Luge 1:27-76

²⁷Amo moilaiga, a:fini dunuga hamedafa dawa:digi, ea dio amo Meli, esalu. Meli da Yousefe, (Da:ibidi aowa) ema sia:sili esalu. A:igele dunu da amo a:finima sia:musa: misi.

²⁸Doaga:le, e da Melima amane sia:i, “Olofosu da dima diala! Gode da di noga:le ouligisa! E dima hahawane hou bagade iaha.”

²⁹Amo sia: nababeba:le, Meli da fofogadigili, beda:iwane amo sia: ea bai dawa:lalu.

³⁰Be a:igele dunu da bu adole i, “Meli! Mae beda:ma! Gode da dima hahawane hamoi dagoi.

³¹Di da abula aguni, dunu mano lalelegemu. Di da amo manoma Yesu dio asulimu.

³²E da gasa bagade hamomuyo. E da Gode Gadodafa Ea Egefedafa Dio lamu. Hina Gode da Ema Hina Bagade Hou, Ea siba osobo bagade fi eda Da:ibidi ea hou agoane, Ema imunu.

³³E da eso huluane mae fisili, Ya:igobe egaga fi, ilima Hinawane esalumu. Ea Hinadafa Hou da hamedafa dagomu.”

³⁴Be Meli da bu adole ba:i, “Abolebela:? Na da dunu hame fiba:le, na da habodane mano lama:bela:?”

³⁵A:igele dunu da bu adole i, “Gode Ea A:silibu Hadigidafa da dima misini, di da Gode Ea gasa bagade hou dawa:mu. Amasea, mano dudubu dia hagomo ganodini hamoi da lalelegesea, ilia da Ema Gode Egefedafa dio asulimu.

³⁶Diaba Ilisabede dawa:ma. E da aligime, amola mano lamu hamedei ilia sia: daha. Be e da wali oubi gafeyale gala abula agui ba:i dagoi.

³⁷Liligi afae Gode da hahamomu hamedei da hamedafa gala.”

³⁸Amalalu, Meli da amane sia:i. “Na da Hina Gode Ea hawa: hamosu a:fini. Dia sia:i defele amo nama doaga:mu da defea.” Amalalu, a:igele dunu da fisili, asi.

³⁹Fonobahadi ouesalu, Meli da ea liligi momagele, moilai amo da Yudia goumi soge ganodini galu amoga asi.

⁴⁰Segalaia ea diasuga doaga:le, ganodini golili sa:ili, e da Ilisabede gousa:le nonogoi.

⁴¹Meli ea asigi sia: nababeba:le, mano dudubu Ilisabede ea hagomo ganodini dialu da liligilalebe ba:i. Gode ea A:silibu Hadigidafa da Ilisabede ea dogo nabala misi.

⁴²Ilisabede da ha:giwane wele sia:i, “Di da eno uda ilia hahawane hou baligi dagoi. Dia mano lalelegemu da hahawane bagade.

⁴³Na Hina Gode Ea eme nama gousa:la misunu, na da defele hame galebe.

⁴⁴Be dia asigi sia: na nababeba:le, mano dudubu na hagomo ganodini diala da hahawaneba:le liligilalebe ba:i.

⁴⁵Gode Ea dima sia:i da dafawane ba:mu. Dia amo dafawaneyale dawa: beba:le, di da hahawane bagade uda!”

⁴⁶Meli e amane sia:i, “Na asigi dawa:su amoga na da Godema nodosa.

⁴⁷Gode na Gaga:su Dunu na dawa:beba:le, na a:silibu da hahawane bagade.

⁴⁸E da na, Ea fonoboi hawa: hamosu uda dawa:iba:le, na da hahawane bagade. Waha winini dunu huluane da na da hahawane bagade, ilia da sia:mu.

⁴⁹Bai Gasa Bagadedafa Gode da nama gasa bagade hou hamoi dagoiba:le. Gode Ea Dio da Hadigidafa.

⁵⁰Musa dunu fi bogole, eno fi dialu, dunu fi huluane Ea hou ilia nodone hamosea, ilima E da Ea gogolema:ne olofosu hou olelesa.

⁵¹Ea lobodafa molole, E da gasa fi dunu huluane eno sogega sefasi dagoi.

⁵²E da gasa fi hina dunu banenesi dagoi. Be hou fonoboi dunu E da gaguia gadoi.

⁵³Dunu ha:i ilima E da ha:i manu ida:iwane iasu. Be bagade gagui dunu amo E da da:i nabadowane hamone, sefasi.

⁵⁴Ninia aowalali ilima E da hahawane dogolegele imunusa: sia:beba:le, amo hahawane hou huluane E da hahamoi dagoi. E da Ea hawa: hamosu fi Isala:ili amo fidimusa: misi dagoi.

⁵⁵E da A:ibalaha:me amola ea fi huluane ilima Ea asigi amola gogolema:ne olofosu hou olelei. Amo hou E da mae fisili, eso huluane hamonanumu.”

⁵⁶Meli da Ilisabede ea diasuga oubi udianawane ouesalu, ea diasuga buhagi.

⁵⁷Amalalu, Ilisabede ea mano lamu eso doaga:beba:le, e da dunu mano lalelegei.

⁵⁸Ilisabede ea fi amola na:iyado da Hina Gode Ea ema fidisu hou nababeba:le, ilia da huluane gilisili nodoi.

⁵⁹Mano da lalelegele, hi afae aligili, ilia amo mano ea gadofo damuni fasimusa: misi. Ilia ea eda dio (Segalaia) amo ema asulimusa: dawa:i galu.

⁶⁰Be ea ame amane sia:i, “Hame mabu! Ninia Yone dio ema asulimu.”

⁶¹Ilia bu adole i, “Abuliga! Dia fi amo ganodini, dunu amo da Yone dio asuli da hamedafa.”

⁶²Amalalu, ea eda da ema dio asulima:ne, ilia loboga adole ba:i.

⁶³Amalalu, Segalaia da ilima meloa lale ima:ne ado ba:i. Amoga e amane dedei, “Ea dio da Yone!” Ilia bagadewane fofogadigi.

⁶⁴Dedenanu, Segalaia da ea sia: hedolowane bu lale, Godema nodone sia: i.

⁶⁵Ilia na:iyado dunu huluane da bagadewane beda:i. Amo mabe hou huluane, Yudia goumi soge ganodini fi esalu dunu da bagadewane sia: dasu.

⁶⁶Amo hou nabi dunu huluane dawa:lalu, gilisili sia: dasu, “Amo mano da adi hou hamoma:bela:?” Bai Hina Gode Ea gasa bagade hou da amo mano fidibiba:le, ilia noga:le ba:i dagoi.

⁶⁷Yone ea eda Segalaia da Gode Ea A:silibu Hadigidafa amoga nabaiba:le, Gode Ea sia:ne iasu amane ba:la:lusu sia:i,

⁶⁸“Ninia Hina Gode, Isala:ili fi ilia Godema nodone sia:ma! Bai E da Ea fi dunu fidimusa:, amola bu bidi lamusa: misi.

⁶⁹E da gasa bagade Gaga:su dunu ninima i. Amo da Ea hawa: hamosu dunu Da:ibidi egaga fi.

⁷⁰E da hemonega, Ea balofede dunu ilia lafidili amane ilegele sia: i,

⁷¹‘Na da dilia ha lai dunu amo ilia dilima mae hasalima:ne, Na da dili gaga:mu.’

⁷²E da ninia aowalali dunu ilima gogolema:ne olofosu hou imunu sia:i. Amola E da Ea sema Gousa:su hamoi amo hame gogolemu sia:i.

⁷³Ninia siba eda A:ibalaha:me ema E da sia: dafawane ilegele sia:i,

⁷⁴amane, E da ninia ha lai dunu nini mae medoma:ne, E da nini gaga:mu, amola ninia da mae beda:iwane Ea hawa: hamonanuma:ne logo doasima:ne sia:i.

⁷⁵Amasea, ninia da Ea midadi hou ida:iwane amola hadigiwane hamosa, fifi ahoanumu.

⁷⁶Di, na mano, di da Gode Gadodafa amo Ea balofede dunu amo ea dio lamu. Di da Hina Gode bisili, Ea logo fodomusa: masunu.