Luk 1:27-76

²⁷I han tetek a basbas a risana e Maria, ning di ka suah alar tari sur ane Josep, i ning tagun a mangis a tarai ane king Dewit.

²⁸A angelo i han tetek e Maria pa i atai i mange, “Ur gas, u angis kol! A Leklek i kes taum hom.”

²⁹Pa e Maria i nuknuk loklokron kol ana warwara ne, mang asa a kamkamna.

³⁰Pa a angelo i atai i mange, “Maria, gong u matmataut, e God i gas kol hom.

³¹Longori! Ur tianan, ur agon pas a kaklik barsan, pa ur pasar a risana e Iesu.

³²Pa a risana ir rarang, pa dir atongi mang a Nat e God i Leklek Kol. Pa a Leklek e God, ir akesi ana keskes a king ane tubuna e Dewit,

³³pa ir king tikin ana mangis a tarai ane Jekop, pa anuna matanitu bel ir rarop.”

³⁴E Maria i deken a angelo mang, “Ir mangmangasa? Anasa bel a lasan taum ana ta barsan.”

³⁵A angelo i kelesi mang, “A Talngan Tabu ir kes hom, pa a rakrakai e God ir poroi alar u. Larning a Tena Totoh ning ur agon pasi, dir atongi mang a Nat e God.

³⁶Oroi, a maim e Elisabet ka lapun, pa di atongi mang a pombo, ika anone ka tianan, pa ka diono na kalang anunai.

³⁷Anasa bel ta utna i ngangaten tetek e God.”

³⁸Pa e Maria i atongi mang, “Iau a tena titol oros anuna Leklek, i wakak ka ning dir toli hok arlar ana numa warwara.” Lamur a angelo i han kusuni.

³⁹Lamur e Maria i sang pas, pa i han kas kapit sur a hanua ning i kes saot na mangir ana papar Judia.

⁴⁰I kas ana rumai ane Sekaria, pa i kabah na gasgas pas e Elisabet.

⁴¹Ning e Elisabet i longor a arkabah na gasgas ane Maria teteki, a kaklik i pele ting na balana, pa e Elisabet i bukus ana Talngan Tabu.

⁴²Pa i warwara ana tnan elngena mang, “U angis tan a gurarala rop, pa a kaklik otleng ning ur agoni i angis.

⁴³Iau esi na ngas a hane ne ning e tana Leklek anuki ir han tetek iau?

⁴⁴Ning a longor anuma arkabah na gasgas tetek iau, a kaklik i gas, pa i pele te na balak.

⁴⁵U angis anasa u tortorot mang a warwara anuna Leklek tetek u ir hanot momol.”

⁴⁶E Maria i atongi mang, “A inguk i aleklek pas a Leklek,

⁴⁷pa a balak i gas o e God, anuka Tena Alaun,

⁴⁸anasa i maris iau anuna tena titol oros, ning iau a hane oros ka. Turpasi anone a mangis a taraila rop lar atongi hok mang a angis,

⁴⁹anasa Esi ning i Leklek Kol, ka tol tar a tatatnan utnala hok, a risana i totoh.

⁵⁰Anuna marmaris i kes tetek la ning la hanrawai i, i kes tetek a tarai tagun onone, pa tagun lamur.

⁵¹I tol a rakrakai a titol ana kuna, pa ana rakrakaina i minggen sarara la ning la rakan aleklek la ana nuknukinla.

⁵²I minggen purum a kingla kusun anunla keskes a leklek, pa i aleklek pas la ning di nuki mang a tarai oros ka.

⁵³I tabar a kapan a tarai ana wakak a ututnala pa i sune sen a leklekla ana wah a kunla.

⁵⁴I nangan anuna tena titolla, a tarai Israel, pa i nuk pas anuna marmaris

⁵⁵tetek e Abaram pa anuna mangis a tarai tikin, larning ka atong tari tetek anundala mangis a tarai tagun nating.”

⁵⁶Pa e Maria i kes napirna e Elisabet arlar ana natol a kalang, pa lamur i ulak sur anuna hanua.

⁵⁷Ning a pukakiar ane Elisabet i sot sur ir agon onoi, i agon pas a kaklik barsan.

⁵⁸A halalna pa na mainala la longori mang a Leklek i maris kol e Elisabet, pa la gas taum onoi.

⁵⁹Ning ka siwal a pukakiar anuna kaklik, la sang sur dir kot talilisi, pa la mang sur lar pasar a risana e tamana e Sekaria onoi.

⁶⁰Ika e tana i atongi mange, “Gong! A risana ot e Jon.”

⁶¹La atongi tana mang, “Bel ta maim i kibas a rising ning.”

⁶²Lamur la tol a asilang ana kunla tetek e tamana, sur lar dekeni mang esi na rising ning i mang sur dir pasar a kaklik ono.

⁶³Pa i akinalang sur ta utna ning ir tumtumus onoi, pa i tumusi mang, “A risana e Jon.” La rop la kulkulan.

⁶⁴Ono otne a pahana e Sekaria i sapang, pa a laigeremna i tapalas, pa i warwara kakat, i atong leklek pas e God.

⁶⁵Pa na halalindiau rop, la matmataut kol. A warwarala ana ututnala ne, i han sarara ana hananuala ning la kes saot na mangir ana papar Judia.

⁶⁶La rop ning la longori, la nuknuk kol onoi, pa la atongi mang, “A kaklik ne ir hanot esi na ngas a barsan?” Anasa la oroi mang a rakrakai ana Leklek i kes onoi.

⁶⁷E Sekaria e tamana e Jon, i bukus ana Talngan Tabu, pa i warwara na propet mange,

⁶⁸“Dalar aleklek pas a Leklek, a God anuna tarai Israel, anasa ka hanot tetek anuna tarai, pa ka alangolango pas la.

⁶⁹Ka saran tar a rakrakai na Tena Alaun tetek dala, tagun a mangis a tarai ane Dewit, anuna tena titol,

⁷⁰larning ka atong tari nating ot ana pahana nuna totoh a propetla.

⁷¹Ka saran tari sur ir alaun pas dala kusun anundala hiruala, pa kusun a kunla rop ning la nget dala,

⁷²pa sur ir maris anundala mangis a tarai tagun nating pa ir tolsot pas anuna totoh na kunubus.

⁷³I lele tar tetek a tubundala e Abaram,

⁷⁴mang ir alaun dala kusun a kuna nundala hiruala, sur dalar titol teteki pa bel dalar matmataut.

⁷⁵Dalar titol teteki ana toltol ning i totoh pa i tostos namatana, ana nundala pukakiarla na lalaun rop.

⁷⁶Pa u a natuklik, dir atong u, a propet ane God i Leklek Kol, anasa ur han nigo tana Leklek, sur ur tol nigon anuna ngas,