Luk 1:27-76

²⁷Ga haan tupas tiga bulahin nong pai noh tika baak ma tiga tunaan. Ma di gate tar bat tar ie wara tatole tiga tunaan, hinsana ne Iosep. Aie tiga bulumur ta Dawit. Ma no hinsana no bulahin ne Maria.

²⁸No angelo ga kaang ie gaam tange bia, “No Watong i kis tika ma ugu ma i te idane ugu.”

²⁹Io, Maria ga nguanguo sakit ta kaiken ra nianga ma ga manga lilik bia a mangana nianga sa kaike.

³⁰Iesen no angelo ga tange tana hoken: “Maria, waak u burut. God i te guama pane ugu ma i taguro bia na idane ugu.

³¹Nu tianan ma nu kaha tiga bulu na tunaan ma nu pas no hinsana bia Jisas.

³²Tamat no hinsana ma da kilam ie bia no Natine God Nong i Lua Harsakit. No Watong God na tar no kinkinis na tamat na ut na harkurai tana, nong gar tano hintubuno ne Dawit.

³³Ma na kure no huntunaan tane Iakop hatika. No uno kinkinis na harkurai pa nale pataam.”

³⁴Maria ga tiri no angelo bia, “Iakan ra linge na tutun hohe? Iau pai nunure baak tiga tunaan.”

³⁵No angelo ga babalu hoken: “No Halhaliana Tanuo na hanuat taar taam ma no dadas tano God Nong i Lua Harsakit na burung ugu. Io kaik, no halhaliana nong nu kahai da kilam ie bia no Nati God.

³⁶Nes baak! Elisabet no hinsakaam mah na kaha tiga bulu kaiken i parana taar. Di git tangtange bia a hinkahoi iesen i te tianan haruat ma ra liman ma tikai na teka kaiken.

³⁷Taie tiga linge i kalkalala ta God.”

³⁸Io, Maria ga babalu bia, “Iau no tultulai gar tano Watong. I tahut bia na ngan huo tagu hoing u te tange.” Io, no angelo ga haan talur um ie.

³⁹Ta iakano pakana bung Maria ga taguro ma ga haan gasien laah uram tiga taman kenam ta ira uladih ta Iudeia.

⁴⁰Ma ga laka tano ngasiane Sekaraia gaam haatne Elisabet.

⁴¹Ing Elisabet ga hadade ing Maria ga haatnei, no bulu nong ga tianane tar ie ga manga magile ma Elisabet gaam hung ma no Halhaliana Tanuo.

⁴²Io, ga tange naliu bia, “U manga daan ta ira kaba hahin bakut ma iakano bulu nu kahai na daan mah.

⁴³Iesen, sige um iau, kaik no pawasine no nugu Watong gi hanuat ukai ho iau?

⁴⁴Ing at mon ira iruo talingagu dir hadade ing u haatne iau, no bulu narakoman tagu i manga magile ma ra gungunuama.

⁴⁵U daan kanong u te nurnur bia ira linge no Watong i te tange taam na hanuat tutun!”

⁴⁶Io, Maria ga tange hoken: “Meram narako tagu i hatamat no Watong,

⁴⁷ma no tanuagu i guama ta God no nugu ut na Halon.

⁴⁸Kanong warah, i te lik leh no nugu kinkinis na maris, iau no uno tultulai. Io kaik, tur leh um ma kaiken, ira matanaiabar katin ma diet mah namur um, diet na wasange iau bia i ga haidane iau.

⁴⁹Kanong warah, no Dadas na God i te gil ra tamat na linge sakit tagu. No hinsana i Halhaal.

⁵⁰No uno harmarsai i la hanahaan tupas diet ing diet urur tana, ira tunotuno ing diet ga lon nalua, diet katin, ma diet mah namur.

⁵¹I te gil ra dadas na linge ma no limana. I te tule harbasiane se diet ing diet lik hatamat habaling diet.

⁵²I te bul hasur se ira lualua meram ta ira udiet kinkinis na tamat na ut na harkurai. Iesen i te raun haut balik ira maris.

⁵³I te hahungi diet ing diet taburungan ma ra bilai na linge, iesen i te tule se tar ira watong ma ra pabona diet.

⁵⁴I te harahut ira matanaiabar Israel, ira uno tultulai, hoing ga tange ta ira hintubu dahat bia na gil huo.

⁵⁵I te lik leh bia no uno harmarsai na kis hatika taar ta Abraham ma ira uno bulumur.”

⁵⁶Ma Maria ga kiskis baak ma Elisabet haruat ma ra itul a teka ma gaam tapukus um u nataman.

⁵⁷Io, ing no pakana bung ga hanuat bia Elisabet na kakaha, ga kaha tiga bulu na tunaan.

⁵⁸Diet ing diet ga kis hutet taar tana ta iakano taman ma ira hinsakana, diet ga hadade bia no Watong gate hamines ra but na harmarsai tana, ma diet gaam guama tika mei.

⁵⁹Tano liman ma itul a bung diet ga hanuat wara kutkut no palatamaine no bulu ma diet ga wara paspas no hinsana no rana sus Sekaraia taar tana.

⁶⁰Iesen no pawasine ga tange bia, “Taie! Da kilam ie bia ne Jon.”

⁶¹Ma diet ga tange tana, “Taie tikai ta ira hinsakaam i mon iakano hinsang.”

⁶²Io, diet ga hatahuo ma ira luma diet taar tano rana sus wara nunure leh bia a hinsana sa ga sip bia na pas no natine mei.

⁶³Ga sasaring wara tiga palpalehuana subana daha wara pinapakat tana ma ga pakat bia, “No hinsana ne Jon.” Ma diet bakut diet ga karup diet gaam manga lilik uta iakan ra linge.

⁶⁴Kaik at mon no hana ga tamapapos ma no karamena ga mamakan ma gaam tur leh wara pirpirhakasing God.

⁶⁵Ma ira matanaiabar ta iakano taman diet ga kilingane ra tamat na urur tika ma ra bunurut uta iakan ra linge. Ma ira matanaiabar ta kaike ra uladih tano hanuo Iudeia diet ga iangianga uta kaiken bakut ra linge.

⁶⁶Diet bakut ing diet ga ser leh iakan, diet ga manga lilik utana diet gaam tirtiri bia, “Iakan ra bulu na hanuat bia a mangana tunotuno sa ie?” Ma diet ga tirtiri huo kanong ga tutun at bia no dadas tano Watong ga kis taar mei.

⁶⁷Io, Sekaraia no rana sus ga hung ma no Halhaliana Tanuo ma gaam ianga na tangesot hoken:

⁶⁸“A pirhakasing uram tupas no Watong, no God gar Israel, kanong i ta me kul halangalanga leh ira uno matanaiabar.

⁶⁹God i te hatut tiga dadas na ut na harhalon uta dahat meram tano huntunaan gar ta Dawit no uno tultulai

⁷⁰hoing ga hamines ta ira uno halhaliana tangesot diet gaam tange nalua sakit.

⁷¹I te hatur ie wara halhalon leh dahat sukun ira adahat suk, ma mekatiga ta ira luma diet bakut ing diet malentakuane dahat.

⁷²I te gil huo wara hamhamines ra harmarsai taar ta ira hintubu dahat ma wara liklik leh tar no uno halhaliana kunubus,

⁷³nong ga sasalim taar ta Abraham no hintubu dahat.

⁷⁴Ma i te gil huo wara halangalanga ise dahat ta ira luma diet ira adahat suk. Io kaik, i tale dahat bia dahat na lotu tupas ie

⁷⁵ma ra gamgamatien ma ra takodas ma taie ta bunurut ta ira udahat nilon bakut.

⁷⁶Ma augu ra natigu, da kilam ugu bia no tangesot gar ta God Nong i Lua Harsakit, kanong augu, nu lua tano Watong wara tangtagure no ngaas wara utana.