Luk 1:27-76

²⁷Gesi wegi me te bidi Josepbolo noma po wai, te wegi nogi Maria dao, “Te wegi pageba po pusigi pao,” te Godigo te enselbolo te tama po wali.

²⁸Te bidi Josep te Devitgo hani bidi dao. Tama te ensel bidi Gebriel te Maria pageba pelama, “Giligade dao,” te po wali. “Genuai Bidigo nage megi hobede yalio, nage bugai homu yabo sę yalio. Aga nage dali bidibao,” wali.

²⁹Te wegi Mariago te po odobo si, aga homu tųą palio. Agai homugo e bidigo magi po nama wabowe, te homu yali.

³⁰Tama te ensel bidigo Mariabolo “Nage wi egio,” te po wali. “Godigo nage dali dwagi yai homu ebao.

³¹Edao! Nage haliga yaibao. Nage haliga elama, ogwa tega paibao. Te ogwa nogi nago Jisas poao. Aga genuai bidi bidaibao.

³²Tama Godigo te po waibao, ‘Aga nogi Genuai Godigo Ogwa dao,’ waibao. Godigo aga genuai bidi nigilaibao, aga nǫų Devitgo yali gilama.

³³Te tigidali sogo Jekopgo hanigo genuai bidi bidaibao. Aga te we bidi sesemane sogo tonaluaibao,” te enselgo te po wali.

³⁴Tama Mariago enselbolo te po hanalu wali, “Ena bidigo we menio. Tama magi ilama, tama tiwaibawe?”

³⁵Tama te ensel mobo bidigo po wei ponoyu, te po walio, “Te Godigo Mobo Bidi asama, tama agai bomogo nage mesegalueibao. Tama tibaso, nago tega pabo wai nogi Godigo nogi poaibao, ‘Dwai sę isąbo ogwa dao,’ waibao, ‘Te Godigo Ogwa dao,’ waibao.

³⁶Edao. Naga be bidi we Elisabet mosi dabe mu bidai goli, agai ogwa haliga elalubao. Polobadu augwaligo te wego wai ame nogobeo wai dao. Tiali goli, megi aga haliga elalubadi, polua a naga olama, me badu nogo deli polo pai dao.

³⁷Godigo me isiąwai sę me menio,” te ensel bidigo te po wali.

³⁸Tama Mariago te po wali, enselbolo, “E. Ena Genuai Bidi agai sę ebo we dao. Eno homugo nago enabolo wali po tų sisu pomai yaiba,” te po wali. Tama te enselgo Maria taga palio.

³⁹Te tamadi ganama, ensel dali po miani elalubadi, Maria aga Judia hanude bulu du meba palio.

⁴⁰Teba sabolama, aga Sekaraiago beba sabolama, Elisabetbolo “Giligade dao” wali.

⁴¹Tama Mariago “Giligade dao” wali po obadi, Elisabetgo haligade elaluali wai mobodo yalio. Te Godigo Dwagi Yai Mobogo Elisabet beasagasalio.

⁴²Tama Elisabetgo midigi sali, Mariabolo dagą olama, te po wai, “Te Godigo nage dali dwagi yai homu mu ebe yabao, gasa we dabe aiyaba elalualio. Nago uda haliga elalubo ogwago me tama naga te waibao, olo bidi dabe aiyaba elaluaibao.

⁴³Godigo ena te moni dwagi yai sę magi baso maniwe, te eno Genuai Bidi aga idago ena suagasali. Te ena genuai we menio.

⁴⁴Edao! Nago enabolo ‘Giligade dao’ wabo odama, eno haligade elalubo waigo dwagi yai homu eyu, mobodo yalio.

⁴⁵Genuai Bidigo nagebolo wali poba nago homu begi pai yabao. Tama teyu, nage bugai homu mu te ebao. Nosali Genuai Bidigo yaibao wali sę tų sisu paibao,” Elisabetgo te po wali.

⁴⁶Te Mariago te po wali, “Eno homugo da Genuai Bidigo nogi ugwaba sobao.

⁴⁷Tama eno nomago ena tau sabo Godibolo bugai homu mu ebao. Te ena agai sę ebo we da.

⁴⁸Tiali ena da, olo bage da. Tama agai ena kegeda pabo menio. Te megi me, nosali me bidibo we bidigo Godigo enabolo bugai homu mani po naga ola paibao. Magi baso meni.

⁴⁹Moni Bomai Godigo enabolo te genuai sę yali pode te obe dao. Agai nogi gasagi yai mu tedali dao.

⁵⁰Te God agai po tų sisu pabo we bidibolo agai olo tau sabo sę me, te iba bidada pabo bidigo ogwago ogwa dabego me, agai po tų sisu pidubaso da, agai tama tede piduabo tolai dao. Agai nogogo bomai sę yai dao.

⁵¹Po sela sąyu augwaligo augwa nogi kegenanu ebo bage agai augwali besela sąwai dao.

⁵²Agai gavman tobolu bidi dabe aiyaba elaluama, te nogi meni yai bidi nogi ugwaba sabo dao.

⁵³Agai te nasi ebo bidi dwagi yai naigo tabi pągąlobo dao. Agai te sibage hauwa mubo bidi olo dali gudula palobo dao.

⁵⁴Polobadu mu Godigo dago nǫų dabebolo bodolu mawani. Tama megi agai bodolu tų sisu pobao. Da Israel dabe agai sę ebo we bidi dabe dao, tama megi agai da tau magasalio.

⁵⁵God agai dago nǫų dabebolo te po wali, ‘Te eno Abraham hobede eyu, te aga hani me, ibaba ame nabo ogwa me, tama naga tede paibao.’ Tama te wali po agai kegeda pabeo,” Mariago te po wali.

⁵⁶Te Maria Elisabet dali bidibadi, polua sela bidama da, tama nosali aga buluba ma pali.

⁵⁷Te Elisabet agai wai tega pabo bodolu asobaso, te agai ogwa tega pai dao.

⁵⁸Aga hani dabe me, te deli bulu bage me tigidaligo Godigo Elisabet aga olo dali tau sali po odama, tigidali Elisabet dali bugai homu ela silai dao.

⁵⁹Te Sarere deli silama, tama augwaligo te ogwa tigiwali togwagasali, te tebo Juda dabego polobadu tama tolai sę dao. Tama augwaligo homugo “Agai aya nogi Sekaraia ma poaibao,” te po wali.

⁶⁰Tiali goli te ogwa aga idago po weyu,” Te egobeo. Dago e wai nogi Jon poaibao,” te po wali.

⁶¹Tama augwaligo te po weyu,” Te naga deli hani bagede te tiwai nogi nago awa dabede me, hai dabede me tiwai nogi elalubo menio,” te po wali.

⁶²Augwaligo nogogo bagi eyu, Sekaraiabolo “E wai nogi de poaibawe?” te po wali.

⁶³Tama Sekaraia agai nogogo bagi eyu, “Te buku asębo nai me sesao,” olama, tama agai e tama asęanio, “Agai nogi Jon dao.”

⁶⁴Tama augwaligo homu tųą palio. Polo tama Sekaraia agai po wabo ma usu yalio. Tama agai hamena ma usu yali.

⁶⁵Te po weyu, agai Godigo nogi ugwaba sali. Tama augwa deli bulu bidi dabe me wi kisu dali. Augwali tigidaligo te po ola silama, pomo mu yalio, te Judia dabego bulu bageba me bulu agebele me.

⁶⁶Augwaligo te po odobo si, monu pomo mu ebaso, augwaligo te po wali, “Te wai nosali mena tama tiwai wai bidigowe?” wali. Genuai Bidigo bomo aga dali bidibo augwaligo koneanio.

⁶⁷Godigo Tedali Mobo Bidigo Sekaraia beasagaso baso, te Godigo po pusuyu, te po walio,

⁶⁸“Dena Genuai Bidi Israel dabego God nogi kegenaninao. Agai aga we bidi da tau sagasalio.

⁶⁹Tilama, agai da ma abelai dao. Polobadu aga sę yali bidi Devitgo eda dadalo asali hanide bomai bidi me deli pedelama, te bidi Godigo da ma sabo bidi nigilai dao.

⁷⁰Polobadu agai po pusa mani bidi dabego waligia te yaliao.

⁷¹God agai polobadu agai da boi bidigo nogode ma saibao wali po te sabao, te da dali dwai homu ebo bidigo nogode me agai da sali.

⁷²Agai dago wąį dabe moni hobede eyu, tau saibao wali bidi te asalio. Tama agai polobadu bodolu mani aga me konealubao.

⁷³Agai dago wąį Abrahambolo bomai bodolu mu mawai dao. Tama megi agai polobadu yaibao waligia yainu te ebao. Boi bidigo nogode agai da ma sainu ebao wai.

⁷⁴Tama agai sę dago dąų olama, tulama, wi egobeo.

⁷⁵Da e tǫde bidibo sogo dago dwai sę isąma, dolo tųdu pelama, agai sę inao. Tama aga gesabidide da dolasa bilinao,” Sekaraiago te po wali.

⁷⁶Agai te po me Jonde wali, “Eno ogwa, ‘Nage nosali Moni Godigo po pusa mabo bidi mu dao,’ Godigo te po waibao. Nage bolo polasa paidigi Genuai Bidi nosali asaibao. Nage polasa pelama, aga asobo tų sisi ela muaibao.