Lukas 1:27-76

²⁷Ren seripein makelekel amen, me kisin nin ong ol amen, me mar a Iosep, kisan kadaudok en Dawid; seripein makelekel o adaneki Maria.

²⁸Tounlang o kotilong ong nan deu a masani ong i: Kaselelia Maing, kom meid pai, Kaun o kotikot re omui! Kom meid pai nan pung en li akan!

²⁹A lao kilanger i, o rongadar a masan, ap masapwekadar madamadaua: Duen song en ranamau o.

³⁰A tounlang masani ong i: Maria, ender masak, pwe komui me konekonelar ren Kot.

³¹A kilang, komui pan liseanda o naitikeda seri ol amen, a komui pan ki ong mar a Iesus.

³²Nan i me pan lapalap, o a pan maraneki Sapwilim en Kaun lapalap, o Kaun Kot pan kotiki ong i mol en sam a Dawid.

³³O a pan kakaunda kadaudok en Iakop kokolata, o sapwilim a wei sota pan imwila.

³⁴Maria ap masani ong tounlang o: Daduen mepukat pan kak wiaui, aki i sasa ol amen?

³⁵Tounlang o kotin sapeng masani ong i: Ngen saraui pan kotin ti po omui o roson en Kaun lapalap pan kipa komui di, i me saraui o, me pan ipwi sang komui, pan maraneki: Sapwilim en Kot.

³⁶O masani, ri om Elisapet pil liseandar ni a likailapala, a pan naitikeda seri ol amen, a kawonu en saunipong ansau wet; iei i me dapwan,

³⁷Pwe sota meakot, me Kot sota kak ong.

³⁸A Maria potoan ong: Masani, ngai lidu en Kaun o; en wiaui ong ia duen omui masan. Tounlang o ap kotila sang re a.

³⁹I ran oko Maria madang kotila pon nana o nan kanim en Iuda eu,

⁴⁰Ap pedelong ong nan im en Sakarias o ranamau ong Elisapet.

⁴¹Kadekadeo Elisapet lao ronger en Maria a ranamau ong i, seri o ap mokideda nan kaped a; a Elisapet ap direkila Ngen saraui,

⁴²O ngil laudeda masani: Komui meid pai ren li akan, o meid iasanai ipwin kupur omui!

⁴³A iaduen pai wet a ko sang ia, pwe in en ai Kaun koti dong ia?

⁴⁴Masani, ni ai ronger omui ranamau, seri o ap mokideda nan kaped i aki a peren.

⁴⁵O komui meid pai, pweki komui poson! Pwe a pan pwaida, me Kaun o kotin masani ong komui.

⁴⁶Maria ap masani: Lol ai kapinga Kaun o,

⁴⁷O ngen i perenki Kot ai Saunkamaur.

⁴⁸Pwe a kotin kupurala sapwilim a lidu tikitik o. Kilang, sang met o kokolata di karos pan kapai kin ia,

⁴⁹Pwe a kotin wiaer song en manaman ong ia, me lapalap o mar a me saraui.

⁵⁰A kotin kalangan ong di karos kokolata, ong irail me kin lan i.

⁵¹O a kotin wia kida lim a manaman akan. O a kotin karawan pasang, me kin lemai nan mongiong arail.

⁵²A kotin sikin wei saupeidi kan sang mol ar, ap id kasapwilada me tikitik kan.

⁵³A kotin kamede kida kapwa me men mangadar akan, ap kotin kadarala kaip me kapwapwa kan.

⁵⁴A kotin upor kin sapwilim a ladu Israel, o kotin tamataman a kalangan,

⁵⁵Duen a kotin masani ong sam atail akan, ong Apraam o kadaudok a kokolata.

⁵⁶A Maria kotikot re a saunipong silu, ap purelang im a.

⁵⁷Ari, ansaun Elisapet leler pwen naitik, a naitikeda seri ol amen.

⁵⁸O men imp a kan o sau i rongadar, me Kaun o kotin kupura i, rap iang i peren kida.

⁵⁹Kadekadeo auel en ran o re pwara dong sirkomsais seri o; ir ari ki ong mar en sam a Sakarias.

⁶⁰A in a sapeng indada: O kaidin, pwe a pan maraneki Ioanes.

⁶¹Irail ap indang i: Nan sota sau om men me maraneki met.

⁶²Irail ap olol ong sam a, duen me a mauki, seri en adaneki.

⁶³I ari poeki slet eu, ap intingiedier o masani: A pan adaneki Ioanes. Irail karos ap puriamuiki.

⁶⁴A madang silang i wasok pasang o tenap a sapadokada; i ari masani o kapinga Kot.

⁶⁵A masak kipadi karos, me kaukauson imp ar, o wiawia pukat lolok sili pon nana en Iudäa karos.

⁶⁶A karos me rongadar, kin nekinekid nan mongiong arail, indada: Da me seri men et pan wiala? Pwe lim en Kaun o kotin iang i.

⁶⁷A sam a Sakarias direkila Ngen saraui ap kokopada masani:

⁶⁸Kapinga ong Kaun Kot en Israel, pwe a kotidier ren sapwilim a aramas akan dore ir ala.

⁶⁹O kotin wiadang kitail kamaur patail sang nan kadaudok en sapwilim a ladu Dawid.

⁷⁰Duen a kotin masanier ren sapwilim a saukop saraui kan, sang tapin kaua kokodo,

⁷¹Me a pan kotin dore kitail la sang ren atail imwintiti o sang nan pa en me kailong kin kitail,

⁷²O kotin kalangan ong sam atail akan, o kotin kupureda a inau saraui,

⁷³O kaula eu, me a kotin kauki ong sam atail Apraam, en kotiki ong kitail.

⁷⁴Pwe sen dore sang nan pa en atail imwintiti, ap papa i so masak,

⁷⁵Nin tiak lelapok o pung mon silang i ran karos kokolata.

⁷⁶A koe nai seri pan adaneki: Saukop en me lapalap o, pwe koe pan tiong mon silang en Kaun o, pwen kaonopada sapwilim a al akan.