1Bingyal’ ko ngiyal’ i n’ey me m’ar Hezekiah ni Pilung ni chugur ni nge yim. Me yan Isaiah ni profet nib mo’on ni fak Amoz nge yan i guy nge ga’ar ngak, “I SOMOL e be yog ngom ni ngam yarmiy urngin ban’en nge fel’ rogon ni bochan e gur e dab kum gol. Ma ga fal’eg rogom ni ngamum’.”
2Me cheleg Hezekiah owchen ko rungrung nge meybil:
3“SOMOL, dab mu pag talin ni ri gub yul’yul’ u rogon ni ug pigpig ngom ma urngin ngiyal’ ma ug guy rogon ni nggu rin’ e n’en ni ga ba’adag ni nggu rin’.” Me tabab ko yor ni almarin.
4Ma aram me l’og SOMOL Isaiah
5ni nge sul ngak Hezekiah nge ga’ar ngak, “I Gag, SOMOL, ni Got rok David ni ga’ rom kakrom, e kug rung’ag e meybil rom ma kug guy lu’am; bay gu tem ndab mum’ ni ragag nge lal e duw n’umngin nap’an.
6Bay gu ayuwegnem nge binaw nu Jerusalem u pa’ e emperor nu Assyria. Ma bay kug par ni gag e gu be yoror riy.”
7Me fulweg Isaiah ni ga’ar, “I SOMOL e bayi pi e pow ngomed nge m’ug ni n’en ni micheg e ra tay u gil’.
8Ni fare tawo’ ni toy Ahaz ni Pilung, e bayi gagiyegnag SOMOL fon u but’ nge sul nga tomur ni go nap’an ragag yay nike n’uf be’ ay.” Ma aram e fon fare tawo’ e sul nga tomur ni ragag yay.
9Tomuren nike gol Hezekiah ko m’ar rok, me yoloy e re tang ko sorok ni ba’aray:
10Gu leamnag ni bay gum’ ko ngiyal’ ni kari taw nga fel’ngin e yafos rog nggu wan ko fare fayleng ko yam’, ni dab gu par nge mus n’umngin e yafos rog.
11Gu leamnag ni lan e biney e fayleng ni yibe par riy e dariy e ngiyal’ ni kug ra guy SOMOL bayay ara be’ ni kabfos.
12Ya yafos rog e kan th’ab kemus, ni bod ba tent ni kan pilig nga but’, ni bod e mad ni kan th’ab ko fare n’en ni yima lifith e mad riy. Gu leamnag nike museg Got e yafos rog.
13N’umngin e nnep’ ma gu ma gel’gel’ ngalang ko amith, ni gowa be tet’ar ba layon e yil rog. Gu leamnag nike museg Got e yafos rog.
14Lamag e achichig me me’waer, mu ug moen ni bod ba arache’ ni dove. Me magaf e tir u marwag ko changar ngalang. SOMOL, mu lageg u fithik’ gubin e tiney e gafgow.
15Mang e rayag ni nggog? SOMOL e ke rin’ e ran’ey ni aray rogon. Ke tagan lanin’ug, ni dabkiyag e mol rog.
16SOMOL bay gu par ni fan ngom, ni kemus ni gur e fan ngom; mu gol nageg ngam teg ni dab gum’.
17Buchbuchan’ rog e bayi pilyeg nge ngal’ ni gapas. Gur e ka mu ayweg e pogofan rog u fithik’ gubin e riya’; kamn’ag machan gubin e denen rog u wun’um.
18Dariy ta’be’ ko fayleng ko yam’ nrayag ni pining e sorok ngom; pi’in yad ba yam’ e dabiyag ni nge pagan’rad nga fanam yul’yul’.
19Pi’in nib fos e yad ma pining e sorok ngom, ni bod ni gu be pininge e sorok ngom e chiney. Pi matam e yad ma yog ngak pifakrad fanam yul’yul’.
20SOMOL kam gol nigeg. Bay gu chubeged e musik ni harp magmad tangnag e sorok ngom, u lan e Tempel rom u n’umngin nap’an e yafos romad.
21Isaiah e yog ngak Hezekiah ni Pilung ni nge pirdi’iy e gek’iy ni fig nge tay ko lot u downgin, ya nge gol.
22Miki fith Hezekiah ni Pilung ni ga’ar, “Mang e pow riy nrayag ni nggu wan nga talang ko naun rok SOMOL?”
