1Le kmeňen Ruben the Gad sas igen but dobitkos. Sar dikhle, savi lačhi maľa sas andro Jazer the Gilead prekal o dobitkos,
2avle ko Mojžiš, ko rašaj Eleazar the ko Izraelike vodci a phende:
3“O RAJ pomožinďa le Izraelitenge, hoj te zalen kale fori: o Atarot, o Dibon, o Jazer, e Nimra, o Chešbon, o Elale, o Sebam, o Nebo the o Beon. Odi phuv hiňi lačhi prekal o dobitkos a amen hin baro dobitkos.
5Mangas tut, te tuke sam pre dzeka, de amenge kadi phuv, hoj te el amari, a ma prele amen prekal o Jordan.”
6O Mojžiš lenge phenďa: “Tumare phrala mušinen te džal andro mariben a tumen kamen te ačhel kade?
7Soske keren tele e dzeka le Izraelitenge, hoj te na džan andre phuv, so lenge diňa O RAJ?
8Kavke kerenas the tumare dada, sar len bičhaďom andral o Kadeš-Barnea, hoj te predikhen e phuv.
9On avle dži andre Dolina Eškol, predikhle odi phuv, ale paľis le Izraelitenge kerde avke tele e dzeka, hoj na kamle te džal andre odi phuv, so lenge diňa o RAJ.
10Andre oda džives o RAJ pre lende choľisaľiľa a diňa vera:
11‘O murša, kaske sas biš (20) berš the buter, sar avle avri andral o Egipt, na džana andre phuv, pal savi diňom la veraha lav le Abrahamoske, le Izakoske, the le Jakoboske, bo pes mange na oddine cale jileha.
12Ča o Kenizzitas o Kaleb, le Jefunnoskero čhavo, the o Jozua, le Nunoskero čhavo, pes mange oddine cale jileha.’
13Akor o RAJ pro Izraeliti igen choľisaľiľa a mukľa len te phirel pal e pušťa saranda (40) berš dži akor, medik na muľa avri oda pokoleňje, so kerenas oda, so na sas le RAJESKE pre dzeka.
14Akana tumen keren avke sar tumare dada! Tumen, o Ruben the o Gad, san binošno pokoleňje, savo mek buter choľarel le RAJES pro Izrael!
15Te tumen pes le RAJESTAR visarena a na džana pal leste, mukela le manušen mek buter pre pušťa a tumen avena vinovate vaš oda, hoj savore okla manuša ena zňičimen.”
16Ale on phende le Mojžišoske: “Ešeb (peršo) amenge domuken te ačhavel ohradi prekal amare stadi the fori prekal amare fameliji.
17Amare fameliji ačhena andre kala zorale fori a dživena bi e dar andre kadi phuv a amen pes pririchtinaha amare phralenca le Izraelitenca te džal andro mariben, medik na zalaha e phuv, so ela lengeri.
18Na avaha pale khere, medik savore Izraeliti na chudena peskeri phuv sar ďeďictvos.
19Na ela amen phuv maškar lende pre aver sera pal o paňi Jordan, bo chudľam amari phuv kade pro vichodos le Jordanostar.”
20O Mojžiš lenge phenďa: “Te čačes gondoľinen oda, so phenen, akor pes pririchtinen te džal andro mariben vaš o RAJ.
21Paľis savore murša mi predžan prekal o Jordan anglo RAJ a mušinen pes te marel le ňeprijaťeľenca dži akor, medik len o RAJ na tradela avri angle leste
22a te o RAJ zalela odi phuv, ta paľis pes šaj visaren pale a anglo RAJ the anglo Izrael avena bi e vina. Avke ela kadi phuv tumaro ďeďictvos anglo RAJ.
23Ale te na doľikerena tumaro lav, phenav tumenge, hoj aleha kerena binos anglo RAJ. Akor šaj džanen, hoj avena marde vaš tumare bini.
24Avke šaj ačhaven peske o fori prekal tumare čhave the ohradi prekal tumare stadi, ale doľikeren the oda lav, so diňan.”
25Akor o murša andral o kmeňi Gad the Ruben phende le Mojžišoske: “Amen sam tire služobňika a keraha oda, so amenge prikazinďal.
26Amare čhave, o romňa, o stadi the savore džviri ačhena andro fori andro Gilead.
27Ale savore tire služobňika predžana prekal o Jordan pririchtimen pro mariben anglo RAJ, avke sar phenďal.”
28Avke o Mojžiš prikazinďa le rašaske Eleazaroske, le Jozuaske the le Izraeloskere kmeňengere vodcenge:
29“Te o murša andral o Gad the Ruben predžana o Jordan pririchtimen pro mariben anglo RAJ, a te tumenge pomožinena te zalel odi phuv, dena lenge e Gileadoskeri phuv sar lengero ďeďictvos.
30Ale te na predžana tumenca o Jordan a na džana tumenca andro mariben, akor mušinena te chudel peskeri phuv maškar tumende andro Kanaan.”
31O murša andral o Gad the Ruben phende: “Keraha avke, sar o RAJ prikazinďa peskere služobňikenge.
32Predžaha o Jordan andre phuv Kanaan pririchtimen pro mariben. Ale e phuv, so chudaha sar ďeďictvos, ela kade pro vichodos le Jordanostar.”
33Avke o Mojžiš diňa le kmeňenge Gad the Ruben the le jepaš kmeňoske Menašše e phuv le Sichonoskeri, savo sas kraľis upral o Amoreja, the e phuv le kraľiskeri Ogoskeri andral o Bašan. Diňa lenge caľi odi phuv a paš oda o fori the o phuva pašal lende.
34Paľis o kmeňos Gad pale ačhaďa o fori Dibon, Atarot, Aroer,
35Atarot-Šofan, Jazer, Jogbeha,
36Bet-Nimra the o Bet-Haran. Ačhaďa kala zorale fori the ohradi prekal o bakre.
37O kmeňos Ruben pale ačhaďa o fori Chešbon, Elale the Kirjatajim.
38Kale trin forenge, so pale ačhade – o Nebo, o Baal-Meon the e Sibma – dine aver nava.
39O potomki le Machiroskere, savo sas čhavo le Menaššeskero, gele pro mariben andre phuv Gilead. Zaiľa la a tradľa avri odarik le Amorejen, save ode bešenas.
40Avke o Mojžiš diňa e phuv Gilead le Machiroskere potomkenge a on ode ačhile te bešel.
41O Jair andral o kmeňos Menašše geľa pro mariben, zaiľa varesave gava andro Gilead a diňa lenge nav: Gava le Jairoskere.
42The o Nobach geľa pro mariben a zaiľa o foros Kenat le gavenca. Le foroske Kenat diňa nav pal peste Nobach.
