Lúkas 1:27-76

²⁷Nyə á kənd nyə nə́ a kə́g lésha nə ncwíyɛ̂ sás lʉ́ múdá í á bə wu nə́ Maríya yí. Sás dɔɔŋg í á bə nə cɛ̧ɛ̧lá bá nə Yósɛb, muud á bag ɔ *Dávid.

²⁸Eŋgəles mú nyíi Maríya njɔ́w cɨ nə nyə nə́: «Mə báág nə wo, Yawé jɨ nə wo, a mə́ sá mpaam nə jɔ̧ lâm.»

²⁹Iciyá ínɨ í mú sá Maríya mitə́dʉ́gá búbulə lúúd. A mú ŋgə jî lámʉ́d nə́ wâŋ mbií mə́bə́dá í kə́ nə́ jɨ.

³⁰Eŋgəles mú cɨ nə nyə nə́: «Maríya, kú bɛɛg fúndə. Nəcé wo mə́ bwəma nə ocúncɛ́sh ɔ́ Zɛmbî.

³¹Dʉgɨ́, wo zə́ bə nə bum, wo bá byá mwámudûm, wo gwiid nyə nə́ Yésus.

³²A bá bə fwámɛ́ múúd. Bwə́ bá dʉ jɔ̂w nyə nə́ *Mwân mə́ Zɛmbî a gwɔ́w-gwɔ̂w. Zɛmbî wúsʉ́ Yawé mə bá yə nyə ijwûga í mpáámbə́ jé Dávid.

³³A bá jwú nə bag ɔ *Yákwab kandʉgə á kandʉgə, ijwûga byé í ábʉ́lɛ́ bə nə məshíné.»

³⁴Maríya mú cɨ nə éŋgəles nə́: «Jâŋ í bá bə ntʉdɛlɛ́, mɛɛ kú fwo mpu múdûm?»

³⁵Eŋgəles mú bɛ̧sa nə nyə nə «Ŋkɛ̧́ŋkɛ̧̂ Shíshim mə bá zə wódɨ́, ŋkul mə́ Zɛmbî a gwɔ́w-gwɔ̂w í mú búdal wo nda gúgʉ́wá í dʉ búdal múúd nə́. Gwə́ wə́ í bá sá nə́ mwân wó bá byá yɛ́ mə́ bá bə fééshá, bwə́ dʉ jɔ̂w nyə nə́ Mwân mə́ Zɛmbî.

³⁶Dʉgɨ́, mbyɛ̂l wô Ilísabet mə́ zə bə nə bum ícwúúlʉ́d. A bá nə́mə́ byá mwámudûm. Nyə muud bwə́ á dʉ cɨ nə́ a jɨ kundú yɛ́, bum mú nyə ŋkwoond saman dɨ̂.

³⁷Mpug nə́ sâ cúgɛ́ nə ŋkul bwɛlɛ́ ntɔ̧ Zɛmbî.»

³⁸Maríya mú cɨ nə́: «Mə jɨ sɔ́ɔl məsáal mə Yawé. A sáág mə nda wó mə́ cɨ nə́.» Eŋgəles mú kyey.

³⁹Nə́mə́ fwála dɔɔŋgʉ́ dɨ, Maríya mú ŋwa zhɨ́ɨ́ lɛɛlʉ́lə kə ŋgwə́la á kɔ́ɔ́mb Yudéa jísə́ mímbʉ́ŋ mimbʉ́ŋ yí.

⁴⁰A mú kə nyíi Zakarî dɨ́ njɔ́w, bə́da Ilísabet.

⁴¹Ja Ilísabet nyə á gwág məbə́dá mə́ Maríya yí, mwân nyə á lugʉsa nyə mwɔ̧̂ dɨ̂, Ilísabet músə lwánd nə Ŋkɛ̧́ŋkɛ̧̂ Shíshim nə́ cwɔ́ɔ́.

⁴²A mú kɨ̂m məma ŋkwiimbyê, nyə nə́: «Wo jɨ nə ibwádán ntɔ̧ bɔ́ɔ́lʉ́gá búdá bɛ̂sh, mwân jɨ́ wo mwô dɨ́ yɛ́ jɨ nə́mə́ nə ibwádán.

⁴³Jɨ́ í mpú sâ nə́ nyɔɔŋgʉ́ mə Cwámba waamə́ zə́g mə́dɨ́ yí.

⁴⁴Nəcé dʉgɨ́, njɨ mə́lwə̂ mâm mə́ ámə gwág mə́bə́dá mwɔ̧̂ yí, mwân nyə ámə lugʉsa mə nə məshusʉg mwô dɨ̂.

⁴⁵Wɛɛ mə́ jəla, wɛɛ muud mə́ *búgʉla nə́ sâ jɛ̂sh Cwámba mə́ sá nə́ bwə́ jááwʉg wo yí í é bwəma yɛ́.»

⁴⁶Maríya mú cɨ nə́: Zɛmbî waam, wo jɨ məma Zɛmbî.

⁴⁷Shíshim wâm í ŋgə kɔɔs nə məshusʉg nəcé cʉgye waamə́ Zɛmbî.

⁴⁸Nəcé a mə́ bə́lɛ ntɨ mísh dʉ́g zhizhe lwaá dɛ́ ámudâ. Haaw! Tɛ́ɛ́d fwála gaád buud wâ ikala byɛ̂sh bwə́ bá dʉ cɨ nə́: «mɛɛ mə́ jəla».

⁴⁹Nəcé Zɛmbî á ŋkul nyɛ̂sh mə́ sá mə məma ísâ. Jínə́ dɛ́ dʉ́sə nə gúmə́ ntɔ̧ sâ jɛ̂sh.

⁵⁰Lâm mə́cɛy yé wúsə nə́ bagə́ shú búúd bwə́ ŋwá nyə nə fúndʉ́gʉ́ wá kə wɔ́ɔ́s íkala ikala.

⁵¹A mə́ lwóya ŋkûl nyɛ́. A mə́ sá nə́ buud bwə́ dʉ ŋkɛ̂ny mə́nyúúl wá bwə́ cɨ́ɨ́magʉ́.

⁵²A mə́ yîl íŋkácid i búúd íjiya í ící byáŋʉ́d wusə shí, a bʉ̂n ózhizhe ɔ búúd gwɔ̂w.

⁵³Buud bwə́ á bə nə məfúfə wá, a mə́ yə bwo zhwog tɔɔm a nyiŋg búúd ɔ́ tɔɔm məbwə̂ ocwûd.

⁵⁴A mə́ zə kwiid bag ɔ sɔ́ɔl məsáal yé *Izʉrəyɛ̂l, a mə́ tə́dʉga lâm mə́cɛy yé,

⁵⁵nda nyə á kaag impáámbə́ bísʉ́ shú mə́ *Abʉraham bə́nɔ̂ŋ mpwoŋ buud nyɛ́ kandʉgə á kandʉgə nə́.

⁵⁶Maríya bá Ilísabet bwə́ á já je bə óŋkwoond olɔ́ɔl nə́ ndɛɛ́ Maríya músə nyiŋgə kə bwə́dɨ́.

⁵⁷Wəla lʉ byɛyí í á ka wɔ́ɔ́s Ilísabet. A mú byá mwámudûm.

⁵⁸Nə buud bə́nɔ́ŋ bwə́ á bə jáŋ baŋ wá, nə mimbyɛ̂l myɛ́ bwə́ mú gwág nə́ Yawé mə́ bul gwág nyə cɛy lámʉ́d. Bə́nɔ́ŋ bwə́ mú ka zə taag.

⁵⁹Jwɔ̂w mwân nyə a wɔ́ɔ́s mwɔ̂w mwɔɔmb yí, bwə́ mú zə nə́ bwə́ zə́ sá nyə ábɨwáág. Bwə́ mú cɛɛl gwiid nyə nə́ Zakarî nda sɔ́ɔ́ŋgʉ́.

⁶⁰Njɨ nyɔɔŋgʉ́ mú cɨ nə́: «Mbɔ̂! Jínə́ dɛ́ wə́ Yuánɛs.»

⁶¹Bwə́ mú cɨ nə nyə nə́: «Muud ŋgwúd nə ŋgwúd cugɛ́ nə jínə́ lʉ́ Yuánɛs njɔ́w búúd wʉ́n wɛ̂sh dɨ̂.»

⁶²Bwə́ mú dʉ lésha nə sɔ́ɔ́ŋgʉ́ mwân dʉ fufə njɨ məbwə̂ jílə nyə jínə́ á cɛ́ɛ́l gwiid mwân yí.

⁶³Sɔ́ɔ́ŋgʉ́ mwân mú gwáámb nə́ bwə́ yə́g nyə kwóógʉ́ nə́ a zə́g cilə cínɔŋg. A mú cilə nə́: «Jínə́ dɛ́ wə́ Yuánɛs.» Buud bɛ̂sh bwə́ mú bul káam.

⁶⁴Seegya ntâg nə́ Zakarî mpu mə́ bâŋ, jûm mú nyə fʉlî nə́ a je lás. A mú shwal bʉ̂n kə́l ŋgə yə Zɛmbî məshwúmb.

⁶⁵Buud ɔ́ baŋ bɛ́ bwə́ mú bə nə fúndʉ́gʉ́. Nə́ ndɛɛ́ buud bwə́ mú ŋgə bwiiŋg lâŋ á isâ í á sɨ̂y ínɨ shí Yudéa á mimbʉ́ŋ nyɛ̂sh.

⁶⁶Buud bɛ̂sh bwə́ á gwág lâŋ wɔɔŋg wá bwə́ á bə kú bwɛlɛ yîl lâm cínɔŋg. Bwə́ mú dʉ jî nə́: «Múmwán jɔɔŋg í bá bə jɨ́ e? Bʉ́bə́lɛ́, ŋkul mə́ Yawé í á ŋgə nyîn cʉg mə mwân wɔɔŋgʉ́d.»

⁶⁷Mwân sɔ́ɔ́ŋgʉ́ yé Zakarî mú lwánd nə Ŋkɛ̧́ŋkɛ̧̂ Shíshim nə́ cwɔ́ɔ́, a mú cúndə cúndə́ mə́ Zɛmbî, nyə nə́:

⁶⁸Gúmə́ nə Yawé, Zɛmbî á *Izʉrəyɛ̂l nəcé a mə́ kwiid kúl búúd jé, yîl bwo mənyámád.

⁶⁹A mə́ wééshʉli sə́ ŋkácid cʉgye mpwoŋ buud mə́ sɔ́ɔl məsáal yé *Dávid dɨ̂.

⁷⁰Nyə a shí bwey dʉ jaaw kɛ́ɛl dɔɔŋgʉ́, *buud ɔ mícúndə́ bɛ́ nyə á fɛ́ɛ́sh yág wá dʉ jaaw.

⁷¹Nyə á kaag nə́ a bá zə yîl sə́ mə́nyámá mə́ mízhízhíŋ mísʉ́d, a yîl sə́ məbwə̂ mə́ bɔɔŋg bwə́ ŋgə́ mpii sə́ wád.

⁷²A mə́ lwágʉlə nə́ a jɨ nə lâm mə́cɛy nə odâ; a mə́ tə́dʉga sɔ̧ nyə á sá nə bwo yí.

⁷³Nəcé nyə á kɛɛn bʉ́bə́lɛ́ nə Dâ *Abʉraham nə́ í bá bə nə́

⁷⁴á ká shîn yîl sə́ mə́bwə̂ mə́ búúd bwə́ ŋgə́ lúmbʉli nə sə́ wá dɨ, sə́ mə́ bá dʉ yə nyə gúmə́ kú nə ifwaas,

⁷⁵sə́ ŋgə́ lwóya nə́ sə́ bʉ́sə buud bɛ́, sə́ ŋgə́ cʉgə tʉ́təlí nyə́dɨ́ míshʉ́d, ŋgə cʉgə nda búúd ɔ kúl jé bwə́ jə́lá nə cʉgə nə́, sə́ bə ntɔ́ mwɔ̂w mə́ cʉg mə́sʉ́ mɛ̂sh.

⁷⁶Múmwán, bwə́ bá dʉ jɔ̂w wo nə́ *muud micúndə́ mə́ Zɛmbî á gwɔ́w-gwɔ̂w. Nəcé wo bá kə́ Cwámba shwóg, kə kwambʉlə nyə zhɨɨ́