San Lucas 1:27-76

²⁷par güetixlob tuby dxaap ni lá María. Laab a ná par guchnaab tuby bniety ni lá Gusé ni zá lo xfamily to rey David.

²⁸Ánglɨqui biiuny laniuu rut rbez María ax guniiny: —¿Xac María?, liú ni abcuabee Dios. Xtadnɨ Dios zuguané liú. Dios abanldee quiu de lo irate de bniety gunaa.

²⁹Per María chi gunáb ánglɨqui quesentiand rdxalob pur de xtiidx ánglɨqui ne runzacbɨ xgab xi zelo de diidxqui.

³⁰Chiy raipy ánglɨqui laab: —Quɨt rdxibiu María. Dios agulény liú par gunldeeny quiu quesentiand.

³¹Anre acuezníu necidá xte tuby bdoo ne bdoo ni icóoqui ax cuelooby JESÚS.

³²Ne zapby guelrnabee ax cuelá de bniety laaby Lliin Dios xte llayabaa. Chiy Xtadnɨ Dios gúnny laaby rey zec ni guc to xpɨngulby David

³³par inabeeby lo naciony Israel par chazy. Ne guelrnabee xtenby quɨt chúuti dxi ldullni.

³⁴Chiy María raipbɨ ánglɨqui: —Per, ¿xo gac ziy ne nare gady chúuti dxi cueznía nguiu?

³⁵Chiyru raipy ánglɨqui laab: —Liú icóo bdooqui pur Spíritu Sant ne horqui guelrnabee xte Dios ni rbez llayabaa icuabldany quiu zec chi rcuablda tuby zá quia bniety. Pur ningui, lliiniu ni teru icóoqui, Dios isiacldee laaby ax inii de bniety dec laaby náby Lliin Dios.

³⁶Ziyza xprimu Elisabet icáab tuby bdoo masquɨ anáb bɨngul. Bniety ni rniideb dec quɨt chaleeti icáa bdoo, aguc xoop búiu rbezbɨ necidáqui.

³⁷Te pur quɨt xi costi nagán par Dios.

³⁸Chiy gunii María: —Xtadnɨ Dios ná ni rnabee nare. Su chagac zec ni aguniiny cun nare. Chi gunii María ziy, chiyru zé ánglɨqui.

³⁹Láani de dxiqui zégac María tuby guɨdx ni ná láani de dany Judea.

⁴⁰Chi biiu María láani liz Zacarías ax guninéb Elisabet.

⁴¹Chi bindiag Elisabet rsee María, bdoo ni nuaa Elisabet bzeesby láanbɨ, ziy xquel quesentiand gulezné Elisabet Spíritu Sant.

⁴²Chiy quesentiand diip gunii Elisabet: —Dios abanldeeny quiu, María, de lo irate de bniety gunaa ne ziyza abanldee Dios quia lliiniu ni icóo.

⁴³¡Dichos nare ningui zedtixlo xnan Dad Dios xtena nare!

⁴⁴María, horac ni bindiaga guniiu, llingaana bzeesby láania tant rzaclaazby.

⁴⁵Dichos liú, María, pur ni güeldilaazu, te pur zac cumplir ni gunii Xtadnɨ Dios liú.

⁴⁶Chiy gunii María: Quesentiand rniia de diidx zaac lo Dios

⁴⁷ne quesentiand rzaclaaza pur Xtadnɨ Dios ni racné nare.

⁴⁸Te pur masquɨ názia tuby ni cayun sirvɨ lony, per anre abcuabeeny nare par gac zec ni ná xgabny, ne desde anre par chazy de bniety sniideb xíclaboo.

⁴⁹Te pur Dios ni rnabee abaanny de cos güen par nare, ne laany nány sant.

⁵⁰Ne Dios zeza rgány irate de bniety ni run cuend laany,

⁵¹ne zieny ni abaanny pur guelrnabee xtenny ax rungánny de xgab xte de bniety naroo.

⁵²Ne bdzɨcány guelrnabee lo de ni rnabee. Chiy de bniety ni nadolaaz ax bdeedny guelrnabee.

⁵³De bniety ni runlieedxni bguaadny laadeb zieny guelnazaac. Chiy de ricu bsáanny laadeb sin xíteete.

⁵⁴Gucnény de bniety Israel ni rac xpɨnny ne quɨt bianlaaztiny dec ná par ilaslaazny laadeb.

⁵⁵Zecquɨ ni raipny de to xpɨngulnɨ, Abraham, ne cun de ni zéed lo xfamilbɨ dec quɨt chúuti dxi cuelaazny laadeb.

⁵⁶Chiy María guzuguanéb xprimbɨ Elisabet chon búiu, chiyru biecquibɨ lizbɨ.

⁵⁷Chi bdzɨny dxi ni gul llingaan Elisabet,

⁵⁸chiy de vecin ne de xfamily Elisabet quesentiand rzaclaazdeb güeguiaadeb laab, te pur agucbeedeb xa xquel blaslaaz Dios laab.

⁵⁹Chi guc bdooqui tuxman, chiy güelduudeb seny tɨɨxby, seny ni ruu de bniety Israel, ax rcaazdeb nidialáby Zacarías zecac ni lá xtadby.

⁶⁰Per xnanby gunii: —Laaby quɨt idialátiby ziy. Laaby ná par idialáby Juany.

⁶¹Chiy raipdeb laab: —¿Xínii idialáby ziy ne ruteete xfamiliu quɨt láti Juany?

⁶²Chiyru cun seny xquel gunabdiidxdeb xtad bdooqui par gacbeedeb tú rcaazbɨ idialáby.

⁶³Chiy xtadby gunaabbɨ tuby ldaa bred par ícuaab letrɨ, ax bcuaab lo bredqui: “Laaby idialáby Juany.” Chiy iratedeb bdxalodeb zec ni guc.

⁶⁴Hóracqui Zacarías guzulo rniib stuby ax guzulo rniib de diidx zaac lo Dios.

⁶⁵Irate de vecin xtendeb quesentiand rdxalodeb, ne irate de guɨdx ni ná láani dany Judea brɨɨch diidx pur loc ni guc.

⁶⁶Ne irate de bniety ni gucbee ziy, rundeb xgab ne raipdeb saadeb: —¿Túdxa gac bdooqui? Purquɨ laaby Dios abanldee quiaby.

⁶⁷Xtadby Zacarías quesentiand rbeznéb Spíritu Sant ax guzulo rniib de diidx ni bguaad Dios laab, ax nab:

⁶⁸De diidx zaac ná par Xtadnɨ Dios xte Israel te pur abedldány dunnɨ ni nan xpɨnny.

⁶⁹Abnɨɨdxny dunnɨ tuby ni nap guelrnabee par ílda dunnɨ, tuby ni zá lo xfamily David ni ná xpɨny Dios.

⁷⁰Ziy xquel baany Dios promes desdɨ gulal ne de profet ni gubány zec ni rcaazny laadeb bteeddeb xtiidxny,

⁷¹dec gacnény dunnɨ lo irate de ni rdxichné dunnɨ,

⁷²ne ilaslaazny irate de to xpɨngul gulalnɨ, ne quɨtza yianlaaztiny promes ni baanny.

⁷³Promesré baany Dios cun to xtadnɨ Abraham

⁷⁴dec gacnény dunnɨ lo de ni rdxichné dunnɨ par chalee idxannɨ sirvɨ lony sin dxiby,

⁷⁵ne par idxannɨ zec ni rcaazny iduibte ni ibánnɨ.

⁷⁶Chiy, liú, llinganeena, idialoo profet xte Dios xte llayabaa te pur liú sanɨɨdiu gunzaacu nez par Dad ni gueed.