SAN LUCAS 1:27-76

²⁷ra nuu ti badu dxaapa lá María ni ma yenaba ti hombre lá José laa para ichaganá'. Za José de lade xfamilia David.

²⁸Ora biuu ángel que ra nuu be bigapa diuxi laabe ne na: ―Ma ulí Dios lii, María. Dichosa lii lade irá xixé gunaa.

²⁹Nabé bidxagayaa be ni gudxi ángel que laabe, ne candaa ique né be xiñee bigapa diuxi laabe zaqué.

³⁰Para na ángel que: ―Cadi idxibi lu, María. Ma uluu Dios ndaaya lii.

³¹Chi aca xiiñi lu' ne zapu ti badu huiini'. Cuee lá lu laabe Jesús.

³²Zaca be nandxó' ne zabí cabe laabe Xiiñi Dios ni nuu ibá'. Ne zucuí Dios laabe de rey ra gurí bixhoze gola be David.

³³Zaca be rey sti irá cani za de Israel, ne qué ziuu dxi guiasa be. Qué ziuu dxi guiaana dxí be de guni mandar be.

³⁴Para na María rabi ángel que: ―Ximodo zanda gaca ndi ya', purti binni dxaapa naa.

³⁵Oraque na ángel que rabi laabe: ―Zeeda Espíritu Santu luguiá lu' ne zutaagu enda nandxó' sti Dios lii. Nga runi zaree chu badu huiini ca para Dios, ne zabi cabe laa Xiiñi Dios.

³⁶Laca ma naca xiiñi Elisabet lisaa lu', neca ma nagola. Na nda cabe qué zanda gapa be ba'du', peru ma ze be xhoopa beeu de naca xiiñi be.

³⁷Purti para Dios gasti ni nagana.

³⁸Oraque na María: ―Rarí nuaa para gune ni na Dios. Zaa gaca casi nou' ca. Nga si bina diaga ángel que, biree ze'.

³⁹Ca dxi queca nagueenda biree María uyé ti guidxi huiini de Judea, nuu lade dani.

⁴⁰Ora yendá be ralidxi Zacarías biuu be, bigapa diuxi be Elisabet.

⁴¹Casi bina diaga Elisabet stiuxi be biniibi dxacha badu huiini que ndaani', ne bidxá ladxidó' Elisabet de Espíritu Santu.

⁴²Ne bicaa ridxi: ―Dichosa lii lade irá xixé gunaa ne dichoso badu huiini naca xiiñi lu ca.

⁴³Paraa biree razón gueda ganna jñaa Señor stinne naa.

⁴⁴Purti casi bina dia'ga stiuxi lu' biniibi badu huiini ri ndaane de enda nayeche'.

⁴⁵Dichosa lii ti bini cre lu', purti zaca ni gudxi Dios lii.

⁴⁶Oraque na María: De idubi xhialma rusisaca Dios.

⁴⁷Ne rieche né ladxiduá' Dios ni beda ulá naa.

⁴⁸Nuaa para gune xhiiña be, ne qué risaca dia', peru bilabi be naa. Dede yanadxí irá xixé binni ibani ndaani guidxilayú zabi naa dichosa.

⁴⁹Purti cadi ni guiete chupa chonna gubidxa si ndi ni bi'ni be luguia'ya'. Nandxó' Dios, ne iruti ru casi laa.

⁵⁰Qué ziuu dxi guiaana dxí be de ilasela'dxi be cani ridxibi laabe.

⁵¹Biiya pabiá' nandxó' ni bi'ni be: Bicheche ndase be cani rudxiiba laca laa.

⁵²Undisa be cani ma naca tuuxa de ra zuba, ne bidxiiba be cani qué rudxiiba laca laa.

⁵³Bichá tipa be ná cani candaana. Bidxigueta be cani napa bidxichi nisi ná'.

⁵⁴Ucané be cani za de Israel, ca xpinni be, ne bilasela'dxi be laaca',

⁵⁵casi bidii stiidxa be ca bixhoze gola canu, Abraham ne ca xiiñi', ne irá xixé ni za de laa.

⁵⁶Zacá nga bisisaca María Dios, ne biaana né Elisabet bia' chonna beeu. Oraque ru bigueta ralidxi.

⁵⁷Bizaa si xpeeu Elisabet beda gapa ti ba'du'.

⁵⁸Ora gunna ca xpecinu be ne ca lisaa be modo bilasela'dxi Dios laabe la? yeizaca ca laabe, ne bieche né ca laabe.

⁵⁹Lu xhono gubidxa guluu cabe seña sti Dios badu huiini que, ne ucala'dxi cabe nibee lá cabe laa Zacarías, lá bixhoze.

⁶⁰Peru na jñaa be co', iree lá be Juan.

⁶¹Para rabi cabe laa: ―Xiñee, purti iruti lá Juan lade ca lisaa lu'.

⁶²Oraque bi'ni cabe seña bixhoze be tu racala'dxi cuee lá laabe.

⁶³Para unaba bixhoze be ti tabla ne bicaa: “Iree lá be Juan.” Bidxagayaa ca binni que.

⁶⁴Ne casi pe biluxe bicaa Zacarías nga, ma gunda uní' sti tiru ne bizulú bidii diuxquixe Dios.

⁶⁵Nabé bidxibi ca xpecinu cabe ora bi'ya ca ni uca que. Ne yendá diidxa que irá ca guidxi nuu lade dani de Judea.

⁶⁶Ne irá ni gunna ni, undaa ique né ni, na: ―Tu nda gueda aca badu huiini ri ya'. Purti rihuinni dxichi nuu né Dios laabe.

⁶⁷Oraque bidxá ladxidó' Zacarías bixhoze be de Espíritu Santu ne uní' ni gudxi Dios laa,

⁶⁸na: Diuxquixe Señor, Dios sti ca binni Israel saca beda ulá ca xpinni.

⁶⁹De lade cani za de David ni bi'ni xhiiña be, ulee be tobi ni nandxó' para ulá laanu.

⁷⁰Ma xadxí bidii stiidxa be guseenda be laa. Uní' be ni de ruaa ca profeta stibe ni uyuu chiqué.

⁷¹Na be zulá be laanu de lu ná cani nanala'dxi laanu ne cani cuxhii laanu.

⁷²Ne ziá be ca bixhoze gola nu, ne zietenala'dxi be ni gudxi be laaca zuni be.

⁷³Nga nga ni gudxi be bixhoze gola nu Abraham zuni be.

⁷⁴Ne laca gudxi be laa zulá be laanu lu ná cani nanala'dxi laanu ti ganda guni nu ni na be sin idxibi nu laaca',

⁷⁵ne ti ganda ibani nu nayá, ne guiaana nu para laasi be bia' tiica dxi ibani nu.

⁷⁶Ne lii la? xiiñe huiine', zaree lá lu profeta sti Dios ni nandxó', purti zazá niru lu lu Señor, ne zuni chaahui lu neza tidi'.