San Lucas 1:27-76

²⁷Dios bsölëꞌë lëꞌ niꞌ tsajyúëꞌ‑biꞌ tubiꞌ biꞌi ngul raꞌbandauꞌ lëbiꞌ María. Chnazíꞌ lu naꞌbiꞌ María utság náꞌlenbiꞌ‑nëꞌ bönniꞌ lëꞌ José. Naquëꞌ José zxiꞌn xsoëꞌ David, bönniꞌ gna béꞌinëꞌ bunách Israel.

²⁸Catiꞌ gyaziëꞌ Gabriel naꞌ ga zoabiꞌ María, gudxëꞌ‑biꞌ: ―Padiux. Dios ruzáꞌ ladxëꞌë quiuꞌ. Zóalenëꞌ liꞌ Xanruꞌ Dios. Lëczëꞌ benëꞌ ga nacruꞌ liꞌ bicaꞌ ba ca yúguꞌtë ngul.

²⁹Catiꞌ bléꞌibiꞌ gbaz laꞌy naꞌ María, gröꞌbiꞌ baguíꞌi niꞌa qui didzaꞌ naꞌ bëꞌë, len rubani ládxiꞌbiꞌ nacx rna didzaꞌ naꞌ bulidzëꞌ‑biꞌ gbaz laꞌy naꞌ.

³⁰Niꞌr gudxëꞌ‑biꞌ gbaz laꞌy naꞌ, rnëꞌ: ―María, cutu gádxinuꞌ, le chbdél‑liꞌnuꞌ le ruzáꞌ ladxëꞌë quiuꞌ Dios.

³¹Naꞌa, tsuꞌubiꞌ lëꞌu tubiꞌ biꞌidauꞌ, atiꞌ uzúꞌ‑biꞌ tubiꞌ biꞌi bö́nniꞌdauꞌ, atiꞌ guꞌu labiꞌ Jesús.

³²Jesús ni gáctërëꞌ blau, len siꞌ Lëꞌ Zxiꞌnëꞌ Dios, Nu nactër blau. Xanruꞌ Dios gunëꞌ ga gna bëꞌë ca naꞌ gna bëꞌë David, xuz gul gdöd queëꞌ.

³³Jesús naꞌ gna béꞌitecznëꞌ bunách Israel, atiꞌ le gna bëꞌë Lëꞌ gatga udx qui.

³⁴Niꞌr gnábibiꞌ gbaz laꞌy naꞌ María, rnabiꞌ: ―¿Nacxcz gac lë ni, le cutu zóalenaꞌ bönniꞌ?

³⁵Bubiꞌë didzaꞌ gbaz laꞌy naꞌ, rëꞌ‑biꞌ: ―Gdxinëꞌ ga zuꞌ Dios Böꞌ Laꞌy, atiꞌ soalen liꞌ yöl‑laꞌ huac queëꞌ Dios, Nu nactër blau, le gac ga zuꞌ ca tu zxul rguꞌu böaj. Qui lë ni naꞌ biꞌi bö́nniꞌdauꞌ naꞌ ral‑laꞌ galjbiꞌ, tsuꞌubiꞌ lu nëꞌë Dios, atiꞌ siꞌ labiꞌ Zxiꞌnëꞌ Dios.

³⁶Yetú caꞌ, Elisabet, ngul diꞌa dza quiuꞌ, chnuaꞌnu‑biꞌ caꞌ lëꞌnu tubiꞌ biꞌi bö́nniꞌdauꞌ zal‑laꞌ chnagulnu. Gulanë́ꞌ queënu: “Nacnu ngul huödx”, san chzeaj xop beoꞌ nuaꞌnu‑biꞌ lëꞌnu biꞌidauꞌ naꞌ.

³⁷Cutu bi zoa le cusáquiꞌnëꞌ Dios.

³⁸Niꞌr María gnabiꞌ: ―Ni zoaꞌ. Tsaz nacaꞌ huen dxin queëꞌ Xanruꞌ. Gac quiaꞌ ca naꞌ chgnauꞌ. Niꞌr laꞌ buzaꞌtëꞌ gbaz laꞌy naꞌ ga zoabiꞌ María.

³⁹Laꞌ dza niꞌz gyuꞌubiꞌ nöz María, atiꞌ jaréluꞌbiꞌ gyeajbiꞌ ga nac guíꞌadauꞌ, bdxinbiꞌ tu yödz luyú Judea.

⁴⁰Niꞌ gyazbiꞌ lidxëꞌ Zacarías len gudxbiꞌ‑nu Elisabet: ―Padiux.

⁴¹Catiꞌ byö́ninu Elisabet didzaꞌ naꞌ bëꞌbiꞌ María, laꞌ butatë cuinbiꞌ biꞌi huëꞌndauꞌ naꞌ yuꞌubiꞌ lëꞌnu, atiꞌ dusóalenëꞌ‑nu Dios Böꞌ Laꞌy.

⁴²Niꞌr bëꞌnu zidzj didzaꞌ Elizabet, rnanu: ―Chnunëꞌ Dios ga nacruꞌ liꞌ bicaꞌ ba ca yúguꞌtë ngul len chnunëꞌ caꞌ ga nacbiꞌ bicaꞌ ba biꞌidauꞌ naꞌ yuꞌubiꞌ lëꞌu.

⁴³¿Núzxatë nedaꞌ, zaꞌnu quiaꞌ xnëꞌë Xanaꞌ?

⁴⁴Catiꞌ byöndaꞌ didzaꞌ bëꞌu, bulidzuꞌ nedaꞌ, lu yöl‑laꞌ rudziji queëbiꞌ laꞌ butatë cuinbiꞌ biꞌi huëꞌndauꞌ ni yuꞌubiꞌ lëꞌa.

⁴⁵Bicaꞌ bauꞌ liꞌ le gyéjlëꞌu xtidzëꞌë gbaz laꞌy, atiꞌ udxíncz lë naꞌ gudxëꞌ liꞌ uláz queëꞌ Xanruꞌ.

⁴⁶Niꞌr gnabiꞌ María: “Gdu ladxaꞌa runaꞌ Xanruꞌ zxön,

⁴⁷Len rudziji ládxiꞌlenaꞌ‑nëꞌ Dios, Nu ruslá nedaꞌ.

⁴⁸Dioscz buzáꞌ ladxëꞌë quiaꞌ nedaꞌ. Yuꞌa lu nëꞌë, tsaz nacaꞌ huen dxin queëꞌ. Naꞌa su lau, ca nac quiaꞌ laꞌná: ‘Bicaꞌ ba ngul naꞌ.’

⁴⁹Zxöntër nac le benëꞌ quiaꞌ Dios uná bëꞌ. Laꞌy nac lëꞌ.

⁵⁰Lëꞌ ruhuechiꞌ ládxiꞌteczëꞌ bunách tadxi Lëꞌ Naꞌa dza len dza ziꞌa zaꞌc.

⁵¹Yuguꞌ yöl‑laꞌ huac zxön chbenëꞌ Lëꞌ. Buzötjëꞌ nup glun zxön yöl‑laꞌ rejniꞌi quegac.

⁵²Bugǘëꞌ yöl‑laꞌ uná bëꞌ quegac nup glac blau, Len benëꞌ ga glac blau nup glac nöxj ladxiꞌ.

⁵³Benëꞌ ga guluhuö́lj guladzeꞌi nup guladún, Len bucaꞌnëꞌ caꞌz nup gulaleꞌi yöl‑laꞌ tsahuiꞌ.

⁵⁴Gúclenëꞌ bunách Israel, nup naꞌ tun xchinëꞌ, Le yajneynëꞌ lequëꞌ len buechiꞌ ladxëꞌë lequëꞌ.

⁵⁵Benëꞌ ca gzxiꞌ lu nëꞌë gunëꞌ quequëꞌ xuz xtauꞌruꞌ Lencaꞌ queëꞌ Abraham len quegac zxiꞌn xsoëꞌ.”

⁵⁶Bugáꞌnlenbiꞌ‑nu Elisabet María gdu ca tsonn beoꞌ, atiꞌ gdöd niꞌ böajbiꞌ lidxbiꞌ.

⁵⁷Catiꞌ bdxin dza ral‑laꞌ soabiꞌ biꞌidauꞌ queënu Elisabet, buzoanu‑biꞌ tubiꞌ biꞌi bö́nniꞌdauꞌ.

⁵⁸Gulayöni dzag yuꞌu queënu len yuguꞌ diꞌa dza queënu ca naꞌ guc, buechiꞌ ladxëꞌë‑nu Dios, atiꞌ guludzíjilen lënu.

⁵⁹Catiꞌ chguc xunuꞌ dza zoabiꞌ biꞌidauꞌ naꞌ, guladxinëꞌ diꞌa dza queënu quië laꞌchuguëꞌ lu xpë́laꞌbiꞌ biꞌi bö́nniꞌdauꞌ naꞌ lë naꞌ gac bëꞌ náquibiꞌ queëꞌ Dios, atiꞌ tëꞌnnëꞌ luꞌë labiꞌ Zacarías ca naꞌ lëꞌ xuzbiꞌ.

⁶⁰Niꞌr bubiꞌinu didzaꞌ Elisabet, xnaꞌbiꞌ, rnanu: ―Cutu. Juan siꞌ labiꞌ.

⁶¹Gulanabnëꞌ‑nu, taꞌnë́ꞌ: ―¿Bizx queë? Nutu nu diꞌa dza quiuꞌ lëꞌ Juan.

⁶²Niꞌr gululáꞌ gululuiꞌznëꞌ, gulanabnëꞌ xuzbiꞌ nacx rëꞌnnëꞌ guꞌë labiꞌ.

⁶³Gnabëꞌ tu blagdauꞌ Zacarías naꞌ, atiꞌ buzujëꞌ lahui cni: “Juan lëbiꞌ.” Gulubannëꞌ yúguꞌtëꞌ.

⁶⁴Laꞌ niꞌz böaljtë ruꞌë Zacarías naꞌ len buguitjtë ludxëꞌë, atiꞌ bëꞌë didzaꞌ le gluꞌë Dios yöl‑laꞌ ba.

⁶⁵Niꞌr gládxinëꞌ len gulubannëꞌ yúguꞌtë dzag yuꞌu quequëꞌ, atiꞌ yúguꞌtë yödzdauꞌ nacuáꞌ lu guíꞌadauꞌ luyú Judea, gzë didzaꞌ ca guc lë ni.

⁶⁶Gulazáꞌ ládxiꞌgac yúguꞌtë nup gulayöni ca naꞌ guc, taꞌná: ―¿Nacxcz gacbiꞌ biꞌi bö́nniꞌdauꞌ ni? Le nactë zóalenëꞌ‑biꞌ Xanruꞌ.

⁶⁷Niꞌr dusóalenëꞌ Zacarías, xuzbiꞌ Juan, Dios Böꞌ Laꞌy, atiꞌ bëꞌë didzaꞌ uláz queëꞌ Dios, rnëꞌ:

⁶⁸“Yöl‑laꞌ ba Dios, Xangac bunách Israel Le duyúëꞌ rëꞌu, bunách queëꞌ, len böaꞌuëꞌ rëꞌu.

⁶⁹Bsölëꞌë queëruꞌ Nu uslá rëꞌu, Len yöl‑laꞌ huac zxön qui, Nu naꞌ gulj ladj zxiꞌn xsoëꞌ David, Huen dxin queëꞌ Dios.

⁷⁰Dza niꞌtë gzxiꞌ lu nëꞌë gunëꞌ cni, Nac ca naꞌ gnëꞌ lu rúꞌaquëꞌ bönniꞌ gluꞌë didzaꞌ uláz queëꞌ.

⁷¹Gzxiꞌ lu nëꞌë uslë́ꞌ rëꞌu Lu naꞌgac nup taꞌléy rëꞌu Lencaꞌ lu naꞌgac nup cutaꞌleꞌi rëꞌu dxiꞌa.

⁷²Gzxiꞌ lu nëꞌë huechiꞌ ladxëꞌë xuz xtauꞌruꞌ Len tsajneynëꞌ le gzxiꞌ lu nëꞌë le nac laꞌy.

⁷³Lë ni benëꞌ tsutsu xtidzëꞌë gzxiꞌ lu nëꞌë, Le gunëꞌ queëꞌ Abraham, xuzruꞌ gul gdöd, Le nac tu le ral‑laꞌ gunëꞌ queëruꞌ rëꞌu.

⁷⁴Gzxiꞌ lu nëꞌë uslë́ꞌ rëꞌu Lu naꞌgac nup cutaꞌleꞌi rëꞌu dxiꞌa Quië cutur gádxiruꞌ gunruꞌ xchinëꞌ Lëꞌ,

⁷⁵Len quië gacruꞌ baꞌa ladxiꞌ len gdu dxiꞌa Lahuëꞌ Lëꞌ yúguꞌtë dza soaruꞌ gbanruꞌ.

⁷⁶Liꞌ, zxíꞌnaꞌdauꞌ, siꞌ lauꞌ bönniꞌ ruꞌë didzaꞌ uláz queëꞌ Dios Nu nactër blau Le tsajnöruꞌ ca Xanruꞌcz, upaꞌu nöz ga tödëꞌ.