Luke 1:27-76

²⁷mo sivo isana har̃ai maevo matea hijana Mary. La tauhoroa moiso vara i pa lahi vano isana tamlohi matea hijana Joseph, enia mahapin Supe David matea.

²⁸Gabriel mo pala isana mara, “Ranir̃uhu isam, engko har̃ai matea God mo r̃omr̃uhu isam mo tavera jea! Moli mo lo toho peresiho.”

²⁹Pani Mary, r̃omina mo tuturahi hajavua hin retireti atu, ale mo vaihitea vara i levosahi na r̃aramin retioloolo atu.

³⁰Ale angelo atu mo verea isana mara, “O sopo matahu! Mary, matan na masalon God mo opoia vara i r̃uhu isam.

³¹Ale mo tapulo nake, o pa tau natum, ale o pa tape na lamane matea, ale o pa tau na hijana vara Iesu.

³²Enia i pa tamlohi aulu jea, ale la pa tovia Natun God, sei mo aulu jea. Ale Moli God i pa silea na suiha nona supe non tamana Supe David.

³³Enia i pa tauri na suiha vara i aulu na vaon Israel tui tui, ale i pa sopo te isoiso rani mata nona tauri na suiha.”

³⁴Mary mo usia isan angelo atu mara, “Hinau atu i pa mai sohena sava, matan enau har̃ai maevo matea?”

³⁵Angelo atu mo r̃aramia mara, “Tanume Tapu i pa mai hiniho, ale suihan God Aulu jea i pa hohoviho; ale matana, natirihi sei i pa vora i pa tapu, la pa tovia — Natun God.

³⁶Ale ko levosahia vara tahisam Elizabeth na nona vajiaha enia sohena, mo tau natuna lamane matea, ale vitu akerihi enia nona halimarave vitu isana har̃ai matea la verea vara enia har̃ai aroaro matea!

³⁷Matan mo sopo te hinau hatea i r̃ilangi jea vara God i sopo er̃i vaia.”

³⁸Ale Mary mara, “Varar̃uhu enau har̃ai slev non God purongo. Na opoia vara hinau atu i mai isaku sohena ko verea.” Ale angelo atu mo mele malue mo vano.

³⁹Hitahun rani atu, Mary mo vele sahe na jara vutivuti, mo sivo vila na taon matea na lolon jara matan Judea.

⁴⁰Mo unu na iman Zechariah, ale mo vere na retioloolo isan Elizabeth.

⁴¹Ale Elizabeth mara mo rongo na retioloolo non Mary, pipi atu na lolona mo hisu, ale Tanume Tapu mo mar̃ivisi Elizabeth,

⁴²mo verea aulu mara, “Avulahi tavera jea isam mo jeu na har̃ai tinapua. God mo ler̃uhu hin natirihi sei mo lo toho na lolom.

⁴³Ale enau hare vara tinan noku Moli i er̃i mai vara i rohiau?

⁴⁴Matan, vahatea purongo atu sei nara na rongo na nom retioloolo, pipi nike, na loloku mo hisu na avulahi.

⁴⁵Avulahi tavera isam matan ko rasu Moli vara i pa vai na sava mo verea isam!”

⁴⁶Ale Mary mo verea mara, “Na r̃omiku na hasohaso God mo tavera jea,

⁴⁷ale mauriku mo avulahi tavera hin God noku Jujuri,

⁴⁸matan mo kilau mai isaku nona har̃ai volitusi atano, ale mo tapulo nake, mahapi tari la pa verea vara avulahi tavera mo mai isaku,

⁴⁹matan haratu sei mo r̃ilangi jea mo vai na hinau tavera isaku, ale hijana mo tapu.

⁵⁰Ale nona r̃omopoia mo vano isana mahapi tari, isan la haratu sei la lo sile na oloolo tavera isana.

⁵¹Enia mo vujangi na nona suiha, mo leputi jalajalai la haratu la mangisi na mapura.

⁵²Mo lavi nar̃ihi la haratu la lo tauri na suiha nona supe, ale mo tahe la haratu r̃omira la atano la sahe aulu.

⁵³Mo sohoni la haratu la marohati na hina r̃uhu, pani mo r̃ule nar̃ihi la haratu la tavtav la vano lekoleko.

⁵⁴Mo tueni nona volitusi Israel, usuri na nona retitauhi mata nona r̃omopoia hinira,

⁵⁵matan mo retitauhi vara i pa r̃omopoi isan Abraham peresi na taniana na rani tui tui.”

⁵⁶Mary mo lo toho atu isan Elizabeth mata vitu mo tolu, moiso mo pa mele mule vano na jarana.

⁵⁷Ale vitu non Elizabeth mo asi vara i lavlavi, ale mo vasusui na nona pipi lamane matea.

⁵⁸Ale tavtavuina peresi na tahisana la rongoa vara Moli mo r̃omr̃uhu tavera jea isana, ale la avulahi peresia.

⁵⁹Ale na halimaravtolu rani la mai vara la vai na nona tair̃alihi. Tatuara la lo opoia vara la tau na hijana vara Zechariah vara i lavi na hijan tamana,

⁶⁰pani tinana mo verea mara, “Mo vono, enia hijana John.”

⁶¹Ale la verea isan Elizabeth lara, “Mo sopo te tavtavuim hijana i sohen haratu!”

⁶²Ale la vai na matamata hai isan tamana na limara vara sava hija natu, enia mo opoia vara i silea isana.

⁶³Ale Zechariah mo usia vara la lavi te hinau mata uliuli hinia i mai isana, ale la mar̃urahi tavera matan mo ulia mara, “Hijana enia John.”

⁶⁴Ale vahatea purongo memena mo mele materi, ale mo retireti mo hasohaso God.

⁶⁵Tahisara tari la hutura, ale la matahu, ale sorasora atu mo r̃alihi vevuhi na jara tari na jara vutivuti Judea.

⁶⁶Ale tamlohi tari sei la rongora la sopo levosahia vara natirihi atu i pa sava tamlohi pavuho natu matan liman Moli mo lo toho hinia.

⁶⁷Ale tamana, Zechariah, Tanume Tapu mo mar̃ivisia, ale mo retimangovi mara,

⁶⁸“Hasohaso tavera isan Moli God matan Israel, matan nake mo rohi na nona tamlohi vara i jurira,

⁶⁹God mo siler̃a na Tamlohi Jujuri matea mo suiha tavera mo tai na iman nona volitusi supe David,

⁷⁰sohena nona pr̃ovet tapu tuai la verea

⁷¹lara vara i pa jurir̃a isana nor̃a meresahi, ale na liman la haratu sei la r̃ohu hinir̃a.

⁷²Mo mar̃ivisi na nona retitauhi tapu sei vara i pa r̃omi na nomam pua,

⁷³retitauhi atu mo silea isan tamar̃a Abraham vara i pa vaia,

⁷⁴ale vara i jurir̃a isana nor̃a meresahi, ale i pa tuenir̃a vara r̃a volitusi isana i sopo te matahu isar̃a,

⁷⁵na mauri tapu mo tataholo na nahona mata nor̃a rani tari.

⁷⁶Ale engko natuku, la pa toviho pr̃ovet non haratu mo aulu jea; matan engko o pa vano tiroma hin Moli, mata vai mamahuni na malelena,