Luk 1:27-76

²⁷Enyudok ensel nyaraumokwi baraen onok armatok shahwarok um Maria iri. Okwok douk wata kwurao anan arman shupe atugun uwe, uwok. Okwok douk shakriok um anan arman shahwaran um Josep iri. Anan douk nakitak king Devit ananip awirop iri.

²⁸Enyudok ensel nyanaki nyatogrumok aria nyakripok nyakri, “Ruwahep Maria, nyakin mishin nyur wosik aria nyanadudareh. Debeini nani nyak nape hurukatin aria nenekumen yopunyi.”

²⁹Aria Maria kwomnek enyudok baraen aria okwok urkum yowem. Okwok madae kwudukem baugenyum enyudok baraen ensel nyakripoken iri uwe.

³⁰Aria ensel nyakripok nyakri, “Maria, nyak mare nyunogugur uwe, uwok. Iruhin douk nanadudareh-umen aria ta nunekumen yopunyi.

³¹Mnek! Nyak arman douk wata nyurao anan uwe, aria nyak ta nyonarahaen aria nyubuki anan nuganin. Aria nyak ta nyudowon nyeigur Jisas.

³²Aria anan ta nutogur debeini arman. Aria ta shuhwaran Debeini Iruhin abom douk nariguk ihish arpesh shani eneshenesh eshudok shabuhuk iri um ananin Nuganin. Debeini Iruhin ta nunekan nutogur king kabi douk ananin babuken Devit um.

³³Aria ihih nyumneh anan ta nupe deben um Jekop ananish popehesh yamehesh. Anan ta nupe Debeini um ananish arpesh namudok atin ihih nyumneh.”

³⁴Aria Maria wata kwakrip enyudok ensel kwakri, “Enyudok ta nyutogur mumam? Eik wata irao anan arman uwe.”

³⁵Aria ensel nyakripok nyakri, “Iruhin ananin Mishin ta nyuwishen aria debeini Iruhin ananin dodog abom ta nyishigorin. Douk namudok aria anudok yopuyopuni nuganin abom nuhut nyunubuk iri ta shuhwaran Iruhin ananin Nuganin.

³⁶Mnek, okwudok armatok Elisabet douk kwani nyak ipak atup awirop iri douk shakri kwape kupik. Okwok douk ruwogik abom aria okwok douk kwanarahaen. Aria douk 6-poreib aub badiyok.

³⁷Aria eshesh douk madae enesh eshudok eneshenesh douk Iruhin ta nubirak um mare nunekesh iri uwe, uwok.”

³⁸Aria Maria kwakripan kwakri, “Eik yenekuman mour meyoh Debeini iri. Aria anan wosik nunekume enyudok nyutogur kabi douk nyak nyakrium.” Aria enyudok ensel nyakutukuk nyanak.

³⁹Enyudok ensel nyanak nyeyagwrehuk um jurug, aria kwape arigaha douk anah nyumneh hanak hadiguk, aria Maria kwanagabe eshudok aria arigas kwaikitak kwatoum yadururuh kwanak. Okwok kwanak um anabur wabur douk bape shokugi nahobig Judia iri.

⁴⁰Okwok kwanak kwatogur kwawish Sekaraia ananit urupat aria kwonekumok yopuhi nyumnah Elisabet.

⁴¹Aria douk Elisabet kwomnek um agundok Maria kwonekumok yopuhi nyumnah um, aria batowin nyor okwokwihw apahw iri nyanagugwanam. Aria Iruhin ananin Mishin nyawish Elisabet abom aria nyapenyok shukunik.

⁴²Douk nyawishok aria nyakuhur kweyagwreh debeihi mah kwakri, “Nyak nyeshagrakuk ihiyumorim armago um agundok Iruhin nenekumen yopunyi um. Aria shopunek, enyudok batowin nyak nyunyubuki iri, Iruhin ta nunekumen yopunyi atin.

⁴³Aria enyudok douk nyatogrume um agundok eikin Debeini ananik amakek kwanaki kwatiwe um? Eik douk madae debeikwi armatok uwe.

⁴⁴Aria abudok atub nyutob abom eik yemnek agundok nyak nyenekume yopuhi nyumnah obi nyutob, batowin nyor eikihw apahw iri nyanadudareh aria nyanagugwanam.

⁴⁵Nyak douk nyenek bilip um Debeini ananin baraen aria nyak douk nyanadudareh. Debeini ta nuneken nyutogur kabi douk riguk anan nakripenyum!”

⁴⁶Aria Maria kwakri, “Eik yanadudareh abom aria yatuk Debeini ananin nyeigur nyato iruhw.

⁴⁷Eikin mishin douk nyanadudareh um Iruhin douk nutaurume naraowe yatanamori yape wosik atin iri.

⁴⁸Um maresh? Anan urkum morum eik nyeigur woke iri douk yasuhw ananin mour iri. Douk arigaha kweipon, ihishmorim arpesh ta shukri eik douk Iruhin nutaurume aria neneke yanadudareh atin iri.

⁴⁹Eshesh ta shukri yanadudareh um enyudok debeinyi yopunyi mour abom douk Debeini Iruhin nenekenyume iri. Aria ananin nyeigur douk nyenek holi abom aria yopuyopunyi.

⁵⁰Anan douk nenek giha abom um eshudok arpesh douk shape shakamum anan shagipeshan iri. Anan ta nenek gihaumesh arigaha shugokuk aria esheshish batowish shugiguk shukitaki iri shopunek. Anan ta nunekesh namudok atin.

⁵¹Aria anan dodogowin nenek mour um, anan apa nabo eshudok arpesh douk shanahur esheshish nyeiguhw shato iruhw aria esheship urkwip porum shunek yoweishi inahos iri nahiyahesh sharuwok shanak atin atinyuk.

⁵²Anan neyatakuk amam king nam habuhuk aria natuk nyeiguhw wokeshi arpesh shato iruhw.

⁵³Aria nekesh sabaishi yopishi eneshenesh eshudok yaruhish arpesh iri. Aria arpesh douk shatik sabaishi eshudok eneshenesh iri neshopokesh shanak wis wohis.

⁵⁴Ananim urkum douk wata morum enyudok adurin atinyi baraen douk seiwok nakripaguk apakish yamehesh-enyi. Aria nanaki um nutaurum ananish arpesh eshesh Israel douk shasuhw ananin mour iri.

⁵⁵Aria anan urkum morum nunek yopunyi um Abraham nini ananish batowish iri popehesh yamehesh douk shugiguk shutograri iri aria nenek gihaumesh namudok atin ihih nyumneh.”

⁵⁶Aria Maria kwani Elisabet wape biyab atun aub batuh aria wata kwatanam kwanak um wabur.

⁵⁷Aria nyutob um Elisabet kwubanuh obi nyutob banak batograri aria kwabanuh kwabuki armanin batowin.

⁵⁸Aria okwokwishi shani eshudok douk shape hurukatin iri shemnek um agundok Debeini nenekumok yopunyi um aria eshesh shopunek shanak shanadudareh.

⁵⁹Aria douk arigaha 8-poreih nyumneh hadiguk anudok nuganin, aria shanakumori shutah ananihw yegenyihw. Aria eshesh shakri shudowan nyeigur Sekaraia douk ananin yain nanahwarom um.

⁶⁰Aria ananik amakek kwakri, “Uwok. Ananin nyeigur ta muhwaran Jon.”

⁶¹Aria eshesh shakripok shakri, “Nya, ipak atup awirop um douk madae anan arman nunahwar enyudok nyeigur uwe.”

⁶²Aria eshesh shauraman wis um ananin yaken shariganum shakri nukripesh um meinyi nyeigur anan nakri shuhwar nuganin-uman.

⁶³Aria anan naurumesh wis um sharauri anat slet aria nowem enyudok baraen nakri, “Ananin nyeigur douk Jon.” Aria eshesh ihishmorim shakitak yowiyokuk abom shape.

⁶⁴Aria abudok atub nyutob, Sekaraia ananit nokwat tani yaham wata shanupok neyagwreh aria nape natuk Iruhin ananin nyeigur nyato iruhw.

⁶⁵Aria ihishmorim arpesh shape hurukatinyum eshesh iri shanogugur abom. Aria baraen nyarahaen nyanak ihirub warub douk betem yodururuh agudok shokugi nahobig Judia iri. Aria ihishmorim shadukemesh um enyudok douk nyatogurum Sekaraia nani Elisabet iri.

⁶⁶Aria ihishmorim arpesh douk shemnek um enyudok iri shape urkwip porumen aria shakri, “Anudok nuganin nukitak yopun um, anan ta nutogur manan arman?” Um maresh? Eshesh shadukemesh um Debeini nani anan nape hurukatin aria ananin dodog douk nyapenyan.

⁶⁷Aria Iruhin ananin Mishin nyawish Jon ananin yaken Sekaraia nyapenyan shuknin aria neyagwreh Iruhin ananin baraen kabi douk amam profet heyagwrehen um.

⁶⁸Sekaraia nakri, “Apak mutuk Debeini apak Israel apakin Iruhin ananin nyeigur nyuto iruhw. Anan nanaki nataurum apak ananish arpesh aria wata nanarap mape wosik.

⁶⁹Anan nagraehumap anan dodogowin atunari arman um nunarap mutanamori mupe wosik abom iri. Anudok arman douk nakitak Devit nasuhw Iruhin ananin mour iri ananip awirop.

⁷⁰Kabi douk seiwok ananin Mishin nyawish amam yopumi profet aria hakriyenyuguk iri baraen nyakrium.

⁷¹Anan nakri adur abom um ta nutaurumap nunarap mukutukuk apakish horim. Aria shopunek ta nutaurumap um nunarap mukutukuk ihishmorim arpesh douk shakapaguk agabus iri.

⁷²Riguk nakripeshuk ananin adurin atinyi baraen kontrak apakish popehesh yamehesh um ta nutaurumesh. Aria anan douk wata urkum morum ananin kontrak douk riguk nakriyen um douk ta nugipeshen aria nutaurum apak um.

⁷³Anan narik nakri iruhw nakripan enen adurin atinyi baraen abom um apakin yamenen Abraham. Aria douk nakri nunekenyumap kabi riguk nakri ta nunekenyumap um.

⁷⁴Anan nakri nutaurumap nunarap mukutukuk apakish horim um musuhw ananin mour aria mare munogugur uwe, uwok.

⁷⁵Anan nataurumap um nakri apak mupe agundok atap um, apak mupe ananishi atish mupe holi aria mugipesh lo atin iri arpesh aria anan nupe nutrup munek ananin mour.

⁷⁶Aria nyak eikin batowin, arpesh ta shuhwaren Debeini abom atunari Iruhin ananin profet. Nyak ta nyurik nyunak nyukrip arpesh um shukutukuk yoweishi inahos shupe wosik atin aria shupe shutik um Debeini um ta nunaki um.