Isaias 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Dutun he timpu, nezeruwan si Hezekia ne henduen be te ebpatey en. Midhendiyà te kandin is ebpeneuven he si Isaias he anak ni Amoz ne migkaǥi te, “Migkaǥi is Nengazen he veeli nu en is egkesuatan nu te ebaal su kenè ke en egkeulian, kekenà, ebpatey kad.”

²Ne hein nezineg haazà ni Hezekia, midsinaru sikandin diyà te elavat ne nengemuyù diyà te Nengazen

³Ke sikandin te, “Nengazen, tentenuzi nu is kegkemepezumdumahan ku kenikew kayi te kebpengungubpaan ku, nenilbi a kenikew te ebpuun diyà te gehinawa ku, wey meupiya is baal ku ziyà te etuvangan nu.” Ne utew sikandin nekesineǥew.

⁴Ne migkaǥi is Nengazen diyà te ki Isaias

⁵he medlikù sikandin diyà te ki Hezekia ne keǥiya zin heini: “Iyan heini egkeǥiyen te Nengazen, sikan is Megbevayà te kepuun nu he si David; ke sikandin te, ‘Nezineg ku is pengemuyù nu wey neehè ku is menge luhè nu. Ne ed-umanan ku pa te 15 he tuig is untung nu.

⁶Edlibriyen ku sikew wey heini is inged puun te gehem te hadì te Asiria. Ebpengelangan ku heini he inged.

⁷Iyan heini tuus he ibeǥey ku he kemetuuzan he edtumanen ku heini is insaad ku:

⁸Ibpelikù ku te sepulù he sigundu is alung te andew ziyà te urasan he mibpeveelan ni Ahaz.’” Ne netuman heini.

⁹Iyan heini insurat ni Hadì Hezekia he hadì te Juda hein neulian sikandin te zaru zin:

¹⁰Kunaan ku ke ebpatey ad he vetan-en e pa, ne kenà ad egkaawà diyà te lugar te menge minatey.

¹¹Kunaan ku ke kenè ku en egkaahà is Nengazen kayi te kelibutan te menge uuyag, etawa kenè ku en egkaahà is menge etew kayi he kelibutan.

¹²Hapit en egkahanew is untung ku iring te tulda te ebantey te kerehidu he inlayap te keramag. Kunaan ku ke egketamped en is untung ku iring te manggad he midtamped te mengengavel. Puun te meselem taman te mezukilem, edtaǥad a te kedtepusa nu te untung ku.

¹³Wazà a mebpelavew is midtaǥad taman te meselem, ne egkeisip ku he ebpatey ad, henduen be te edrupeten te erimaung is menge tulan ku. Puun te meselem taman te mezukilem midtaǥad a he edtepusen nu en is untung ku.

¹⁴Mibpetavang a he is laǥeng ku henduen be te kegkaǥi te tagbis he sayaw etawa dugwak. Midag-es a he is laǥeng ku henduen be te kegkaǥi te merepatik. Neveley is menge mata ku te kedlingehè ku ziyà te langit. Ke siak te Nengazen, tevangi a kayi he kelised.

¹⁵Piru hengkey pa is egkekaǥi ku? Midtavak e zin ne iyan mismu sikandin mibawì kedì wey a meulii. Ebpengungubpaan a he kenà ebpelavew tenged te mereǥen he neseǥazan ku.

¹⁶Pinaaǥi kayi Nengazen, ebmelig-en is untung te etew, ne siak mismu, mibmelig-en a. Neulian a te kebewii nu kedì ne intuǥut nu he meuyag a.

¹⁷Tutuu, he is kemeresayan ku para te keupiyaanan ku. Tenged te kebmahala nu kedì, midlibri a kenikew te kezeetan wey mibpesaylu a kenikew te menge salè ku.

¹⁸Ebmenmenuwen ku is kedalig kenikew emun minatey ad? Is menge minatey kenè en ebpekezalig kenikew wey kenè en ebpekeperateng te kebmetinumanen nu.

¹⁹Iyan dà ebpekezalig kenikew is menge uuyag iring te ebeelan ku ǥuntaan. Is kada lapis te kevuwazan ebpenudtul ziyà te edsunud he lapis te kevuwazan te kebmetinumanen nu.

²⁰Nengazen, edlibriyen a kenikew, umbe seled te tivuuk he untung dey, egkanta key ziyà te valey nu he eduyuǥan te menge instrumintu.

²¹Hein wazè pa meulii si Hezekia, migkeǥiyan sikandin ni Isaias he kepii zin te vinekbek he veǥas te higus is levag din wey meulii sikandin.

²²Ne mid-insà si Hezekia te, “Hengkey is tuus he tutuu he egkeulian a ne ebpekehendiyà a te valey te Nengazen?”