Lucas 1:27-76

²⁷Chaychrümi yachrara mana olgo regueg juc jipash, María jutiyog. Payga nä rimasha cara José mözuwan ishcaychacunanpagmi. Chay mözuga cara Rey Davidpa castan aywagmi.

²⁸Angel Gabrielga María cayagman chrarurga “¡Cushicuy María! Diospita alipag ricasham cayanqui. Diosga gamwanmi cayan” nirunshi.

²⁹Chaura angelta ricapururga, jinaman chaynuypa ángel niruptinga, Mariaga pasay mayacasha niragshi ricacarun, “¿Imatatag caynuypa niyäman?” nir.

³⁰Chaynuy pinsiayaptilanshi angelga niruntag: “María, ama manchacaychu. Diosmi cuyapäshurlay gamtaga acrarayäshunqui.

³¹Cananga pachrayogmi ricacanqui, nätan wawaymi canga olgo. Jutintam chrurapunqui Jesusta.

³²Payga canga alisca munayniyogmi, jinaman cayansi jana pachachru cayag Diospa-mayinmi. Nätan Munayniyog Diosmi chruranga mandag cananpag, unay awillun Davidtanuysi.

³³Chaura imaycamas mandagmi canga Jacobpa castan aywagchru, jinaman chaynuy mandaglam canga imay imaycamas”.

³⁴Chaynuy niruptin Mariaga tapurun angeltash cay nir: “¿Imanuypatag pachrayogga ricacäshag mana olgotasi regueyarga?”

³⁵Niptinshi angelga nirun: “Santu Espiritum shamunga gamman. Chaylam Diospa munayninwan pachrayog ricacunqui. Chaymi chay näcimug wamrataga ricapäcunga Dioslapag cawagpag, jinaman Diospa-mayinpag.

³⁶Nätan mana wachray yachrag nipäcungan castay Elisabetsi chacwanyänanchrümi nä sogta quilla pachrayog cayan.

³⁷Diospagga manam ima ruraysi sasachu”.

³⁸Niptinshi Mariaga nirun: “Diospa maquinchrümi cayä. Gam nimangaynuy Dios rurachun nogawan”. Niruptin, angelga aywacunshi Mariacagpita.

³⁹Chaura chay junagcunalam, Mariaga wayrala aywara Elisabet yachrangancagta. Chay marcaga cara Judea ninganchrüga mas altunpam.

⁴⁰Nä Zacariaspa wayinman María chrarurga, Elisabettam “Wayilayman. ¿Alilachu cayanqui?” nirun.

⁴¹Chaura Mariapa shiminta mayaruptinga, Elisabetpa pachranchru wamrasi jucnuypash cuyurura, jinaman chayürash Elisabetga Santu Espiritupa munayninchru ricacarura.

⁴²Chauraga gapachracuypa niragshi Elisabetga Mariata nirun: “Lapan warmicunapitas mas alinninpag ricasham gamga cayanqui Diospita, jinaman alipag ricasham cayan pachraychru wawaysi.

⁴³¿Pitag cä nogaga Munayniyognïpa maman nogaman shamunanpagga?

⁴⁴Gampa shimiquita mayaruptïga, juclam pachrächru wamräsi jucnuypa cuyurirun cushicuypita.

⁴⁵Chauraga alisca cushicuy Munayniyog Dios willashungayta chrasquicungaypita, Diosga nishungaynuymi ruranga”.

⁴⁶Niptin Mariaga cay ninmi: “Lapan shongöpam alawayä Diosta,

⁴⁷Nätan cushirayäsi aliscam Tayta Dios salvamagnï captin,

⁴⁸caynuy manacag warmilatas rircärimanganpita. Cananpitaga lapan casta runacunas ‘Ima cushisharag cayan chay warmi’ nipäcamangam.

⁴⁹Munayniyog ima-aygatas ruray atipag Diosmi nogachru rurarun ima-aygatas. Paypagga jutinsi ‘Lapan juchapita caruchru cayag’ nisham.

⁵⁰Payta manchacugcunataga chaynuylam Diosga cuyapayan imay aygaysi.

⁵¹Ima-aygatam mana rurashachu munayninman. Payga manacagmanmi muyuchin olgotucug runacuna ima-aygata rurapäcunanpag pinsiarcayangantas.

⁵²Payga munayniyog mandagcunatas jitarisham mana mandag cananpag. Nätan manacagpag ricashacunatam mas alipag ricachin.

⁵³Payga micuypita nacagcunatas capogniyogmanmi muyuchin, nätan capogniyogcunatam mana imaynagman muyuchin.

⁵⁴Payga yanaparam servignin Israelta jutiyog runatas. Jinaman chaynuy cuyapayälarmi yanapara imaysi.

⁵⁵Chaynuy imaycamas cuyapänanpagmi nira unay taytanchicunata, taytanchi Abrahamta, jinaman castan aywagta” ninmi.

⁵⁶Chaychrüga María, Elisabetwan yachrara quima quillanuyran. Chaypitaran cutira wayinta.

⁵⁷Nätan Elisabetpa gueshyacunan quilla ayparamuptinga, gueshyacurura olgo wamratam.

⁵⁸Chayta mayarärirga castancuna, jinaman wayincagpa yachragcuna aliscam cushicarärira Elisabetwan, Munayniyog Dios payta cuyapälar, chaynuy ruranganpita.

⁵⁹Chaypita wamra nä puwag junagniyog cayaptinmi, apapäcura costumbrincunanuy señalächig. Chaychru runacunaga wamrapa jutinta chrurayta munapäcura taytan Zacariaspa jutilantam.

⁶⁰Chaymi Elisabetga nira: “Manam Zacariaschu jutinga canga, antis Juanmi”.

⁶¹Niptinmi runacunaga nirärin: “¿Imanir? Castaycunachrüsi mana ‘Juan’ jutiyog cayaptinga”.

⁶²Chauraga taytan Zacariastam tapupäcura sëñasyaylapa: “¿Ima jutin canantam munayanqui?” nir.

⁶³Chaura taytanga manarura tacsa tablalatam, jinamanmi goräriptinga chaychru isquirbirura: “Paypa jutinga Juanmi” nir. Chaura chaychru cayagcunaga lapansi mayacasha niragmi quëdarärira.

⁶⁴Chaylam Zacariaspa shimin yapay rimariramura, Diosta alawayar.

⁶⁵Chauraga lapansi wayin lädunpa yachragcuna mayacasha niragmi capäcura. Jinarcurmi Judeachrüga limpu mayachinacarärira Zacarías yachrangan jircacunapa.

⁶⁶Chauraga lapan mayacugcunas shongolanchrümi nipäcura: “¿Imarag wara raswa chay wamra canga?” nir. Nätan “Razonpam chay wamraga cayan Munayniyog Diospa maquinchru” nir.

⁶⁷Chaypitam wamrapa taytan Zacariasga Santu Espiritupa munayninchru cayar rimara cay nir:

⁶⁸“Alisca ali nisha cachun noganchi Israel castapa Munayniyog Diosninchi, noganchi runancunata ricamänanchipag, jinaman jucpa munayninpita jorgamänanchipag aywamunganpita.

⁶⁹Canan noganchiman cachraramun juc munayniyog salvacugtam, Diospa servignin Davidpa ayllun castapita.

⁷⁰Caynuy cananta Diosga nämi rimachisha cara Dioslapag cawag willacugnincunawan,

⁷¹Mana ricapuy munamagninchicunapita, jinaman lapan chregnipämagninchicunapita salvamänanchita;

⁷²Unay awillunchicunata cuyapänanpita, jinaman rimanacunganta razonpa rurananpag mana gongananpita.

⁷³Nätan taytanchi Abrahamtasi ‘Niyangagcunata razonpam rurashag’ nirmi Diosga cay nira:

⁷⁴‘Cachramushag juc salvacugtam chregnishugniquicunapa maquinpita jorgopäshunaypag, jinaman mana mancharilar servipacamänaypag’.

⁷⁵Paypa naupanchru mana juchaynag, jinaman lapan junagcunas cawayanganchicama alita rurayar cananchipag.

⁷⁶Nätan gam, wamräga, jana pachachru cayag Diospa willacugnin nisham canqui. Chaynuy nipäcushunqui munayniyog shuyacuyanganchi chrämunanpag runacunata camariptiquim.