San Lucas 1:27-76

²⁷ndava ngu chjuun xungun xi hmí xu rë María. Hane María jan ne, tacunvasen cjuavixan rë me cojo ngu xihin xi hmí rë José, ngu me xi tjë rë David, ngu xutachanga xi camatitjun xu tsëhë xuta tjë rë Israel.

²⁸Hane xi cavisehen ángel ndava María jan ne, sehe cachja xu cuitjin: ―‍Cuhndari, tsan. Nina ne, catsinchacun me ngaye, hacuaha tacun me cojo ri. Ngajñi rë yëjë ni yachjin ne, ngaye xi jercu catsinchacun ri Nina. ―‍Cuatjin xu cachja ángel.

²⁹Xi cahndë xu María cjua xi cachja ángel jan ne, catsacjun me camá, sehe catsingataha cacun xu me mé xcusun nina xi casua ángel me.

³⁰Sehe ngajan xi ángel ne, cuitjin xu cachja cojo rë me: ―‍Xicarcuiin María ta Nina ne, jemu tjin rë me cjuandaja cojo ri.

³¹Quihndë ne, sacú ri ngu quihndi, hane hacuaha cuechú nixtin xi tsin ri quihndi vëhë. Quihndi vëhë ne, tehe ñihi rë Jesús.

³²Hacuaha jemu jyë hnga cuma cojo cjuatacun rë, hacuaha Quihndi rë Nina xi Matitjun cjuahañihi. Hacuaha Nina sahmi me xi cuitexa quihndi vëhë sacuatjin cavitexa xutachanga rë, me xi hmí rë David.

³³Hane vëhë cuitexa rë xuta tjë rë Israel, hane gubiernu rë ne, tsajin nu tsajin nixtin cuijnetaha. ―‍Cuatjin xu cachja ángel.

³⁴Sehe ngajan xi María ne, cavinenguise xu me ángel cuitjin: ―‍¿Hacutjin cuma xcusun vi? ta ngahan ne, cjëë sacú xihin naha. ―‍Cuatjin xu cachja me.

³⁵Hane xi cafayangui ángel ne, cuitjin xu cachja: ―‍Hasen rë Nina xi Matitjun ne, cuinduva cuaxtë ri sacuaha ngu tjahnguen. Vëhë xi quihndi xi tsin ri ne, hatuxa tyjahi cojo cjuatacun rë, hacuaha Quihndi rë Nina Jain.

³⁶Hacuaha na Elisabet xinguin ne, handasa ha jemu changá na ne, hacuaha casacu rë na ngu quihndi. Ha quihndë jyun sá yaha na quihndi, na xi chja cjua xi hatuxa maji sacu rë quihndi.

³⁷Cuatjin camá ta, xi cuma rë Nina ne, tsajin camahani mé xi cumaji cuma. ―‍Cuatjin xu cachja ángel.

³⁸Ngajan xi María ne, cuitjin xu cafayangui me: ―‍Ngahan ne, sacuaha ngu hndixahan rë Nina ngahan. Catisahmi Nina cojo ná sacuatjin cjua xi canújun. ―‍Cuatjin xu cachja me. Ngaxtun vëhë ne, sehe cafe ángel.

³⁹Nixtin hya ne, cavetju xu María, ngu quixi ni quiji me ngu nandya ngajan nangui ndetjún tsëhë distritu Judea.

⁴⁰Hane xi cafehe me ngajan ne, cavisehen xu me ndava Zacarías, sehe cachja me nina cojo Elisabet.

⁴¹Hane xi cahndë xu Elisabet xi cachja María nina ne, cafiniya xu quihndi xi jiya cahntsua Elisabet. Ngajan xi Elisabet ne, catsë rë xahasen rë me cojo Hasen rë Nina.

⁴²Hane sehe jercu hñu xu cachja me cjua vihi cojo María: ―‍Ngajñi rë yëjë ni yachjin ne, ngaye xi jercu catsinchacun ri Nina, hacuaha catsinchacun me quihndi xi tsin ri.

⁴³¡Mé má ngahan xi tu ngaye xi naa rë nai naha ngaye, ndove tichusihinye ná!

⁴⁴Xi tu cahndë xi canoje nina cojo ná ne, hora vëhë cafiniya quihndi xi jiya cahntsuá xi ndama rë.

⁴⁵Jemu ndaja tsiji xi macjain ri xi yëjë ni cjua xi cachja Nina cojo ri ne, cuetjucaa jain. ―‍Cuatjin xu cachja Elisabet.

⁴⁶Sehe ngajan xi María ne, cuitjin xu cachja me: Ngahan ne, jercu sahme jyë sahme hnga Nina;

⁴⁷hacuaha jercu ndama ná tsëhë Nina, me xi vaxëtje ná.

⁴⁸Casahmicuenda Nina ngahan, ngahan xi sacuaha ngu hndixahan rë me ngahan ta, quihndë cojo nixtin xi cjui sa ne, cuichja yëjë xuta xi siu cojo xuta xi sehe tsin sa xi jemu ndaja tsahan;

⁴⁹tsëhë xi Nina xi jemu jyë hnga me cojo ngahñu rë me ne, jemu vengui chji rë xcusun xi casahmi me cojo ná. ¡Jemu tyjahi me cojo cjuatacun rë me!

⁵⁰Nina ne, hatuxa jemu tjin rë me cjuayumatacun cojo yëjë xuta xi faharcun rë me ha tucutjin cjín xuta tisetsin me jima ngundiya jima ngundiya.

⁵¹Nina ne, sahmi me hacutjin xi meje sahmi me cojo ngahñu jyë xi tjin rë me: tsinguitsojo me yëjë xuta xi jemu tjin rë cjuaxta cahntsua xahasen rë;

⁵²tsinguijne me xuta xi matitjun tsëhë xcun xá rë, hacuaha sahmi yehe sahmi hnga me xuta yuma.

⁵³Xuta xi machaja rë me ne, jemu yehe cjuandaja sua Nina me, peru xuta nchina ne, suvá tsja tiya me tsicuya Nina me cjue me.

⁵⁴Nina ne, cuisecoo naja me ngayejen ni xuta tjë rë Israel, ngayaan xi tsëhë me ngayaan, hacuaha tsinguitsjen me xi cumayuma rë me ngayaan.

⁵⁵Xi cuatjin ne, cuetjucaa jain sacuatjin xi ha cachja me cojo xutachanga naja Abraham, cojo yëjë sa tjë rë me. Cuatjin xu cachja María.

⁵⁶Hya xi camá ne, María jan ne, cavéjña xu me jyan sá ndava Elisabet, sehe cavuya cafe me nangui rë me hiscan tjin ndava me.

⁵⁷Quihndë ne, cavechú nixtin xi tsin rë Elisabet quihndi, hane catsin rë me ngu quihndi xihin.

⁵⁸Xi camachaya rë yëjë xuta xi siu tahndee ndava me cojo yëjë xicjin Elisabet xi jercu camayuma rë Nina Elisabet ne, jercu ndaja camá rë me xingu xingu me cojo Elisabet.

⁵⁹Hya xi camá xu ne, xi cavetjucaa quihndi jan jyin nixtin ne, cafehe nga me xi siu tahndee ndava me jan cojo xicjin Elisabet xi cuma suhi tsëhë xi xtí chuxin rë quihndi. Hane meje suañihi me quihndi jan Zacarías, tsëhë xi cuatjin hmí rë nahmi rë.

⁶⁰Ngajan xi cachja xu naa rë quihndi jan cuitjin: ―‍Hajín ta quihndi vi ne, Juan cjuahañihi. ―‍Cuatjin xu cachja me.

⁶¹Hane xuta jan ne, cuitjin xu cachja me: ―‍Peru ngayun ne, tsajin hisca ngu xingun xi cuatjin hmí rë. ―‍Cuatjin xu cachja xuta jan.

⁶²Ngajan xi xuta xi cuacun jan ne, tu casahmi tsjá xu ni me cojo nahmi rë quihndi xi cavinenguise me hacutjin meje rë nahmi rë quihndi xi cjuahañihi quihndi jan.

⁶³Ngajan xi Zacarías ne, cafehya xu me ngu pizarra, sehe ngajan catsihindu me cjua vihi: “Juan cjuahañihi.” Cuatjin xu catsihindu me. Hya xi camá ne, yëjë ni me ne, jemu quijircun xu rë me.

⁶⁴Hane hora vëhë ni ne, camá xu cachja Zacarías, hane jemu ndaja cavaxëndaja me Nina.

⁶⁵Ngajan xi xuta xi siu tahndee ndava me jan ne, jemu catsacjun xu me camá, hane jingujyë ni ladu nangui ndetjún tsëhë distritu Judea hiscan xi siu xuta ne, jercu cavisiajmi xu me tsëhë cjuacjintacun vëhë.

⁶⁶Hane yëjë xuta xi camachaya rë cjuacjintacun vëhë ne, jercu cjín catsingataha cacun me, hisca cachja xu me cuitjin: ―‍¡Cuechú nixtin xi quihndi vi ne, cuma ngu xihin xi jyë hnga cojo cjuatacun rë! Cuatjin xu cachja xuta xi cuacun jan ta, tsëhë xi quihndi vëhë ne, Nina yahangui jain me.

⁶⁷Zacarías, nahmi rë quihndi jan ne, ña catsë rë me cojo Hasen rë Nina, hane cachja xu me cuitjin cjua xi cafahatsja me tsëhë Nina:

⁶⁸¡Tjemu ndaja Nina naja ngayaan xuta tjë rë Israel! tsëhë xi cuinduva me cjuaha naja me xi cuma yaan xuta rë me.

⁶⁹Nina sahmi me xi ngajñi rë tjë rë David, ngu xuta rë Nina ne, cuetjujñi ngu xihin xi cuaxëtje naja,

⁷⁰sacuatjin xi ha cachja profeta xi cavejña me tsëhë Nina, hya xi cachja me cojo xutachanga naja cjua rë Nina hatsëë nixtin.

⁷¹Hacuaha cachja Nina xi cuaxëtje naja me tsëhë condra naja, hacuaha cuaxëtje naja me tsëhë yëjë xuta xi choho vëë naja,

⁷²hacuaha cumayuma rë me tsëhë xutachanga naja hacuaha tsinguitsjen me compromisu ximinchacun xi casahmi me cojo xutachanga naja.

⁷³Nina ne, cachja me: “Ngahan suva hvë”, hya xi casahmi me compromisu jan cojo xutachanga naja Abraham.

⁷⁴Hya xi casahmi me compromisu vëhë ne, cachja me xi cuëhëndaya naja me tsëhë condra naja, cojo sa xi ngayaan ne, hacuiin cojo chircun chjahanrcun me ta

⁷⁵chjahanrcun me cojo ngu cjuatacun tyjahi, xi tsajin jyë́ naja xcun me hacutjin nixtin xi nechan xcun cjuahñu naja.

⁷⁶Ngaye tsan ne, hacuaha cuma ngaye ngu profeta tsëhë Nina xi Matitjun ta, tsëhë xi ngaye cuihintitjin, choxehe ndiya tsëhë Nina,