nk'íéhe̱n. Kui kju̱a̱ha nga Ntíhi̱ Nti̱a̱ná k'úíhin ntí je xi tsíu̱n.

³⁶Isabel xi na̱ xinki̱ maha ja ta̱ y'a nku ntí, ndaha tsa ja chá. Na̱ xi nti̱ kitsú xu̱ta̱ jun sá ja tjíhi̱n nd'a̱i̱.

³⁷Nti̱a̱ná bi najmi tjíhi̱n ni xi najmi maha̱ ts'ín.

³⁸A̱s'a̱i b'a̱ kitsú Maria̱: —An xi na̱ musu̱hu̱ Nti̱a̱ná. B'a̱ katumana xi nkú nga kuakixínní. Nk'ie nga b'a̱ kitsú Maria̱, a̱s'a̱i ngji ngáha ntítsjee̱.

³⁹Kui ni̱stjiu̱n y'énda yjoho̱ Maria̱ ko̱ ngji ki̱tsa̱ ki̱tsa̱ nku nanki i̱chí xi tíjñajihi̱n a̱sunntu tje̱nki̱ xi tjín a̱nte Judea̱.

⁴⁰A̱s'a̱i jas'en ni'yaha̱ Zacaria̱ ko̱ kikjaniñaha̱ Isabel.

⁴¹Nk'ie nga kint'é Isabel kju̱a̱suniñaha̱ Maria̱, kits'ín ni̱yá ntí xi y'a ko̱ j'aitsejíhi̱n ra̱ Isabel Espiri̱tu̱ Santo̱.

⁴²A̱s'a̱i 'yún kinchja̱ Isabel nga b'a̱ kitsú: —A̱jihi̱n ngayjehe̱ jmichjíu̱n 'yún nda kits'ínko̱ sahi Nti̱a̱ná ji ko̱ 'yún nda kits'ínko̱ ntí xi kich'ai.

⁴³Tu̱nga, ¿yáhá ni an nga na̱aha̱ Chá Nti̱a̱na̱ kj'uaisehena?

⁴⁴A̱t'aha̱ nk'ie nga kuant'e kju̱a̱suniñahi̱, i̱xí kuats'ín ni̱yá tsjoho̱ ntína̱ a̱ya ka̱nts'á.

⁴⁵Á b'a̱ ndaha ri ji xi kis'ejihin ri nga tjíhin nga ku̱i̱tjusun én xi kitsúhi Nti̱a̱ná.

⁴⁶A̱s'a̱i b'i̱ kitsú Maria̱: A b'a̱ 'yún chánkaha Nti̱a̱ná títsu ani̱ma̱na̱.

⁴⁷Títs'intsjoho̱ Nti̱a̱ná xi kunna.

⁴⁸A̱t'aha̱ xi batéxumana kik'axki̱hina an xi kinte tje̱n. Nd'a̱i̱ ko̱ santaha tu̱ nkjéhé ni: “Á b'a̱ nda kits'ínko̱ho ri Nti̱a̱ná”, ku̱i̱tsu̱na xu̱ta̱.

⁴⁹A̱t'aha̱ ni xi i ja kits'ínko̱na xi tjíhi̱n nga'yún. Nkjún j'áín xi ts'e̱.

⁵⁰Kui xi base ni̱ma̱ha̱ xu̱ta̱ xi benkjúhu̱n, xu̱ta̱ xi kis'e ko̱ xi tjín ko̱ xi s'e̱.

⁵¹Tsakúchji nga'yúhu̱n nga kits'ín ni xi i. Kits'ínndzjoya xu̱ta̱ xi ngak'un b'asje yjoho̱.

⁵²Kikjexíhi̱n xáha̱ jmirei̱, ko̱ ts'asjenk'a xu̱ta̱ x'a̱n.

⁵³Kitsjáha̱ ni xi nda xu̱ta̱ xi najmi tjíhi̱n nichine, ko̱ kits'ínkji tiya xu̱ta̱ nchi̱nóo̱.

⁵⁴Tsasinko̱ xu̱ta̱ Israel xi xu̱ta̱ musu̱hu̱ maha, j'áítsjehe̱n ko̱ tsase ni̱ma̱ha̱,

⁵⁵xi nkú kitsú títjuhu̱n ntje̱ cháná, Abraham ko̱ ntje̱ xi s'e̱he̱ a̱skahan.

⁵⁶Jan sá kamaha̱ Maria̱ nga y'ejñako̱ Isabel. A̱skahan kik'óya ni'yaha.

⁵⁷Tsichu ni̱stjin nga tsíhi̱n ntí Isabel. Nku ntíx'i̱n kitsihi̱n.

⁵⁸Nk'ie nga kint'é xu̱ta̱ xi tjíntut'á tiñaha̱ ko̱ xu̱ta̱ xinkjín nga Nti̱a̱ná tsase ni̱ma̱ha̱ Isabel, ta̱ tsjo ṉkjún i̱ncha kamaha̱ ko̱ kui.

⁵⁹Nk'ie nga tsichu ni̱stjin jihi̱n ntíu̱, ngji ts'íhi̱n ni circuncision ko̱ mjehe̱ xu̱ta̱ nga Zacaria̱ k'úín ntíu̱ xi nkú 'mi na̱'mihi̱.

⁶⁰Tu̱nga b'a̱há kitsú na̱aha̱ ntíu̱: —Najmi. Jua tjíhin nga k'úín.

⁶¹B'a̱ i̱ncha kitsú xu̱ta̱: —Tu̱nga najmi tjíhín xu̱ta̱ xinki̱u xi b'a̱ 'miu̱.

⁶²A̱s'a̱i kingjásjaiyaha̱ na̱'mihi̱ ntíu̱ mí j'áíhin xi mjehe̱ k'u̱ét'a.

⁶³Tsanki Zacaria̱ nku yáte i̱chí ko̱ b'i̱ ts'ín y'ét'a: “Jua k'úín”, kitsú. Kama nkjúhu̱n ngayjee̱ xu̱ta̱ xi tíi̱ncha yo̱.

⁶⁴Ta̱ kuihi chu̱bo̱ kama kinchja̱ ngáha Zacaria̱ ko̱ kik'atuts'i̱n nga kits'íntsjoho̱ Nti̱a̱ná.

⁶⁵Kitsankjún ngayjee̱ xu̱ta̱ xi tjín tiña a̱ndai ni'yaha̱ ko̱ kinchja̱ni̱jmíyaha ni xi kamoo̱ xu̱ta̱ xi tjíntu ngayjee̱ a̱sunntu tje̱nki̱ xi tjín a̱nte Judea̱.

⁶⁶Ngayjee̱ xu̱ta̱ xi kint'é niu̱ y'éjintak'un ko̱ b'i̱ i̱ncha kitsú ani̱ma̱ha̱: —¿Yá xi ka̱ma ntíu̱ nga ka̱ma chá? A̱t'aha̱ nga'yúhu̱n Nti̱a̱ná tíjñajihi̱n.

⁶⁷J'aitsejíhi̱n ra̱ Espiri̱tu̱ Santo̱ Zacaria̱, na̱'mihi̱ ntíu̱. Kits'ínkinchja̱ha̱ xi nkúhu nku nda̱ profeta̱ nga b'i̱ kitsú:

⁶⁸¡Kan'etsjoho̱ Nti̱a̱ná xi Nti̱a̱ha̱ xu̱ta̱ Israel, a̱t'aha̱ j'ai ts'ín nda̱íhi̱ xu̱ta̱ xi ts'e̱!

⁶⁹Ja kits'ín nibá nku xi tjíhi̱n nga'yún, kui xi ts'i̱ínk'ankiná, nku xi y'aha̱ ra̱ ntje̱he̱ David, nda̱ xi kint'é'éhe̱n Nti̱a̱ná.

⁷⁰Kui ni xi kinchja̱ ni̱stjin nk'ie, nga kits'ínkinchja̱ já profeta̱ha̱.

⁷¹Kitsú nga k'u̱a̱sjejinná a̱jihi̱n já kontra̱ná, a̱jihi̱n nga'yúhu̱n ngayjee̱ já xi unkiená.

⁷²Kitsú nga ku̱a̱se̱ ni̱ma̱ha̱ ntje̱ cháná, nga najmi ts'i̱ínchaya ni nda xi y'énda nk'ie.

⁷³Kitsúya kixi̱hi̱ Abraham xi ntje̱ cháná maha,

⁷⁴nga ts'i̱ín nda̱íná a̱jihi̱n já kontra̱ná, tu̱ xi najmi ku̱i̱nkjúhunná nga ku̱i̱nú'yá'éhe̱én,

⁷⁵nga je ko̱ na̱xu̱ ku̱i̱ntsu̱ba̱á nginku̱n ngayjee̱ ni̱stjinná.

⁷⁶Ko̱ ji, ntí i̱chína̱, ji xi k'úíhin nda̱ profeta̱ha̱ Nti̱a̱ná xi tíjña nk'a ján. A̱t'aha̱ ji xi k'úín títjuihi̱n Nda̱ Nti̱a̱ná, ji xi k'úéndai ni̱yáha̱.