San Lucas 1:27-76

²⁷maza nimpihsh ashampara kwinta kinpa. Usne María munta. Mama ampukasa pittachi. Usne maza ampura kasara kin namtɨt azi. Sun ampune José munta. Paiña ira pampa Davidne mikwa arakwain.

²⁸Ángelne María tukin nap kit kaizta: —Kakishapu. Diosne nua wat kit kit kiwainshimtu. Anpatne nua pashit kit nukasa ɨmtu, kizta.

²⁹Ángelta iztane, Maríane ishkwat kit ángel kaiztu aizpa minta. “¿Usne chikishma sun nawa kwinta kimtu?” minta.

³⁰Suasne ángelne ussa kaizta: —María. Ishkumun. Diosne nua wat kit kit kiwainshimtu.

³¹Mɨri. Mane nune pɨjakasa anpai. Painkul mɨjanpai. Ussa Jesús munnaka.

³²Usne tɨnta namnazi, chiyuras amtu akwa. Usne chiyuras Dios Painkul munnazi. Anpat Diosne ussa Davidkin anza katsa mikwakana namnazi, Davidkanain ɨninapa.

³³Usne pailta payukima Israelpa kwalta ɨninnanazi. Paiña ɨnintu aizpa pailmanazi, kizta.

³⁴Suasne Maríane ángelta mɨmara: —Ampu mɨjkine, ¿mizama painkul mɨlnapai? kizta.

³⁵Ángelne ussa sɨnkara: —Diosne Sɨnam Izpul akwa nu tukin anazi. Katsa Diosne nua tɨnta kiwainazi, pashpa pɨja wanapa. Katmizna up kawintu pashpane Dios pashimtu aizpa kinazi. Dios Painkulkas munnazi.

³⁶Na nua kaiztu aizpa mɨri. Up kwal, Isabelne, ɨnkwa i. Wan awane ussa “Pashpa wasachi,” kizara. Maneme usne seis mish pɨja warɨt tu.

³⁷Diosne chikas wantain kishinai.

³⁸Suasne Maríane ussa sɨnkara: —Nane ap Anpatpa kiwainmumika ish. Watcha, nune nawa kaizta aizpa sari, kizta. Suasne ángelne ɨrɨt.

³⁹Sun payune Maríane wan watsat kit maza pɨpulukin Judea ɨnkal sura azain ɨrɨt.

⁴⁰Zacaríaspa yalta nap kit Isabelta kaizta: “Manta kail ish,” kizta.

⁴¹Isabel Maríawa pit mɨrane, paiña pashpa pɨjakin kialta. Suasne Dios Sɨnam Izpulne Isabelta pizta.

⁴²Suasne usne tɨnta kaizta: —Diosne wan ashampakin nua anza watsal kiwainnazi. Diosne nu mɨltu pashpara wat kiwainazi.

⁴³Ap Anpatpa akkuhsh nawa kwinta kin at akwa, kwisha wat kultus.

⁴⁴Mɨri. Nu nawa kakishapu kiztawane, ap painkulne pɨjara tɨnta kialta. Usne watsal kultuazi.

⁴⁵Ap Anpatne nua kin namtɨt aizpa kinazi. Nune wat kulnazi, us kin namtɨt aizpa nɨjkulta akwa, kaizta.

⁴⁶Suasne Maríane min kit paiña kaijchuras kaizta: “Ap Anpat katsa i.

⁴⁷Ap Diosne, ap watsat mɨlmumikane, kwisha wat i, nawa kwisha wat mintɨt akwa.

⁴⁸Usne nawa, paiña kiwainmumikasha, kiwainshira. Makis wan awane nawa kaizanazi: Diosne ussa wat ashampa namninta.

⁴⁹Ap katsa Diosne na akwa akkwan kirɨt. Usne sɨnammika muntɨt.

⁵⁰Usne wan Diosta wat minturuzakas Diosta wakpuj wainamtuzakas iznat kit kiwainanazi.

⁵¹Usne katsa kal sara. Diosne anza katsa mintuza an ainkinkanain namninnara, uspa minñara aizpa kiamanpa.

⁵²Usne katsa mikwaruza uspa ɨninmukis taizninnanazi. Usne kiwaintuza watsat mɨlnara.

⁵³Usne chiwazha we mɨjtuza wan mɨlanara. Usne kwazpa awaruza kɨlmin ɨninnara.

⁵⁴Usne paiña Judío kwaltuza, paiña kiwaintuza, pailta payurakima kiwainnara.

⁵⁵Sunkanain usne au an ñancha ira kwaltakas Abrahamtakas Abrahampa kwizta kwal uzamturuzakas kin namnara.”

⁵⁶Isabelkasa kutña mish uztawane, Maríane papihshpa yalta kailta.

⁵⁷Sunpawa payu pailtɨkane, ishtu kirɨkane, Isabelne paiña painkul nishta.

⁵⁸Dios ussa wat kirɨt aizpa mɨarawane, kasha izmuruzkas kwaltuzkas kaizara: “Au Anpatne nu wat kirɨt. Uspane uskasa wat kularɨt.”

⁵⁹Ocho payu pailtawane, uspane ampu pashpara muara, pashpa aya tɨtnapa, circuncisión kinpa, Judío awaruza ɨnintɨt aizpa kinpa. Uspane kaizara: “Usne Zacarías papihshkanain munnazi.”

⁶⁰Paiña akkuhshne kaizta: —Zacarías munnachi. Juan munnazi, kizta.

⁶¹Uspane ussa sɨnkaara: —Up kwalne sun mun mɨjchi, kizara.

⁶²Suasne papihshta saiaat kit mɨmaara, ¿Miza munashinasa, awa piankamanapa?

⁶³Usne pɨnkɨh paikwat kit para: “Usne Juan mun i.” Wan awane iztaspaarɨt.

⁶⁴Sun urain Zacaríasne paiña pit ɨsak kit paiña yankwija chɨhkul kit kaizta: —Diosne kwisha wari, kizta.

⁶⁵Suasne wan kasha izturuzne iztaspaarɨt. Wan awane Judea ɨnkal sura sun kirɨt aizpa wantuza kwinta kinara.

⁶⁶Sun kwinta mɨmturuzne usparuzpain mɨmaara: “Sun pashpane ¿Chima kinazi?” kizara. Dios ussa kiwainshimtu akwa, Diosne an pashpara an tɨnta namnazi.

⁶⁷Zacaríasne, pashpawa papihshne, Dioskasa paramtu uzta. Dios Sɨnam Izpulne ussa piz kit kiwainmɨzta. Zacaríasne Dios akwa parat kit kaizta:

⁶⁸“Judío awawa Diosne, au Anpatne, kwisha wari. Usne apain at kit paiña kwaltuza watsat mɨlnanazi.

⁶⁹Usne tɨnta watsat mɨltamikasha ɨninta. Sun kiwainmikane ñamin pampa Davidpa kwal i.

⁷⁰An ñamin Diosne paiña kainammtuz akwa sun pit kin nam kit kaizta:

⁷¹Usne aumɨza watsat mɨlnashina, aliz awa aumɨza anuppamanpa, aumɨza aliz kulamanpa.

⁷²Diosne sunkas kaizta: au ira kwaltuza nanat kit kiwainanash. Uruza kin namtɨt aizpa mainmanash.

⁷³Sun pitmin au papihshta, Abrahamta, sunkana tɨnta kaizta:

⁷⁴Usne aumɨza watsat mɨlnanazi, waya kimtuz aumɨza chinkas kiamanpa. Usne aumɨza paiña kiwainmu namninnanazi, paiña kal kianapa, ishkwatchin.

⁷⁵Dios iztakin uzamtuasmin, aune pailta payukima us wat kuruntu aizpa kiat kit Diosta wakpuj waintamakpas.

⁷⁶Mane nua, ap painkul pashpara paranash. Nune chiyuras kainammmika munnazi. Nukas up Anpatpa miwara an ñancha ɨnazi, paiña mi watsanapa.