SAN LUCAS 1:27-76

²⁷Oya quita se ichpochtli itoca María. Yehhua omotemacatoya ihuan motlalis se tlacatl itoca José, ichichicaixuiu den hueyixtoc David.

²⁸In ángel ocahsito huan oquiluic: ―¡Nimitztlahpalohua quen molui mitzuelitalo in Totecohtzin, quen mohuan ilohuac! Huan Dios mitztiochihualotoc ocachi quen in oc sequin sihuamen.

²⁹Ihcuac yehhua oquitac in ángel, quen tel oquimat ica itlahtol huan oquiyolnehnehuilic: ¿Tleca nechtlahpalohua ijquin?

³⁰Oc sepa oquiluic in ángel: ―Ahmo ximomouti, María, tleca mitzuelitalotoc in Dios.

³¹Axan tiquitas moconeu huan tictocahhuis Jesús.

³²Huan yehhua mochihuas hueyixtoc, huan quiluisque Iconetzin Dios aquin huehcapa metztoc. Huan Dios Totecohtzin quichihualos hueyixtoc quen icoltzin David.

³³Huan quintequiutis in tlacamen den Israel nochipa, huan ahyic quisasque temajco.

³⁴Oncan in María oquitlahtlani in ángel: ―Tel, ¿quen niquitas inon conetl, huan ayamo nicpiya notlacau?

³⁵Inon ángel oquinanquilic: ―Mitzualahsis in Itiotonaltzin Dios huan mitzsehualos quen se mextli ica ichicahualistzin Dios aquin huehcapa metztoc. Huan ic inon, in conetl aquin tlacatis yes tetlapehpenil in Dios huan quitocahhuisque Iconetzin Dios.

³⁶Noyojqui quitas iconeu in mopariente Elisabet, masque yichicahuac. Ijcon tel, aquin oquihtohuayahque ahyic quitas iconeu yiquipixtoc chicuasin metztli.

³⁷Ica in Dios ahmo oncan tlen ahhuel mochihuas.

³⁸Oncan María oquihto: ―Nican nimocahua temajco Notecohtzin, huan mayeto quen onechiluiloc. Huan ijcon oya in ángel.

³⁹Ipan inon tonalten María oya ihsiu ipan se altepetl ipan in tepetlahtli den Judea.

⁴⁰Ihcuac oahsito ichan Zacarías oquitlahpalo in Elisabet.

⁴¹Ic oquicac in Elisabet, in iconeu omolini iihtectla, quen yehhuatl oquitequiutiloc ica Itiotonaltzin.

⁴²Huan ica paquilistli ocualnanquilic: ―In Dios mitztiochihualotoc quen omitztlapehpeniloc inepanco in oc sequin sihuamen huan noyojqui motiochiutoc moconetzin.

⁴³Tel, ¿aquin nehhuatl, ic otinechualitac huan tiinanahtzin Notecohtzin?

⁴⁴San quen otinechtlahpaloc, in noconeu omolini ica paquilistli.

⁴⁵Molui cuali quen oticneltocac in tlen omitziluiloc tleca yau tzonquisa ica in tlen omihto Totecohtzin.

⁴⁶Oncan oquihto in María: ―Nele nitemahuestiliya Notecohtzin,

⁴⁷huan niyolpaqui ica in Dios Notemaquixticahtzin.

⁴⁸Tleca Dios omochiu cuenta ica nehhua aquin temajco, huan quihtosque nochin tlacatl nitlatiochiutli nehhuatl.

⁴⁹Tleca in Dios Hueyicahtzintli onechchihualoc mahuestic; tleca in Itocahtzin tlamahuestilili.

⁵⁰Nochipa inca tlocoyalo nochten aquin tetlacamatisque.

⁵¹Omonextiloc ocachi chicahuac ica nochin. Ijcon yomotlanque inohque aquin mohueyiliyahque.

⁵²Oquinquixtilihque inueilis inon hueyixtoque huan inohque aquin san tlamachten oquinueyililoc.

⁵³In aquin ahmo tlen oquipiyayahque, omomacaque in tlen cuali, huan omoquixtilihque inon ricos. Yehhuan omocauque inyoca.

⁵⁴Omopalehuihque in tetlacahuan den Israel huan ahmo oquinilnamiquilo quen inca tlocoyalo,

⁵⁵quen oquincaquilti in itatahhuan Abraham huan ipiluan nochipa.

⁵⁶Huan María omocau yiyi metztli ihuan Elisabet huan satepa omocuep ichan.

⁵⁷Ihcuac oahsic in tonali, otlacat iconeu in Elisabet.

⁵⁸In ichantlacahuan huan oc sequinten oyahque quitahque queman oquimatque quen molui cuali oquichihuililoc in Totecohtzin.

⁵⁹Inon conetl oquisenyastihque ipan chicueyi tonali huan quitocahhuisquiyanihque quen itata Zacarías.

⁶⁰Huan inana oquihto: ―Ahmo. Tictocahhuisque Juan.

⁶¹Huan oquitlahtlanihque: ―¿Tleca ijcon tictocahhuiya? Huan ahmo oncan niyan se mochanihcau ijcon itoca.

⁶²Oncan oquitlahtlanihque ica senyas in itata ic quimatisque tlen itoca inon conetl.

⁶³In itata oquitlahtlan tlen ipan quihcuilos, huan oquinihcuiluic: “Itoca Juan.” Huan nochten quen tel oquimatque.

⁶⁴Huan niman oc sepa opeu tlahtohua in Zacarías huan opeu temahuestiliya in Dios.

⁶⁵Ica inon tlen opanoc, nochten quen tel oquimatque huan nohuiyan omononotzque ipan in tepetlahtli den Judea.

⁶⁶Nochten aquin oquimatiyayahque oquiyolnehnehuiliyayahque huan omotlahtlaniyayahque seya huan oc seya: ―¿Tlen iquisca mochihuas inin conetl? Tleca Totecohtzin omotiochiu melahuac.

⁶⁷In tetata Zacarías oquitequiutiloc ica in Itiotonaltzin Dios huan oquitlahtoltiloc in Dios huan oquihto:

⁶⁸Xitemahuestilican in Totecohtzin Dios den Israel. Tleca hualuilohuas ica tehhuanten aquin techantlacahuan huan techmaquixtilos.

⁶⁹Huan techtlocolilos se chicahuac Totemaquixticahtzin. Se de inon ixuihuan David tetlaquehual.

⁷⁰Ijcon otechcaquilti inon tetlapehpeniluan tetlayolchicaucahuan de yihuehcau.

⁷¹Techmaquixtilos ica totecocolihcahuan huan nochin aquin technexicaluiyahque.

⁷²Huelica toca tlocoyalos quen oquincaquiltiloc tocoluan, huan ahmo molcahuas ica tlen omotlahtolnamijque.

⁷³Ijcon oquicaquiltiloc in Dios in tochichicacoltzin Abraham.

⁷⁴Quen huelica techmaquixtilos ica in totecocolihcahuan, matitetlacamatican ahmo ica moucayotl.

⁷⁵Timocahuasque tlamelajcan teixpa huan san Yehhuatzin titetlacamatisque ipan nochin tonemilis.

⁷⁶Huan tehhuatl, noconeu tlasohtli, mitztocahhuisque tlayolchicauqui den Dios Hueyicatzintli. Tleca titlicanas den Totecohtzin huan tiquinnahuatis in tlacamen mateselican.