Luka 1:27-76

²⁷David imkhui kah hlang pakhat, a ming ah Joseph ham te oila a bae pah. Oila ming tah Mary ni.

²⁸Te phoeiah huta taengla kun tih, “A lungvat tangtae aw, omngaih lah, Boeipa tah nang taengah om pai,” a ti nah.

²⁹Tedae Mary te tekah olka dongah konglong ngaihit la om tih te toidalnah loh metla a om eh tila a poek.

³⁰Puencawn loh anih te, “Mary rhih boeh, Pathen taengkah lungvatnah na dang coeng te.

³¹Te dongah bungvawn neh na yom tih capa na cun vaengah a ming te Jesuh sui ne.

³²Anih tah tanglue la om vetih Khohni capa tila a khue ni. Boeipa Pathen loh anih te a napa David kah ngolkhoel te a paek ni.

³³Jakob im ah kumhal due manghai pawn ni. A ram te khaw bawt ti om mahpawh,” a ti nah.

³⁴Te vaengah Mary loh puencawn taengah, “Hekah he metlam a om eh? tongpa khaw ka ming moenih,” a ti nah.

³⁵Te dongah anih te puencawn loh a doo tih, “Mueihla Cim loh nang n'thoeng thil vetih, Khohni kah thaomnah te nang m'muek sak ni. Te dongah na cun te aka cim Pathen Capa tila a khue bal ni.

³⁶Te phoeiah namah huiko Elizabeth te a patong soiah, camoe a yom van coeng ke. Te dongah cakol la a khue te tahae ah hla rhuk lo coeng.

³⁷Pathen kah olka boeih long tah a tloel nah moenih,” a ti nah.

³⁸Te dongah Mary loh, “Boeipa kah salnu he, na olka bangla kai taengah om saeh,” a ti nah. Te phoeiah puencawn tah anih taeng lamloh nong.

³⁹Mary tah tekah khohnin ah thoo tih tlang kah Judah kho ah thahluenah neh cet.

⁴⁰Zekhariah im te khuiah kun tih Elizabeth te a voek.

⁴¹Mary kah toidalnah te Elizabeth loh a yaak vaengah a bung khuikah cahni te soipet tih Elizabeth khaw Mueihla Cim neh baetawt.

⁴²Te vaengah tamlung neh pang khungdaeng tih, “Nang tah huta rhoek lakliah na yoethen coeng tih, nang bung kah a thaih te a yoethen coeng.

⁴³Kai aih he metlam nim, ka boeipa kah a manu kai taengla ha pawk tarha he?

⁴⁴Nang kah toidalnah ol te ka hna khuiah a kun vaengah tah, ka bung khuikah cahni loh kohoenah neh soipet he.

⁴⁵Te dongah Boeipa loh a thui te hmakhahnah om ni tila aka tangnah tah a yoethen,” a ti nah.

⁴⁶Mary long khaw, “Boeipa te ka hinglu loh a oep.

⁴⁷Ka mueihla tah ka khangkung Pathen dongah hlampan coeng.

⁴⁸A salnu mathoe he a paelki thil coeng dongah tahae lamkah tah cadil boeih loh kai ng'uem uh pawn ni.

⁴⁹Kai taengah thaom tloe la a saii dongah, a ming tah cim pai saeh.

⁵⁰A rhennah tah amah aka rhih rhoek kah cadil cahma ham ni.

⁵¹A ban neh a thaomnah a saii, a thinko kopoek ah buhueng aka pom te a taekyak.

⁵²Mangpa rhoek a ngolkhoel lamloh a hlak tih, tlayae rhoek te a pomsang.

⁵³Bungpong rhoek te hno then neh a hah sak tih, khuehtawn rhoek a tlongtlai la a tueih.

⁵⁴Boeipa loh a rhennah te anih taengah a khueh tih, a oep te a huiko neh imben loh a yaak vaengah anih te a omngaih puei uh.

⁵⁵A pa rhoek taengah a thui bangla, Abraham neh a tiingan taengah kumhal duela a khueh,” a ti.

⁵⁶Mary te Elizabeth neh hla thum tluk hmaih a naeh phoeiah amah im la bal.

⁵⁷Elizabeth te a om tue a pha coeng tih capa a cun.

⁵⁸Boeipa loh a rhennah te anih taengah a khueh tih, a oep te a huiko neh imben loh a yaak vaengah anih te a omngaih puei uh.

⁵⁹Khohnin hnin rhet a lo vaengah camoe te yahvinrhet ham cet uh. Te vaengah anih te a napa ming Zekhariah la a khue uh.

⁶⁰Tedae a manu loh a doo tih, “Moenih, Johan la a khue ni,” a ti nah.

⁶¹Te vaengah anih taengah, “Hekah ming la a khue te na cako khuiah a om pawt ah,” a ti na uh.

⁶²Camoe metla khue a ngaih poek tila a napa te a yavaih uh.

⁶³Te vaengah cabael a hoe tih a daek hatah, “A ming tah Johan ni,” a ti tih boeih a ngaihmang uh.

⁶⁴Te vaengah a hmui, a lai te khaw pahoi a khui pah dongah cal tih Pathen te a uem.

⁶⁵Te vaengah amih tolvael rhoek boeih te rhihnah loh a pai thil. Te dongah hekah olka loh Judah tlang tom te boeih a ngae uh.

⁶⁶Aka ya boeih loh a thinko khuiah a dueh uh tih, “Hekah camoe he metlam nim a om ve?” a ti uh. Tedae Boeipa kah kut loh anih te a om puei.

⁶⁷A napa Zekhariah tah Mueihla Cim neh a baetawt.

⁶⁸Te dongah a olphong neh, “A pilnam te a hip tih tlannah a saii dongah, Israel Pathen Boeipa tah uemom pai saeh.

⁶⁹A taengom David im khuiah mamih ham khangnah ki a thoh sak.

⁷⁰Khosuen lamloh a tonghma ciim rhoek kah ka dongah a thui vanbangla,

⁷¹Mamih kah rhal rhoek neh mamih aka hmuhuet rhoek boeih kut lamkah khangnah,

⁷²a pa rhoek taengah rhennah tueng sak ham neh a paipi ciim te poek sak ham,

⁷³a pa Abraham taengah olhlo neh a toemngam te mamih paek ham,

⁷⁴amah taengah thothueng hamla rhal kut lamloh hoel n'hlawt coeng.

⁷⁵mamih kah khohnin rhoek boeih te amah hmaiah duengnah neh cimcaihnah ham ni.

⁷⁶Te phoeiah, camoe, nang tah Khohni tonghma la n'khue vetih a longpuei rhoekbah ham Boeipa hmaiah na lamhma ni.