LUKA 1:27-76

²⁷Oyene ahamunonile mulobwana. Attomeliwe ni mulobwana, eeriwa Zhuuze, aali a nlogo na mwene Davidi.

²⁸Mungero agafiyile, ahimulojelaga, wiira: “We ohukanna mahala! Nabwiya Oli ni we.”

²⁹Mariya ageewile ahisimwelaga vajinjivene, wubuwelaga: “Olojela wula onatapulela ddi?”

³⁰Mungero ola omwiirela: “Mariya, kawoove. Wevo ohufwanya mahala a Mulugu.

³¹Oneere okalana wari. Onombala mwaana pongwe, oyene oneere omuthwa ndina na Yesu.

³²Onaakale mulubale, akopolo. Oneethaniwege Mwaana a Mudhulu-dhulu. Nabwiya Mulugu oneere omvaha othonga wa babaye Davidi.

³³Oneerege othonga nlogo na Yakobo malabo ni malabo. Omwene waaye kudha omala.”

³⁴Mariya ahiwoga: “Dhinandeye addi vowi miyo kagimunonile mulobwana?”

³⁵Mungero ahimwaakula, wiira: “Muneba Woweela oneere wukitela kopolo dha Mudhulu-dhulu dhinowukuneela ni murinti waaye. Vowi Oweela onabaliwe mwa we oneeriwege Mwaana a Mulugu.

³⁶Woone, mmudhi aawo Ezabeli nuliyeene ohukanna wari. Onomujejiha mwaana pongwe, ola bu mweeri wa neetanu na mmohi. Oliye agali owuluvaleene, oyene athu ateene yamwiiriwa muliba ohubala.

³⁷Vowi ni Mulugu kilivo ehinandeya.”

³⁸Vano Mariya omwaakula, wiira: “Gili va, mwiimeleli a Nabwiya. Dhiireye wa miyo dhatedhene mooligana ni madhu eenyu.” Vano mungero ovenyavo vemeliligiiye.

³⁹Malabo alene Mariya ahivenya mowaaguva odhowa nluwa no oZhudeya murudda wo mwaangoni.

⁴⁰Ovolowa mba mwa Zakariya, omulojela Ezabeli.

⁴¹Ezabeli ageewile olojela wa Mariya, mwaanaya ahikahinyaga mbaani mwa amaaye. Ezabeli teto ahidhaaleliwa Muneba Woweela.

⁴²Ahiwogaga ni ndhu notaama, wiira: “Oreelihiwa di nyo vaari va ahiyana, yoreelihiwa si yoovaha ya mbaani mweenyu!

⁴³Asaa! Dhandeyile a ddi wi amaaye a Nabwiya aaga, egeeddele miyo?

⁴⁴Vowi viwilimi olojela wa weenyu, mwaana ohiikahinya volubalevene ni ohagalala mbaani mwaaga.

⁴⁵Muli oorelihiwa mwaha wororomela wi Nabwiya dhuwaaddeliyeni, dhineere wiireya!”

⁴⁶Nuwindo, Mariya ahiira: “Egumi yaaga enomuriha Nabwiya,

⁴⁷Muneba waaga onohagalala mwa Mulugu, Mvulumusi aaga.

⁴⁸Vowi uhoona wiiyeviha wa mwiimeleli aaye. Okuma dhiinova ni anamabaliwelamo ateene enagiirege oreelihiwa,

⁴⁹mwaha wi oowodha ohugiirela dhego dhulubale. Oweela thili ndina naaye.

⁵⁰Thagaraga dhaaye dhinowaafiyedha anamabaliwelamo ateene, alene enamuriha.

⁵¹Ohaabalalesa ni moono waaye owiithukula, ni moobuwelelo eewa oovirigana.

⁵²ohakitiha mamwene mudhittenguni dheewa, waagweliha owiiyeviha.

⁵³ohaarubaliha ni dhapama aliba dala, waapaganya ehinna yego oreela.

⁵⁴Ohumukamihedha Ezarayeli mwiimeleli aaye, kaddiwalele thagaraga dhaaye

⁵⁵wa Abarahamu ni anamabaliwelamo aaye malabo mateene, woona aroromelihiye makolo eehu.”

⁵⁶Mariya ahikala ni Ezabeli mweeri dhowaakwana miraaru. Vano owelela vade vaaye.

⁵⁷Mudhidhi ogaakwanile wowi Ezabeli abale, ahimbala mwaana mulobwana.

⁵⁸Amwaaddamani ni amudhi aaye egeewile wi Nabwiya ohumweddiwela thagaraga volubalevene, yahihagalala ni oliye.

⁵⁹Vigavirile malabo matanu na maraaru yahimudhowana mwaana wi eeneliwe yafunaga emutwe ndina na babaye, Zakariya.

⁶⁰Amaaye yahaakula, wiira: “Naari! Eeriwege Zhuwawu.”

⁶¹Yahimwiirelaga: “Amudhi aawo kalivo winna ndina nenddo.”

⁶²Omukoha baba a mwaana ni madada wi ki mwaana ola eeriwege aani.

⁶³Ahilobaga ntabwa olebavo: “Ndina naaye di Zhuwawu.”

⁶⁴Mowaaguva mulomo waaye wahifuguwaga, nlumi otapuwa, owogaga, amutamalaga Mulugu.

⁶⁵Wahikala woova wa amwaaddamani ateene a Zakariya, ni murudda dhatedhene dho mwangoni wa oZhudeya, dhowogiwa dhowiireya nde.

⁶⁶Ateene yeewile nde yoologolela mmurimani, yiiraga: “Mwaana ola onaakale aani?” Mwaha wi kopolo dha Mulugu dhaali ni oliye.

⁶⁷Zakariya, babaye Zhuwawu, ahidhaaliwa Muneba Woweela wambeela ovuhulela, eeraga:

⁶⁸“Otamaaliwa akale Nabwiya, Mulugu a Ezarayeli, vowi oheeddela ni woobola nlogo naaye.

⁶⁹Ohunivenyihedha ovulumuwa wa kopolo, odheela vade va Davidi, mwiimeleli aaye.

⁷⁰(Woona Mulugu mwawogeliiye odheela vamulomoni vanamavuhulela oweela okuma wale-wale.)

⁷¹Wi eere onoobola wa amwiiddani eehu mmadadani mwa ateene alene enanaaba.

⁷²Ohooneyiha thagaraga dhaaye wa makolo eehu, wubuwelela wandana wopanganela waaye woweela,

⁷³Olibela wamwiireliye baba eehu Abarahamu:

⁷⁴Wi eere onivulumusa mmadadani mwa amwiiddani eehu, wi nimwebedhege nihoovaga,

⁷⁵moweela murima ni wiiwelela vameentoni vaaye malabo mateene a egumi yeehu.

⁷⁶We mwaanaga, oneerege wiithaniwa namavuhulela a Mudhulu-dhulu. Vowi oneere odhowa vasogolo va Nabwiya wi osasanyedhe dila yaaye.